Ձեր վստահելի աղբյուրը

Կարեն Դեմիրճյանի անվան մարզահամերգային համալիրը ԴԱՀԿ-ն այսօր կրկին աճուրդի է դրել. այս անգամ այն վաճառվում է 10 տոկոս ցածր գնով: Համալիրն արդեն երկրորդ անգամ աճուրդի է հանվել 17 մլրդ 415 մլն դրամով: Աճուրդը կշարունակվի մինչև հունիսի 12-ը:

Կից տեղեկատվության մեջ նշվում է, որ այն գրավի առարկա է. «ՀՀ կառավարության 2004 թվականի հոկտեմբերի 7-ի N 1616-Ն որոշման համաձայն Մարզահամերգային համալիրը հանդիսանում է պատմության և մշակույթի անշարժ հուշարձան, որի սեփականատիրոջ (գնորդի) համար գործում են «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենքով, ՀՀ կառավարության որոշումներով նախատեսված պարտականությունները»:

Նշենք, որ համալիրն աճուրդի էր հանվել19 350 000 000.0 դրամ մեկնարկային գնով, տասը օրերի ընթացքում որևէ առաջարկ չէր ներկայացվել:

Panorama.am-ի հետ զրույցում փաստաբան Սարգիս Ցականյանն ավելի վաղ ասել էր, որ ըստ օրենքի` աճուրդի չկայանալու դեպքում դրա ավարտից հետո երրորդ օրը կայանում է կրկնակի հարկադիր էլեկտրոնային աճուրդ: Եվ հաջորդ աճուրդի ժամանակ լոտի գինը պակասեցվում է 10 տոկոսով:

«Երկրորդ և յուրաքանչյուր հերթական աճուրդից հետո լոտը չվաճառվելու դեպքում պահանջատերը (տվյալ դեպքում կառավարությունը- ԽՄԲ.) աճուրդի ավարտից հետո` երկու աշխատանքային օրվա ընթացքում, իրավունք ունի պահանջի դիմաց այն ընդունել այդ աճուրդի մեկնարկային գնով: ՀՀ անունից հանդես եկող պետական մարմիններն իրավունք ունեն պահանջի դիմաց ընդունելու լոտը, եթե նրանք ունեն նման լիազորություն»,- նշել էր փաստաբանը:

Հիշեցնենք, որ Panorama.am-ի` աճուրդի մասին հրապարակումից անմիջապես հետո «Կ. Դեմիրճյանի անվան մարզահամերգային համալիր» ՓԲԸ-ի հասարակության հետ կապերի և լրատվության բաժինը հանդես եկավ հայտարարությամբ, որում նշում էր, որ մարզահամերգային համալիրի հայտարարված էլեկտրոնային աճուրդը անօրինական է և իրականացվում է Հայաստանյան օրենսդրության խախտումներով: Արձագանքել էր նաև ԴԱՀԿ-ը:

Նախորդող հրապարակումներ`

Մարզահամերգային համալիրի վաճառքը չի մտահոգում Մշակույթի նախարարությանը

Համալիրի աճուրդն ավարտվեց, բայց...

Մարզահամերգային համալիրը հանել են աճուրդի

Համալիրի հայտարարված էլեկտրոնային աճուրդն անօրինական է. Արձագանքում է Մարզահամերգային համալիրը

ԴԱՀԿ-ն արձագանքել է Մարզահամերգային համալիրի աճուրդի մասին հրապարակումներին