Ձեր վստահելի աղբյուրը

«Ի՞նչ է նշանակում պարտադիր, բայց ոչ պարտադրված: Դա նշանակում է, որ մենք անելու ենք ամեն ինչ, որ մեր քաղաքացիների մոտ սոցիալական լուրջ խնդիր չառաջանա: Պարտադիր կուտակային կենսաթոշակային բարեփոխումը սոցիալական ոլորտի բարեփոխում է, ոչ թե ֆինանսական»,-ԱԺ նիստում պատասխանելով ՀՅԴ-ական պատգամավոր Աղվան Վարդանյանի հարցերին՝ նոր կառավարության համար կենսաթոշակային բարեփոխման նպատակը ո՞րն է, սա սոցիալակա՞ն ոլորտի բարեփոխում է, թե՞ ֆինանսական, ասաց վարչապետ Հովիկ Աբրահամյանը:

Կառավարության ղեկավարի խոսքով, իրենց նպատակն է ունենալ այնպիսի օրենք, որը կբխի բոլորի շահերից և հաշվի կառնվի քաղաքական ուժերի ու քաղաքացիական նախաձեռնությունների առաջարկները. «Դա շատ կարևոր բարեփոխում է, թե ինչ ձևով կանցկացվի, մի քիչ համբերենք, հունիս ամսին կբերենք այն Ազգային ժողով»:

Պատասխանելով Ա. Վարդանյանի մեկ այլ հարցի՝ արդյոք նոր կառավարությունը մտադիր չէ՞ իրական հաշվառում կատարել, թե քանի Արցախյան ազատամարտի մասնակից կա, որպեսզի պետության կողմից տրվող սուղ միջոցները նպատակին ծառայի, քանի որ, օրինակ՝ Շուշիի ազատագրմանը մասնակցել է մոտ հազար մարդ, բայց չորս հազար մարդ մեդալ է ստացել Շուշիի ազատագրման համար, վարչապետ Հ. Աբրահամյանն ասաց. «Արցախյան ազատամարտի մասնակիցների հաշվառման մասով Ձեզ հետ համաձայն եմ: Պետք է ունենանք հստակ հաշվառում: Հաշվի կառնենք Ձեր առաջարկը»:

Նախորդող հրապարակում՝

Վարչապետի պատասխանը` Նաիրա Զոհրաբյանին. «Այնպես ենք անելու, որ լինի պարտադիր, բայց ոչ պարտադրված» (տեսանյութ)