Ձեր վստահելի աղբյուրը

«Չորս քաղաքական ուժերը իրենց քվեարկությամբ իրատեսական էին, խստապահանջ ու ականջալուր, որովհետև կառավարության ներկայացրած ծրագիրը որևէ մեխանիզմ չի ստեղծում ու հնարավորություն չի ընձեռում, որ այդ ծրագիրը իրականացվի»,- Ազգային Ժողովում ճեպազրույցների ժամանակ հայտարարեց «Ժառանգություն» խմբակցության ղեկավար Ռուբեն Հակոբյանը` անդրադառնալով կառավարության ներկայացրած ծրագրի քվեարկությանը:

Նրա խոսքով, ինքն արդեն հայտարարել է, որ եթե կառավարությունը ԱԺ բերեր որևէ հույս ներշնչող օրենքի նախագիծ, որով գոնե ընդդիմությանը ինչ-որ լծակներ կտրվեին, թերևս այդ դեպքում իրենք կմտածեին, որ ինչ-որ բան փոխվել է ու կառավարությունն էլ դաս է քաղել: Կամ բերեին Ընտրական օրենսգրքում փոփոխությունների ինչ-որ նախագիծ, այդ դեպքում ևս կարելի էր և ընդդիմությունը կհասկանար, որ ինչ-որ բան է կատարվելու. «Բայց առանց դրա իրական չի: Այս առումով շատ իրատեսական մոտեցում էր, որ չորս քաղաքական ուժերը համաձայնեցված չմասնակցեցին քվեարկության, և մենք խստապահանջ ենք լինելու ու հետևելու ենք կառավարության գործունեությանը»:

Ռ.Հակոբյանը ասաց նաև, որ իրենց քվեարկությամբ իրենք ականջալուր էին հասարակության ձայնին, քանի որ հասարակության մեծամասնությունը դժգոհ է թե’ կառավարությունից, թե’ իր ծրագրից. «Շատ կարճ ժամանակ կպահանջվի, որ վարչապետը, իշխանությունները տեսնեն, որ եղած համակարգով որևէ ծրագիր իրականացնելը մեղմ ասած չիմացություն է»:

Ինչ վերաբերում է այն հարցին, թե որտեղից պատգամավորի մոտ այն վստահությունը, որը նա նախօրեին հայտնել էր, թե վարչապետ Հովիկ Աբրահամյանը հրաժարական է տալու, «Ժառանգություն» խմբակցության ղեկավարն ասաց, որ քաղաքական տրամաբանությունից ելնելով է դա ասել` այն համակարգը, այն արահետը, որով գնում են, ոչ մի տեղ չտանող ճանապարհ է.
«Երբ վարչապետը եկավ քառյակի նիստին, ես դա ողջունեցի և խոսք կար, որ պարտադիրը կվերանա: Բայց որևէ փոփոխություն ակնկալել պետք չէ ինչպես տեսանք»:

Ռուբեն Հակոբյանը հիշեցրեց «մի ծաղկով գարուն չի գա» արտահայտությունը և դա կապեց վարչապետի և ներկա իրավիճակի հետ. «Այս համակարգում եթե ես լինեմ վարչապետ կամ նախարար, ապա գուցե ավելի վատ լինի: Խոսքը անձերի մասին չէ և կապ չունի` այս համակարգում Տիգրան Սարգսյանն է, Հովիկ Աբրահամյանը, թե մյուսը, եթե այս համակարգում է գործելու, ապա խնդիր է»:

Պատգամավորը նշեց նաև, որ իշխանությունն իր ներսում շատ ավելի խնդիրներ ունի, քան ընդդիմությունը և երեկվա միասնական չքվեարկելը պատասխանն էր այն նեկրոլոգների, որ որոշ լրատվամիջոցներ փորձում են հրամցնել հանրությանը: