Ձեր վստահելի աղբյուրը

2013թ-ի պետական բյուջեի քննարկումները խորհրդարանում հասան եվրաինտեգրման ոլորտին: Եվրանտեգրման հարցերի մշտական հանձնաժողովի նախագահ Նաիրա Զոհրաբյանը, դիմելով արտգործնախարարության ներկայացուցիչ Կարեն Նազարյանին, հետաքրքրվեց` ո՞վ և ե՞րբ է ներկայացնելու և պաշտպանելու Հայաստանի շահերը` հղում անելով Աստանայում նախագահ Նազարբաևի այսօրվա հայտարարությանը:

«Նազարբաևի այսօրվա հայտարարության մեջ հստակ ասվում է` Եվրասիական տնտեսական միությունը սպասարկում է  երեք պետությունների` Ռուսաստանի, Բելառուսի և Ղազախստանի շահերը: Որտե՞ղ է Հայաստանի շահը, ընդհանրապես մենք շահեր ունենք, դրանք ինչ-որ մեկը ներկայացնելու և պաշտպանելո՞ւ է, որովհետև սա շատ ամբիցիոզ հայտարարություն է, թե այս տարածքը հետապնդում է միայն այդ երեք պետությունների շահերը»,- հետաքրքրվեց Ն.Զոհրաբյանը` նշելով, որ այս հայտարարությունը առավել մտահոգիչ է այն փաստի ֆոնին, որ մինչև հունիսի 15-ը Հայաստանը միանալու է այդ պայմանագրին:

Արտգործնախարարության ներկայացուցիչը սակայն այդպես էլ հստակ պատասխան չտվեց այս հարցի վերաբերյալ` նախ, նշելով, որ առաջին օրն է այդ պաշտոնում և որ ինքը այնքան էլ կոմպետենտ չէ այդ հարցին պատասխանելու համար: Իսկ արտգործնախարար Էդվարդ Նալբանդյանի բացակայությունն էլ հարգելի որակեց, քանի որ նա մեկնել է Աստանա:

Ն.Զոհրաբյանն իր խոսքում ևս մեկ անգամ մտահոգությունն արտահայտեց այն կապակցությամբ, թե խորհրդարանականները իրավունք ունեն իմանալու ինչ է կատարվում և ինչ զարգացումներ են լինելու: Նրա խոսքով` այսօրվա որոշ հայտարարություններ լուրջ մտահոգվելու տեղիք են տալիս, քանի որ պարզ չի, թե Լեռնային Ղարաբաղի ճակատագիրն ինչպիսին է լինելու և որտեղ են լինելու սահմանակետերը Ղարաբաղի հետ:

«Ո՞վ է բացատրելու խորհրդարանին ու ժողովրդին` ի վերջո Լեռնային Ղարաբաղը լինելո՞ւ է այդ տնտեսական տարածքում, թե՞ ոչ»,- նշեց նա:

Նշենք, որ գրեթե ցանկացած հարցի ԱԳՆ ներկայացուցիչը արձագանքում էր միանման` իր աշխատանքային առաջին օրն է, նա կոմպետենտ չէ կամ դեռ չի հասցրել ծանոթանալ: Ի վերջո ներկա պատգամավորները դժգոհություն հայտնեցին, որ ԱԺ կարող էր գալ ավելի կոմպետենտ մեկը, ով գոնե կպատասխաներ այսքան կարևոր հարցերին:
 
Նախորդող հրապարակումներ`

Ստորագրվեց Եվրասիական տնտեսական միության ստեղծման մասին պայմանագիրը

Պուտին. Եվրասիական տնտեսական միությունը կաշխատի համընդհանուր և հասկանալի կանոններով

Սերժ Սարգսյան. «Վստահ եմ, որ 2-3 օրվա ընթացքում կկարողանանք գտնել փոխընդունելի որոշումներ»

Լուկաշենկոն դժգոհություն է հայտնել Եվրասիական տնտեսական միության ստեղծման պայմանագրի նախագծի կապակցությամբ

Նազարբաև. Եվրասիական տնտեսական միության ստեղծման մասին պայմանագրում կա Հայաստանի միանալու մասին կետ