Ձեր վստահելի աղբյուրը

Ավարտական և ընդունեության քննությունները մոտենում են, այս օրերին աշակերտների շրջանում ամենաքննարկվող թեման շտեմարաններն են, դրանցում եղած սխալներն ու թերությունները:

Կրթության ազգային ինստիտուտի փոխտնօրեն Անահիտ Բախշյանը Գնահատման և թեստավորման կենտրոնի տնօրեն Գագիկ Մելիքյանին «Ազատություն» TV-ի ֆեյսբուքյան ասուլիսի ընթացքում հենց դրանց մասին է հարց ուղղել:

«Վերջերս հայտարարեցիք, որ շտեմարանների բովանդակությունը փորձաքննությունը իրականացնում ՝ ԿԱԻ-ին, սակայն փաստն այն է, որ դրանք հրատարակվելուց հետո են գալիս ԿԱԻ փորձաքննության և բնականաբար մասնագետների դիտողությունները մնում են լուսանցքին: Հիմա շտեմարանները փորձաքննության անցե՞լ են, թե՞՝ ոչ»,- հարցրել էր Անահիտ Բախշյանը:

Գնահատման և թեստավորման կենտրոնի տնօրեն Գագիկ Մելիքյանը նախ զարմացավ հարցի վրա, ապա նշեց, որ շտեմարանները անցել են փորձաքննություն ԿԱԻ-ում:

«Հիմա ինձ հարց են ուղղում: Իհարկե անցել են: Կարող է ինքը բացել իրենց ինստիտուտի թղթարարությունները և տեսնել: Ինչ վերաբերում է հարցին, թե գալիս են պատրաստի և փորձագետների կարծիքները մնում են լուսանցքում: Փորձաքննության շտեմարանը ներկայացվում է երկու տիպով՝ պատրաստի և ձեռագիր: Փորձաքննող կազմակերպությունը կարող է մերժել գիրքը, այդ դեպքում այն երաշխավորված չի լինի նախարարության կողմից: Եթե մերժված եղավ, մենք իրավունք չենք ունենա կիրառել միասնական քննությունների դեպքում»,- պատասխանեց ԳԹԿ տնօրենը:

Նա ընդգծեց, որ շտեմարանները պետության կողմից չեն հրատարակվում, այլ հրատարակիչների, անհատների և ԳԹԿ-ն էլ այդ մասով անելիք չունի, ԳԹԿ-ն միայն թեստերի տեխնիկական կողմին կարող է անդրադառնալ:

Անահիտ Բախշյանի մեկ այլ հարց վերաբերում էր ավագ դպրոցներում կրթության ցածր որակին. «2011, 2012, 2013 թ.թ. ԳԹԿ-ի կողմից իրականացրած արտաքին գնահատման արդյունքները վկայում են, որ կրթության որակը մայրենիից 5,1 է, իսկ մաթեմատիկայից՝ 3,8, այսինքն նույնիսկ դրական չէ: Այս արդյունքների հրապարակումից հետո ի՞նչ քայլեր է ձեռնարկել ԳԹԿ-ն իր կառավարման խորհրդի նախագահ, ԿԳ նախարարի հանրակրթության մասով տեղակալ պարոն Մկրտչյանի հետ, ավագ դպրոցներում կրթության որակը առնվազն միջին մակարդակի հասցնելու համար, ավագ դպրոց մտնելո՞ւ է գնահատման կրեդիտային համակարգը, ե՞րբ»:

Գագիկ Մելիքյանը նախ նկատեց, որ կրթության որակի հետ կապված խնդիրը բարդ է և բազմակողմանի: Նա նշեց, որ ԳԹԿ-ն կրթության որակի ապահովման առումով որևէ գործառույթ չունի:

«Երեխան սովորում է դպրոցում, ԳԹԿ-ն ստեղծվել է որոշակի էտապներում օբյեկտիվ գնահատում կատարելու համար: Որակի հետ կապված բոլոր խնդիրներն առնչվում են ամբողջ ուսումնառության ընթացքում այն կառույցներին, որոնք կազմակերպում և իրականցնում են կրթություն: Կրթության լավ որակ կունենանք, եթե ունենանք լավ, որակյալ մասնագետներ: Հիմա ես հակադարձ հարց եմ տալիս՝ ի՞նչ է արել ԿԱԻ-ն, որ ունենանք լավ մասնագետներ, լավ դասագրքեր, ինչը իստիտուտի գործառույթն է: Ակցենտը տիկին Բախշյանը պիտի այլ տեղ փնտրի»,- ասաց նա:

Գագիկ Մելիքյանը հավելեց, որ ավագ դպրոցներում կրեդիտային համարկարգը դեռ մշակված չէ և չի կարող այս փուլում ներդրվել: