«ԵԽԽՎ-ն շատ ավելի լուրջ պատժամիջոցներ պետք է կիրառի Ադրբեջանի հանդեպ, քան այդ բոյկոտն է»
«ԵԽԽՎ-ն շատ ավելի լուրջ պատժամիջոցներ պետք է կիրառեր և պետք կիրառի Ադրբեջանի հանդեպ, քան ընդամենը բոյկոտել Բաքվում ԵԽԽՎ հանձնաժողովների, կոմիտեների և ենթահանձնաժողովների նիստեր անցկացնելը: Չեմ կարծում, թե դա այդպես լուրջ պատժամիջոց է` հաշվի առնելով ԵԽ անդամ Ադրբեջանում տիրող իրավիճակը»,- Panorama.am-ի հետ զրույցում ասաց ԲՀԿ խմբակցության քարտուղար, ԵԽԽՎ-ում հայկական պատվիրակության անդամ Նաիրա Զոհրաբյանը` մեկնաբանելով վեհաժողովի որոշումը առաջիկա երկու տարիների ընթացքում Ադրբեջանում վեհաժողովների ոչ մի հանդիպում չանցկացնել:
Հիշեցնենք, նման որոշման պատճառ է դարձել այն, որ ադրբեջանական իշխանությունները վերջին պահին չեղյալ էին համարել մայիսի 22-23-ը Բաքվում ԵԽԽՎ Բյուրոյի ու Մշտական խորհրդի նիստներին մասնակցելու նպատակով ԵԽԽՎ փոխնախագահ, Ֆրանսիայի պատվիրակության ղեկավար Ռենե Ռուքեին արդեն իսկ տրամադրված մուտքի վիզան, քանի որ Ռուքեն Լեռնային Ղարաբաղ այցելած ֆրանսիացի օրենսդիրներից է: Նա նաև ֆրանս-ղարաբաղյան բարեկամության խմբի անդամ է և ԼՂ այցից հետո Ադրբեջանը նրան persona non grata է հայտարարել:
Ն.Զոհրաբյանի խոսքով, եթե Բելառուսի հանդեպ եվրոպական հանրությունն ու կառույցները կիրառում են լրջագույն պատժամիջոցներ, ապա հարց է առաջանում` ինչո՞ւ նույն այդ պատժամիջոցները չեն կիրառվում Ադրբեջանի հանդեպ:
«Երևի թե միայն այն պատճառով, որ Ադրբեջանը նավթ ունի, իսկ Բելառուսը` ոչ: Այստեղ է, որ մենք անընդհատ բախվում ենք երկակի ստանդարտների հետ»,- նշեց պատգամավորը:
Հարցին, թե ինչպես է վերաբերում ԵԽԽՎ-ում ադրբեջանական պատվիրակության ղեկավար Սամեդ Սեիդովի շանտաժի ոգով արված հայտարարությանը, թե ԵԽԽՎ-ն իր այս որոշմամբ սատարում է հայկական լոբբիին և առաջարկին` ստեղծեծ ԵԽԽՎ-ում «օկուպացված տարածքների» հարցով զբաղվող ենթահանձնաժողով, Նաիրա Զոհրաբյանն ասաց, որ սա առաջին անգամ չէ, որ լսելի է Սեիդովի հոխորտանքը և առաջին անգամ չէ, որ Ադրբեջանը իր հայտնի լոբիստներով փորձել է Ադրբեջանի հետաքրքրությունների կոնտեքստում գտնվող հարցեր ներառել ԵԽ օրակարգ: Եվ բերեց օրինակ. «Ցավոք սրտի Սարսանգի ջրամբարի հետ կապված նրանց հաջողվեց սոցիալական հանձնաժողովում նախապատրաստել բանաձև և հունիսյան նստաշրջանում թե ես և վստահ եմ մեր պատվիրակության մյուս անդամները անպայմանորեն դրան կանդրադառնանք»:
Շարունակելով ԵԽԽՎ հունիսյան նստաշրջանի թեման հայկական պատվիրակության անդամը նաև նշեց, որ ոչ մի րոպե չի կասկածում, որ Ադրբեջանի նախագահ Ալիևը, ով ելույթ է ունենալու այդ նստաշրջանում, անպայմանորեն շանտաժի է ենթարկելու ԵԽ-ին:
«Քանիցս ականատես եմ եղել Ալիևի ելույթներին և կարող եմ ասել, որ արդեն իսկ նրա որոշակի հայտարարություններ, որ ԵԽ-ն պետք է դադարեցնի Հայաստանի պատվիրակության լիազորությունների մանդատը և այլն արդեն իսկ ենթադրել են տալիս, որ այս նստաշրջանում Ադրբեջանի առաջին դեմքերը և մասնավորապես Ալիևը անպայմանորեն ԵԽ հետ կխոսեն շանտաժի լեզվով»,- նշեց նա ու հույս հայտնեց, որ այդ շանտաժին ի պատասխան ԵԽԽՎ-ն կբավարարվի ոչ թե երկու տարով բոյկոտով, այլ ավելի լուրջ պատժամիջոցներ կկիրառի, որպես մի երկիր, որտեղ չեն հարգում եվրոպական արժեքները և որտեղ կան քաղաքական հայացքների համար բանտարկված տասնյակից ավելի լրագրողներ, ընդդիմության ակտիվիստներ, քաղաքացիական հասարակության ներկայացուցիչներ:
«Եվ որտեղ ընդդիմություն որպես այդպիսին գոյություն չունի»,- հավելեց մեր զրուցակիցը:
Նշենք, որ ԵԽԽՎ ամառային նստաշրջանը մեկնարկում է հունիսի 23-ին:
Նախորդող հրապարակում`
ԵԽԽՎ-ն պատժում է Ադրբեջանին
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
