Ձեր վստահելի աղբյուրը

ԼՂՀ խնդրի լուծման հարցի ակտիվացումը մի քանի դրդապատճառ ունի` ԱՊՀ տարածաշրջանային զարգացումները, ԱՄՆ-Ռուսաստան հարաբերությունների սրումը, ինչպես նաև Հայաստանի իշխանության անհասկանալի և փոփոխական դիրքորոշումը: Այսօր լրագրողների հետ հանդիպման ժամանակ նման կարծիք հայտնեց քաղաքագետ, «Հայազն» կուսակցության անդամ Արմեն Աղայանը:

Հանդիպմանը ներկա «Քաղաքացիական պայմանագիր» հանրային-քաղաքական միավորման կառավարման խորհրդի անդամ Արսեն Խառատյանը համաձայնեց Աղայանի ներկայացրած տեսակետի հետ` ավելացնելով, որ Ուորլիքը իր հայտարարությունով ցանկացել է ցույց տալ ԱՄՆ-ի չոզոքությունը:

«Ուորլիքի հայտարարությունը՝ նրա դիրքերի լեգիտիմացման տարր ուներ: Նրա ելույթից մի շաբաթ առաջ Ադրբեջանի իշխանությունները սկսել էին Ուորլիքին անվստահություն հայտնելու գործընթացը»- նշեց Արսեն Խառատյանը:

Անդրադառնալով ԵԱՀԿ Մինսկի խմբի համանախագահի ներկայացրած 6 կետերին Արմեն Աղայանն ասաց, որ ԼՂՀ կարգավորման կետերը հին խնդիրները նորից օրակարգ բերելու ԱՄՆ-ի քայլն է, ինչն իրեն չի վախեցնում.«Սա դիրքային քայլ է՝ ընթացիկ դիրքերը լավացնելու, երկրներին ինչ-որ բաներ հասկացնելու համար» : 

Գնահատելով Հայաստան-Ռուսաստան-ԵՄ-ԱՄՆ արտաքին հարաբերությունները Արմեն Աղայանը շեշտեց, որ այս հարաբերությունների գխավոր թերությունն այն է, որ մենք մեր անվտանգության հարցը տարել ենք արտաքին քաղաքականություն:

Վրաստանի հետ հարաբերություններն էլ Արսեն Խառատյանը ոչ ցանկալի համարեց` նշելով, որ կան սահմանային, սակագների խնդիրներ, որոնք քննարկվում են, բայց լուծում չեն ստանում: