Ձեր վստահելի աղբյուրը

Եվրասիական բարձրագույն տնտեսական խորհրդի ընդլայնված նիստում Ղազախստանի նախագահ Նուրսուլթան Նազարբաևի հայտարարության, ինչպես նաև Եվրասիական տնտեսական Միությանը Հայաստանի անդամակցության վերաբերյալ panorama.am-ը զրուցեց ՀՀ Ազգային ժողովի ֆինանսաբյուջետային հարցերի մշտական հանձնաժողովի նախագահ Գագիկ Մինասյանի հետ:

-Պարոն Մինասյան, ինչպե՞ս կմեկնաբանեք Եվրասիական բարձրագույն տնտեսական խորհրդի ընդլայնված նիստում Ղազախստանի նախագահ Նուրսուլթան Նազարբաևի` Եվրասիական տնտեսական Միությանը անդամակցելու ժամանակ Հայաստանի սահմանների վերաբերյալ դիտարկումը:
-Որպեսզի հստակ պատասխան տրվի Ձեր հարցին, կարծում եմ անհրաժեշտ է անդրադառնալ հինգ ամսվա վաղեմության չափազանց կարևոր մի իրադարձության. 2013 թվականի դեկտեմբերի 24-ին, Մոսկվայում իր հերթական նիստը գումարեց Եվրասիական Տնտեսական բարձրագույն խորհուրդը` անդամ պետությունների ղեկավարների` Պուտինի, Նազարբաևի, Լուկաշենկոյի մակարդակով: Նիստում քննարկվեց Մաքսային միությանը Հայաստանի անդամակցելու ճանապարհային քարտեզի հաստատման հարցը: Քննարկումների ավարտին պարոն Նազարբաևը հայտարարեց, որ ինքը պատրաստ է ստորագրել ՄՄ-ին Հայաստանի անդամակցելու ճանապարհային քարտեզը, բայց հատուկ կարծիքով: Նա ուղղակի ասաց. «Կապված Լեռնային Ղարաբաղի կոնֆլիկտի հետ` Մաքսային Միության սահմանի խնդիրը մնում է բաց, որտե՞ղ այն պետք է անցնի Հայաստանով: Հետևաբար մենք մեր գործընկերների հետ կստորագրենք ճանապարհային քարտեզը, բայց հատուկ կարծիքով»:

Հատկանշական է, որ դեկտեմբերի 24-ին կայացած վեհաժողովի արդյունքում Հայաստանի ՄՄ-ին միանալու ճանապարհային քարտեզի վերաբերյալ փաստաթղթերի մեջ Մաքսային Միության անդամ որևէ պետության ղեկավարի կողմից հատուկ կարծիք չարձանագրվեց:

Արդյունքում պարոն Նազարբաևը իր հայտարարությամբ ցույց տվեց իր առանձնահատուկ դրական վերաբերմունքը ադրբեջանական շահերի պաշտպանության խնդրում: Սակայն, կարծում եմ, որ ավելի կարևոր է այն հանգամանքը, որ ըստ էության փաստվեց կարևորագույն մի իրողություն. Մաքսային Միության անդամ երկրները Հայաստանին ճանապարհային քարտեզի տրամադրման ժամանակ լսեցին, քննարկեցին և չընդունեցին Նազարբաևի կողմից հատուկ կարծիքի առաջարկը:

Ինչ վերաբերում է Աստանայում պարոն Նազարբաևի հայտարարությանը` «ՄԱԿ ի կողմից ընդունած սահմաններով» Հայաստանի Հանրապետության Եվրասիական Տնտեսական միությանը միանալու հարցին , ապա կարծում եմ, որ այն հետապնդում էր նույն նպատակները և կունենա նույն արդյունքը, թե պարոն Նազարբաևի և թե հայկական կողմի համար  ինչ տեղի ունեցավ հինգ ամիս առաջ Մոսկվայում:

Ի դեպ, չափազանց հատկանշական է , որ Նազարբաևը Աստանայում որպես իր առաջարկի հիմնավորում բերեց Իլհամ Ալիևի նամակը և չանդրադարձավ հինգ ամսվա վաղեմության քննարկումներին և դրանց արդյունքներին:

-Այնուամենայնիվ, ինչպիսի՞ն է հայկական կողմի դիրքորումն այն հարցում:
-Բազմիցս, այդ թվում հայկական երկու պետությունների ամենաբարձր պաշտոնատար անձանց կողմից նշվել է, որ ՀՀ-ն և ԼՂՀ-ն կազմում են մեկ միասնական տնտեսական տարածք, և մեր միջև որևէ մաքսային սահման լինել չի կարող: Կարծում եմ այս իրողությունը շատերի համար ընկալելի և ընդունելի է եղել դեռ սեպտեմբերի երեքից առաջ:

-Ձեր կարծիքով, այլ կարևոր շեշտադրումներ հնչեցի՞ն Աստանայի վեհաժողովի ընթացքում
-Կարծում եմ, որ Աստանայի վեհաժողովը արձանագրեց չափազանց կարևոր մի հանգամանք ևս, այդ կարևորագույն վեհաժողովի ընթացքում պարոն Նազարբաևը ըստ Էության արձանագրեց, որ այլևս ոչ միայն առօրյա խոսակցությունների ընթացքում, այլև միջազգային փաստաթղթերում Հայաստան ասելով, ըստ էության կարելի է հասկանալ և´ Հայաստանի Հանրապետություն ու Լեռնային Ղարաբաղի Հանրապետություն միասին, և´ Հայաստանի Հանրապետություն, իր խոսքերով, ՄԱԿ -ի կողմից ընդունված սահմաններով: Վեհաժողովի մյուս մասնակիցները` պարոնայք Պուտինը և Լուկաշենկոն, չառարկեցին այս դիտարկմանը: Կարծում եմ, սա ևս չափազանց կարևոր ձեռքբերում է:

Հարակից հրապարակումներ`

Նազարբաևը միշտ ստանձնում է Ադրբեջանի հովանավորի դերը. Տաճատ Սարգսյան (տեսանյութ)

ՀՀ-ն և Արցախը գտնվում են մեկ միասնական տնտեսական տարածքում. Շարմազանով

Բնական է, որ Ղազախստանը պետք է հօգուտ Ադրբեջանի խոսեր. ԼՂՀ նախագահի մամլո խոսնակ

Հայաստանը չի կարող լինել Ղարաբաղից առանձին. Ն.Զոհրաբյան