Ձեր վստահելի աղբյուրը

Ադրբեջանում մեկամսյա գերությունից վերադարձված Արսեն Խոջոյանի ընտանիքը Վերին Կարմիր Աղբյուր գյուղում ծայրահեղ ծանր վիճակում է հայտնվել. մի կողմից տարբեր վարկային կազմակերպություններից գումարներ վճարելու մասին պարբերաբար ստացվող նամակ-հիշեցումները, մյուս կողմից էլ յոթ երեխաներին կերակրելու անհրաժեշտությունը ծանր վիճակի առաջ են կանգնեցրել ծնողներին:

Արսենի հայրը հաշմանդամ է. զորամասերից մեկում տրակտորով աշխատելիս արկի վրա պայթել է, այժմ առողջական լուրջ խնդիրներ ունի, բայց հաշմանդամության թոշակ չի ստանում:

«Չգիտենք` ոնց դասավորենք»,- մեզ հետ զրույցում ասաց մայրը` Սվետլանա Խոջոյանը:

Խոջոյանների 7 երեխաներից չորսն անչափահաս են, Արսենը ավագն է, երկրորդ երեխան պայմանագրային զինծառայող է, բայց «չեն թողում պոստեր բարձրանա, փող համարյա չի ստանում», իսկ մյուս տղան հերթագրված է բանակ գնալու համար, սակայն առողջական որոշ խնդիրների պատճառով դեռ չի զորակոչվել:

«Վարկերը խեղդում են: Տունը քամին վերացրեց, շինարարական վարկ վերցրինք, ընկանք վարկերի տակ, հիմա մի աշխարհ վարկ ունենք` էլ կամուրջ, էլ նուռքարտ, էլ արեգակ: Ամեն անգամ նամակներ ենք ստանում, որ տոկոսները տանք, բայց չենք կարում լի»,- մեզ հետ զրույցում անօգնական վիճակը ներկայացրեց տիկին Սվետան:

Ապրուստի միակ միջոցը իր աշխատավարձն է. «Մեր ապրելու միջոցները որ տեսնես, լացդ կգա, աղջիկ ջան: Լավ չի էլի, վատ վիճակում ենք ապրում: Մեր գյուղապետի միջոցով մեր մշակույթի տանը տեխնիկակական աշխատող եմ, աշխատում եմ, 22 հազար դրամ եմ ստանում: Բայց դրանով ինչքա՞ն ու ո՞նց ապրես»:

Բազմազավակ մայրն ասաց, որ միայն վերջերս են կարողացել այնպես անել, որ նպաստ ստանան. «Նպաստն էլ վարչապետի շնորհիվ կարգավորվում ա, շուտով կստանանք, ինքնա հրաման տվել»:

Վարկերի հետ միասին ընտանիքին ծանր փաստի առաջ կանգնեցրեց Արսենի գերեվարությունը, որի արդյունքում նրա մոտ առաջացած առողջական խնդիրները վերացնելու համար ընտանիքը ստիպված է եղել վաճառել նույնիսկ «վերջին կովը»:

«Արսենի բուժման ու դեղորայքի համար մուծումներ ա արել Լարիսա Ալավերդյանի կազմակերպությունը (նկատի ունի «Ընդդեմ իրավական կամայականությունների» ՀԿ-ն): Մենք էլ փող չունեինք, Երևան գնալ-գալու ու դեղորայքի համար վերջին կովն ենք ծախել, որ կարենանք տակից դուրս գալ», -ասաց տիկին Սվետան:

Առօրյա հոգսերի հետ միասին մորը հանգիստ չի տալիս որդու հոգեկան վիճակը, ասում է դարձել է ինքնամփոփ, չի խոսում, չի պատմում, թե ինչ է եղել գերության ժամանակ: «Անընդհատ շփոթված ա ու ոչ մի բան չեմ ուզում հարցնեմ: Իրան միշտ հարցնում եմ, թե ինչ-որ նյութեր սրսկել են, ինքն ասում ա` ոչ մի բան ինձ չեն սրսկել: Տեսնում եմ, որ չի խոսում, ես ինքս էլ ոչ մի բան չեմ հարցնում, չեմ ուզում թարմացնեմ», -նշեց Խոջոյանի մայրը:

Վարկերի ծանր բեռը թեթևացնելու համար այժմ Արսենը Տավուշի մարզից հասել է Գեղարքունիքի մարզ` Սևան, անասուններ է պահում: «Սևանում ա աշխատում, հնար չունենք, պետք ա գնար, որ աշխատեր, հայվան կա ընդեղ, պահում ա, որ կարենանք վարկեր տանք, եսիմ կարա՞նք», -տարակուսած է հոգսերի տակ կքած կինը:

Այն, որ Արսենի նյարդայիին վիճակը լավ չէ, համոզվել են նաև երեկ նրան հետազոտած բժիշկները: Բժշկական խմբի հետ Արսենին Հրազդան բժշկական կենտրոնում հետազոտած ԱՆ աշխատակազմի բժշկական քաղաքականության վարման վարչության պետ Ծաղիկ Վարդանյանը Panorama.am-ին ասաց, որ Խոջոյանի նյարդային վիճակը լավ չէր, սակայն նրան հանգստացնող դեղորայք է հատկացվել:

«Երկար սթրես է տարել, իսկ սթրեսն այդքան արագ դուրս չի գա, դա թողնում է իր հետքը նրա հոգեկան աշխարհի վրա: Դա դեղորայքով ժամանակի ընթացքում հանարվոր կլինի վերացնել: Արսենը խոստացավ, որ հետևողական կլինի ու պարբերաբար կընդունի դեղորայքը». –փոխանցեց տիկին Վարդանյանը:

Հարցին, թե սարերում անասուններ պահելը չի խանգարի երիտասարդի բուժմանը, տիկին Վարդանյանը պատասխանեց, որ բժիշկների խումբը խորհրդակցության արդյունքում պարզել է, որ նրան հոսպիտալացնելու անհրաժեշտություն չկա: Մյուս անգամ Արսենին բուժզննման կենթարկեն հունիսի 10-ին: