Ձեր վստահելի աղբյուրը

Հայաստանի ազգային հավաքականի և Մոսկվայի «Դինամոյի» դարպասապահ Ռոման Բերեզովսկին ընտրանու կազմում շարունակում է նախապատրաստվել ընկերական հանդիպումներին: «Sport-Express»-ի թղթակցի հետ զրույցում Բերեզովսկին խոսել է այդ դիմակայությունների, նոր գլխավոր մարզիչ Բեռնար Շալանդի, «Դինամոյի» և այլ հարցերի շուրջ:

- «Դինամոյում» մրցելույթներդ շարունակելու հետ կապված պարզություն դեռ կա՞, քանի որ հունիսի վերջին ավարտվում է պայմանագրիդ ժամկետը:
- Երևի, հավաքականի վերադառնալուց հետո ամեն ինչ պարզ կդառնա: Կարծում եմ` հունիսի կեսերին կիմանանք` կշարունակե՞մ հանդես գալ «Դինամոյում», թե՞ ոչ:

- Ի՞նչ տպավորություններ ունես նոր գլխավոր մարզիչ Բեռնար Շալանդից:
- Այս մի քանի օրվա համատեղ աշխատանքից հետո երևում է, որ շվեյցարացին մեծ ոգևորությամբ է կատարում իր պարտականությունները: Շատ կարևոր է Շալանդի վստահությունը, որ մենք կարող ենք Եվրոպայի 2016 թ. առաջնության ընտրական փուլում հավակնություններ ունենալ: Նա մեզ հետ տեսական շատ պարապմունքներ է անցկացնում: Մինչև մարզման սկիզբը հասկանում ենք, թե պարապմունքի վերջում մեզանից ինչ է պահանջվում:

- Նոր մարզիչը բազմաթիվ նոր ֆուտբոլիստներ է հրավիրել հավաքական: Դա նշանակում է, որ փոփոխություննե՞ր կլինեն:
- Հիմա վաղ է այդ մասին խոսելը: Ընկերական խաղերից հետո պարզ կդառնա, թե ինչ կլինի: Մարզիչն էլ, իր հերթին, համապատասխան եզրակացություններ կանի:

- Որքա՞ն մեծ նշանակություն եք տալիս առաջիկա ընկերական խաղերին:
- Բնականավար, կենտրոնական կլինի Գերմանիայի հավաքականի հետ հանդիպումը: Ամենայն լրջությամբ կմոտենանք այդ խաղին: Դա մեծ փորձություն կլինի մեզ համար: Լավ է, որ ընկերական խաղերը, այսպես ասած, կլինեն մրցակիցների ուժի աճմամբ: Սկսում ենք ԱՄԷ-ից, հետո կխաղանք Ալժիրի ընտրանու հետ, իսկ վերջում` գերմանացիների: Ընդհանուր առմամբ` բոլոր խաղերն էլ մեզ համար կարևոր են:

- Հայաստանի հավաքականը գերմանացիների հետ խաղալու փորձ ունի, բայց դրանք այնքան էլ հաջող ավարտ չեն ունեցել (Աշխարհի առաջնություն, 1998 թ., ընտրական փուլ, պարտություն 1:5 և 0:4 հաշվով):
- (Ժպտում է): Դա անցյալում է: Պետք չէ հիմա այդ ամենին մեծ նշանակություն տալ: Հիմա բոլորովին այլ դեմքեր են, այլ թիմեր:

- Նշանակում է, երկրպագուները պետք է մեծ ոգևորությա՞մբ պատրաստվեն աշխարհի 2014 թ. առաջնության հաղթողի գլխավոր ֆավորիտներից մեկի հետ խաղին:
- Չնայած հանդիպումը կրում է ընկերական բնույթ, նման խաղերն առանձնահատուկ նշանակություն ունեն մեզ համար և լավ կլինի, որ հենց Գերմանիայի հավաքականի հետ խաղում մեզ լավ դրսևորենք: