Ձեր վստահելի աղբյուրը

«Ադրբեջանի ղեկավարներն իշխանությունը չկորցնելու համար պետք է պատմությունից դասեր քաղեն»,-այդ մասին իրանական «Ղաֆղազ.իռ» կայքի հաղորդմամբ՝ հայտարարել է Ասթարայի հոգևոր առաջնորդ (իմամ ջոմե) հոջաթ օլ-էսլամ Քազեմ Հաֆեզ Նիան:

Իրանցի բարձրաստիճան հոգևորականը, «Ղաֆղազնյուզ» կայքին տված հարցազրույցում, անդրադառնալով Ադրբեջանում կրոնական գործիչների նկատմամբ իրականացվող բռնաճնշումներին, մասնավորապես նշել է. «Ադրբեջանի իշխանությունները պետք է պատմությունից դասեր քաղեն և ազատազրկված կրոնական գործիչներին ազատ արձակեն: Իրանում Ռեզա շահը ևս դեմ էր հեջաբին, արդյունքում՝ կորցրեց իշխանությունը»:

Շարունակելով խոսքը՝ Ասթարայի իմամ ջոմեն հավելել է. «Եթե Ադրբեջանի իշխանությունները շարունակեն գործել կրոնական գործիչների դեմ, ապա Իրանի շահի պես կկորցնեն իրենց իշխանությունը»:

Իրանական «Արաննյուզ.իռ» կայքն էլ հաղորդում է, որ Թավրիզի «Սեթարխան» համալիրում Ադրբեջանում ազատազրկված կրոնական գործիչներին նվիրված հավաք է տեղի ունեցել, որի ընթացքում Իրանի Արևմտյան Ատրպատական նահանգի (Արևմտյան Ազարբայջան) Մարդու իսլամական իրավունքների կոմիտեի քարտուղար Վահիդ Քազեմ Զադեն հայտարարել, որ իր զորակցությունն ու աջակցությունն է հայտնում ադրբեջանցի բանտարկյալներին:

Հիշեցնենք, որ նախօրեին Իրանի Արդաբիլ նահանգի «Շեյխ Սաֆաէդդին» համալիրում Ադրբեջանում ձերբակալված իսլամական գործիչներին նվիրված ցուցահանդես էր կազմակերպվել:

Նախորդող հրապարակում՝

Ադրբեջանում ձերբակալված իսլամական գործիչներին նվիրված ցուցահանդես՝ Իրանում