Ձեր վստահելի աղբյուրը

Պատվաստումից հետո ջերմության բարձրացումից խուսափելու համար շատ ծնողներ հրաժարվում են պոլիկլինիկաներում արվող անվճար պատվաստումներից: Նրանք երեխաներին պատվաստում են լիցենզավորված մասնավոր կլինիկայում՝ մեկ պատվաստման դիմաց վճարելով մոտ 20-25 հազար դրամ:

«Նաիրի» ԲԿ կենտրոնի բժիշկ Լարիսա Մուշեղովնան Panorama.am-ի հետ զրույցում նշեց, որ իրենց պատվաստանյութը «միանվագ» օգտագործման է՝  նախատեսված մեկ երեխայի համար:

«Պատվաստանյութերը տարբեր են, այսինքն մեր կողմից օգտագործվողն ավելի մաքուր է իր աստիճանով: Բայց ես չեմ կարծում, որ հարցը պատվաստանյութի մեջ է: Ես կարծում եմ՝ խնդիրը պարզապես այդ հարցին մոտենալու մեջ է, ինչքանով է երեխան պատրաստ պատվաստանյութն ընդունելուն, ես միանշանակ չեմ կարող ասել, որ Հայաստանի առողջապահության նախարարությունը այսօր վատ պատվաստանյութ է բերել, ինչի հետևանքով երեխաները խնդիր են ունենում: Իմ կարծիքով, ամենալավ նախաձեռնությունը կարելի է փչացնել»,-ասաց Panorama.am-ի զրուցակիցը:

Լ. Մուշեղովնայի խոսքով, ինքը նախքան պատվաստելը հետազոտում է, անալիզ է վերցնում, որպեսզի պատվաստումից հետո երեխան խնդիր չունենա. «Մեզ համար կարևոր խնդիրն այն է, թե երեխան ինչքանով է պատրաստ, որ իրեն պատվաստեն, և հետո թե տեխնիկապես ինչքանով մաքուր ու ճիշտ է կատարվում, ստերիլությունը պահպանվում»:

Իմունականխարգելման ազգային ծրագրի ղեկավար Գայանե Սահակյանին բարկացրեցին Մուշեղովնայի ասածները. «Շատ հետաքրքիր է, Մուշեղովնան ի՞նչ է ստուգում: Իմունիտետը ոնց կարող ես դու մի անալիզով որոշել, չի կարելի ծնողներին խաբել: Էդ պահին ստուգվում է, որ սուր վիճակ չլինի, եթե չունի խորը ախտաբանական պրոցեսներ օրգանիզմում, դա չարորակ նորագոյացություններն են, պատվաստանյութի որևէ բաղադրիչի նկատմամբ գերզգայունությունը: Չի կարելի մարդ հավաքագրելու համար, պետք է այս ձև ասեմ, կոպիտ եմ ասում, ինչ-որ մասնավոր գործունեություն ծավալելու համար նման հերյուրանք տարածել»:

Ինչ վերաբերում է պատվաստանյութերի բաղադրության տարբերությանը Սահակյանը բացատրեց, որ պոլիկլինիկաներում օգտագործում են հնգավալենտ պատվաստանյութը, որը պայքարում է նաև կապույտ հազի ու հարկապույտ հազի դեմ, պատվաստանյութի բաղադրության մեջ մոտ 25 հակածին կա, իսկ վճարովիի դեպքում օգտագործվող հեքսավալենտ պատվաստանյութի մեջ հինգ հակածին կա: Ինչ վերաբերում է արտադրող երկրին, ապա Սահակյանը պնդում է, որ երկու դեպքում էլ պատվաստանյութը եվրոպական է:

«Այսօր երկիր ներկրվում է միայն բելգիական, բուլղարական, կանադական, ֆրանսիական պատվաստանյութեր»,-ասաց Գ. Սահակյանը, անհեթեթ որակելով խոսակցությունները, թե հանրապետություն են ներկրվում հնդկական անորակ պատվաստանյութեր:

«Եթե մենք հնգավալենտով պատվաստում ենք, երեք դոզա ստացած երեխայի համար ասում ենք, որ 95 տոկոսով պաշտպանված է կապույտ հազ հիվանդությունից, իսկ հեքսավալենտի դեպքում նույն հիվանդության համար պաշտպանողականությունը ցածր է, ընդ որում հարկապույտ հազի պաշտպանողականության մասին խոսք լինել չի կարող»,-ասաց Գ. Սահակյանը, նկատելով, որ դրանով պայմանավորված ջերմային ռեակցիաները տարբեր են լինում:

Այդ դեպքում նախարարությունն ինչո՞ւ չի արգելում հեքսավալենտի կիրառումը հարցին, Սահակյանը պատասխանեց, որ դա սխալ է ու միշտ պետք է այլընտրանք ունենալ:

Ծրագրի ղեկավարը, հաշվի առնելով վերջին տարիներին կապույտ հազով հիվանդացածների աճը, ինչպես նաև այս տարի նույն հիվանդության հետևանքով երեք ամսական երեխայի մահվան դեպքը, խորհուրդ է տալիս երեխաներին պատվաստել հնգավալենտ պատվաստանյութով:

Գ. Սահակյանի խոսքով, կապույտ հազով հիվանդացածների 90 տոկոսը չպատվաստված կամ թերպատվաստված երեխաներն են: Նրա ներկայացրած թվերով, 2011-2012-ին հանրապետությունում գրացվել է կապույտ հազի 3-4 դեպք, իսկ դրանից հետո տարեկան գրանցվում է հիվանդացության մինչև 15 դեպք:

Հնգավալենտ պատվաստում ստանում են երեխաների 95 տոկոսը: Սահակյանն արել է սեփական ուսումնասիրությունը, պարզել, որ անցած տարվա ընթացքում Հայաստան ներկրվել է 150 դեղաչափ պատվաստանյութ, հաշվի առնելով, որ մեկ երեխան ստանում է երեք դեղաչափ, ստացվում է, որ ընդամենը հիսուն երեխայի մասին է խոսքը: Համեմատության համար նա նշեց, որ ԱՆ-ն տարեկան ներկրում է 150 հազար դեղաչափ պատվաստանյութ: