Ձեր վստահելի աղբյուրը

Ադրբեջանում մեկամսյա գերությունից հետո Հայաստան վերադարձած Արսեն Խոջոյանի քթից արնահոսությունը կանգ չի առնում, իսկ ոտքերն էլ ահավոր ուռում են, ցավում: Այդ մասին Panorama.am-ի թղթակցի հետ զրույցում տեղեկացրեց նրա ազգականը` Վերին Կարմիր Աղբյուր գյուղի բնակիչ Հեղինե Խոջոյանը, ով հիշեցնենք` գերությունից վերադարձած ու բոլորովին վերջերս մահացած Մամիկոն Խոջոյանի դուստրն է:

«Իրանց տուն էի գնացել, ըրեխեն իրան ծանր էր զգում, ցավեր ունի շատ: Մաման ասում ա, թե քթի արինը չի կտրվում, ոտները ցավում ա», -փոխանցեց տիկին Հեղինեն:

Նրա խոսքով, Խոջոյանների բազմանդամ ընտանիքը սոցիալապես ծանր վիճակում է ապրում, վարկեր էլ ունեն, չեն կարողանում վճարել:

Երեկ Ազգային ժողովում լրագրողների հետ զրույցում առողջապահության նախարարը հայտարարել էր, որ իրենք կօգնեն Արսեն Խոջոյանին անվճար բուժվել, ուղղակի պետք է Խոջոյաններն իրենք դիմեն նախարարություն: Այս կապակցությամբ տիկին Հեղինեն ասաց, որ Արսեն Խոջոյանի ծնողները շատ կուզեն, որ դիմեն բժշկի ու անվճար բուժում ստանան:

«Մերն ասում ա, որ ուզում են ըրեխեն բուժվի, բայց ոնց` չգիտեն», ասաց տիկին Հեղինեն:

Արսեն Խոջոյանը, նրա խոսքով, ինքնամփոփ է դարձել ու չի արտահայտվում, թե ինչ է կատարվել իր հետ Ադրբեջանում:

«Երբ Մամիկոն պապիի դագաղը դրված էր, Արսենն էկավ, որ հրաժեշտ տա, մոտիկացավ պապայի դագաղին ու ասեց` Մամիկոն պապի քեզանից հետո հերթն իմնա: Ասեցի Արսեն ջան, ոնց ես սենց բաներ ասում, ոնց թե հերթն իմն ա, չասեց ոչ մի բան, թողեց գնաց»,- պատմեց մեր զրուցակիցը:

Հարազատներն այս խոսքից հետո հասկացել են, որ նրա հետ շատ դաժան են վարվել Ադրբեջանում:

Նկատենք, որ առողջապահության նախարար Արմեն Մուրադյանը նաև հայտարարել էր, որ Արսեն Խոջոյանը գտնվում է բժիշկների մշտական ուշադրության կենտրոնում:

Հարազատները ինչպես Մամիկոն Խոջոյանի, այնպես էլ Արսեն Խոջոյանի պարագայում կասկածներ ունեն, որ երիտասարդին դիզելային վառելիք են ներարկել, ինչի հետևանքով Արսենն իրեն օր օրի վատ է զգում:

Հարակից հրապարակում`

Գերությունից վերադարձած Արսեն Խոջոյանը գտնվում է առողջապահության նախարարի վերահսկողության տակ