Լեյլա Յունուս. Ադրբեջանի դպրոցական գրքերում գրված է, որ քրիստոնյաները ադրբեջանական ժողովրդի թշնամիներն են
«Իմ և ամուսնուս լուսանկարները, որտեղ երևում է, որ մենք խաչ ենք կրում, ինչպես նաև իշխող կուսակցության պատգամավորների, Գիտությունների ակադեմիայի աշխատակիցների հայտարարությունները այն մասին, թե մենք հայրենիքի դավաճաններ ենք, հանցագործներ և Հայաստանի լրտեսներ, բացահայտ բռնության և ջարդի կոչ են հանդիսանում»: Այս մասին հայտարարել է ադրբեջանցի իրավապաշտպան Լեյլա Յունուսը «Rex» լրատվական գործակալությանը տված հարցազրույցի ժամանակ:
Իրավապաշտպանը նշել է, որ ինքը հրապարակայնորեն քննադատում է ադրբեջանական դպրոցների պատմության գրքերի հեղինակներին, որոնցում երեխաներին 10 տարեկանից ներշնչում են, որ ադրբեջանական ժողովրդի թշնամիները՝ քրիստոնյաներն են, իսկ հայերին անվանում են «սև հագուստով անհավատներ»:
«Իմ՝ պատմական գիտությունների թեկնածուի մտքով, երբեք չէր կարող անցնել, որ պատմության դպրոցական գրքերում գրված կլինի, թե Ադրբեջանում մուսուլմանների՝ շիաների և սուննիների միջև առկա տարաձայնությունների մեղավորները հենց քրիստոնյաներն են, մասնավորապես հայերը»,-նշում է Յունուսը:
Իրավապաշտպանը պատմում է, որ իրենց բակում ապրում էին ադրբեջանցիներ ու հայեր, ռուսներ, հրեաներ, թաթարներ և ուկրաինացիներ, և ինքը երբեք նրանց ազգության և հավատի միջև տարբերություն չի դրել:
«Այսօր, երբ իշխանամետ թերթերը, լրատվական կայքերը, ռադիոն և հեռուստաալիքները ամեն օր հայտարարում են, որ ես և իմ ամուսինը հայրենիքի «դավաճաններ» ու «թշնամիներ» ենք, որ ես «մաքուր ադրբեջանցի» չեմ, այլ ռուսախոս «խառնուրդ» եմ, երբ ոստիկանության գնդապետ Ի. Ասադովը հրապարակայնորեն լրագրողների ներկայությամբ արդարացնում էր իմ նկատմամբ բռնություն կիրառած ոստիկանին, նշելով, որ ես ադրբեջանցի չեմ, այլ հայ եմ, այս ամենը տեսնելով ես վախենում եմ իմ երկրի ապագայի համար»:
Լեյլա Յունուսը հիշեցրել է նաև, թե ինչպես էր հավաքի ժամանակ, մի հասարակ տգետ ադրբեջանցի քրիստոնյաների և առաջին հերթին հայերի հետ հաշվեհարդար տեսնելու կոչ էր անում:
«Իմ կողքին նստած էր ամբողջ երկրով մեկ հայտնի ռեժիսոր, ես նրան խնդրեցի ելույթ ունենալ և կանգնեցնել այս անհեթեթությունը: Արվեստի վաստակավոր գործիչը պատասխանեց, որ այն աստիճան լավ չի տիրապետում ադրբեջաներենին, որ կարողանա արժանի հակահարված տալ ելույթ ունեցողին, ռեժիսորի ձեռքերը դողում էին: Այդ ժամանակ ես խոսք վերցրեցի և ելույթ ունեցա ռուսերենով, անկեղծորեն ասելով , ով է հանդիսանում նախորդ բանախոսը: Իհարկե իմ ելույթը ընդհատեցին, իհարկե իմ վրա բռունցքներով հարձակվեցին, բայց հարձակվողները քաջ են լինում դիմադրության բացակայության ժամանակ»,- ասաց Յունուսը:
Ի պատասխան այն հարցի, թե ինչու է Ադրբեջանի ղեկավարությունը խոչընդոտում «ժողովրդական դիվանագիտության» զարգացմանը, իրավապաշտպանը նշեց, որ ավտորիտար ռեժիմին միշտ պետք է արտաքին թշնամի, որի դեմ քարոզչություն է իրականացվում, որի հետ կապերի մեջ էլ մեղադրում են հակառակորդներին:
«Մենք փաստորեն վերադարձել ենք 30-ական թթ. սովետական անցյալ: «Ով մեզ հետ չէ, նա մեր դեմ է»: Հենց դա է այսօրվա կարգախոսը: Ռեժիմի խնդիրն է վերահսկել բոլորին և ամեն ինչ, այդ թվում «ժողովրդական դիվանագիտությունը»:
Ըստ նրա, երբ հանրային դիվանագիտությունը սահմանափակվում է Եվրասիայի լայն տարածքներում Հայաստանի և Ադրբեջանի քաղաքացիական հասարակության ակտիվիստների վերահսկվող հանդիպումներով, որոնք անցնում են բռնցքամարտերի նման, դա դեռ համբերում են: Իսկ երբ հայերի և ադրբեջանցիների համատեղ աշխատանքը դառնում է անվերահսկելի Ադրբեջանի իշխանությունների համար, ապա անմիջապես վառվում է «կարմիր լույսը»:
Հիշեցնենք, որ ապրիլի 28-ին երեկոյան Բաքվի օդանավակայանում Դոհա մեկնելիս կալանավորել էին հայտնի իրավապաշտպան Լեյլա Յունուսը և նրա ամուսին Արիֆ Յունուսը: Նրանք մտադրվել էին մեկնել Փարիզ և այնուհետև Բրյուսել՝ ԵՄ-ի հրավերով միջազգային միջոցառմանը մասնակցելու համար: Լ. Յունուսը տեղափոխվել է հարցաքննության Ադրբեջանի գլխավոր դատախազության ծանր հանցագործությունների գծով քննչական վարչություն, որտեղ նա անցկացրել է 9 ժամ: Արիֆ Յունուսը հոսպիտալացվել է նախաինսուլտային վիճակում: Ինչպես նաև Յունուսի բնակարանում ու աշխատավայրում խուզարկություններ են կատարվել:
Նշենք, որ Եվրոպայի խորհրդի մարդու իրավունքների հանձնակատար Նիլս Մույժնիեքսը, ԵՄ-ը, ԱՄՆ-ի պետդեպարտամենտը, Ադրբեջանում ԱՄՆ դեսպանատունը և իրավապաշտպան կազմակերպությունները, ինչպիսիք են Նորվեգիայի Հելսինկյան կոմիտեն, Human Rights Watch-ը, Freedom House-ը, իրավապաշտպան կազմակերպությունների Միջազգային ֆեդերացիան (FIDH), քննադատեցին Բաքվում իրավապաշտպան Լեյլա Յունուսի կալանավորումը:
Ավելի վաղ Բաքվում ձերբակալվել էր «Զերկալո» թերթի լրագրող Ռաուֆ Միրկադիրովը, ում մեղադրում էին Հայաստանի օգտին լրտեսության մեջ:
Նախորդող հրապարակումներ`
Ադրբեջանի ոստիկանապետ. Ես հայ կնոջ կյանքին վերջ կտամ, արյունն էլ կխմեմ
Ոստիկանը հետևել է, թե ինչպես է Լեյլա Յունուսը զուգարանում հոգացել բնական կարիքները (տեսանյութ)
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
