Ձեր վստահելի աղբյուրը

Սիրիայի Հալեպ քաղաքում վերջին օրերին իրավիճակն ավելի է լարվել, գրեթե ամեն օր հաղորդվում է հայ զոհի ու վիրավորի մասին: Հասարակական, քաղաքական գործիչ Սարգիս Հացպանյանի բնորոշմամբ, հայահոծ Հալեպի համայնքը դատարկվում է, Հալեպից հայերին հեռացնելու հստակ նպատակ է իրագործվում:

Այսօր լրագրողների հետ հանդիպմանը նա նկատեց, որ, բարեբախտաբար, ազգային փոքրամասնություններից հայերն ամենաքիչ զոհերը տված համայնքն են, մոտ հարյուր հոգի է զոհվել երեք տարվա ընթացքում:

«Բայց եթե պաշտպանություն չունենք, այնտեղ մնալն անիմաստ է: Այնտեղ մնում են զոհվելու համար, այլ բան չկա: Ապաստանների խնդիր կա: Սիրիայում առանց օրենքների պատերազմ է, սեփական ժողովրդի վրա ռումբ են գցում»,- ասաց նա:

Սարգիս Հացպանյանը նշեց, որ հայերը չեզոք դիրք են գրավում, բայց բնիկ ազգ են, դեռ Սիրիայի պետությունը չկար, իրենք այնտեղ էին:

«Հայերը վախենում են, ասում են՝ եթե իշխանության հետ լինենք, մյուս կողմը հաղթեց, մեր վերջը կբերեն: Միայն քաղաքացիական պարտքը կատարելով են բավարարվում: Այսինքն, եթե զորակոչային տարիքը եկել է, գնում է ծառայության: Դեռ մի քանի տարի առաջ ես կողմ էի, որ հայերը զինված պաշտպանեն իրենց թաղերը, եկեղեցին, տունը: Սա չեղավ: Եթե հիմա արվի, հստակ Ասադի կողմից պիտի արվի: Այդ դեպքում մյուս հատվածը որպես ընդդիմադիր կկանգնի հայերին, իսկ այդ կողմի ձեռքում է գնվում Հալեպի շրջակայքը»,- մանրամասնեց բանախոսը;

Panorama.am-ի հարցին՝ ի՞նչ պիտի անի հայ համայնքը և ի՞նչ պետք է անի Հայաստանը՝ հայերի գոյությունը փրկելու համար, նա պատասխանեց, որ պետք է օր առաջ նրանց տեղափոխել Հայաստան:

«Ցանկացած մարդու համար իր տեսակը շարունակելու միակ հանգրվանը Հայաստանն է, որտեղ հայն է իշխանությունը: Ցանկացած հայի այստեղ տեղափոխմանը երկու ձեռքով կողմ եմ: Ինչքան էլ Հալեպի հայկական համայնք ասենք, այսօր գոյության խնդիր ունենք: Չեմ կարող տանել հայ երեխայի սպանությունը: Ես գտնում եմ, որ Հայաստանի տարածք նրանց տեղափոխումը թիվ մեկ խնդիրն է»,- ասաց նա:

Սարգիս Հացպանյանը հավելեց, որ հայ համայնքը կրկնակի նվազել է, 100 հազարից այսօր 50-ն է մնացել, վաղը դա էլ կկիսվի. «Օր առաջ, ոչ թե օտար երկիր, այլ Հայաստան բերելը պետք է կատարվի»:

Կարդացեք նաև՝

Սարգիս Հացպանյան. Սիրիայում նախքան ընտրություններն ընտրությունն արդեն կատարված էր