Ձեր վստահելի աղբյուրը

Եվրոպայի Հայ դատի հանձնախումբը (EAFJD) Եվրոպական միությանը կոչ է արել դատապարտել Հալեպի վրա կատարված հարձակումը:

Նամակում, մասնավորապես, ասվում է.  «Սիրիայի քաղաքացիական պատերազմից ի վեր Հալեպի հայ համայնքը, լինելով կառավարական բանակի և ընդդիմադիր ուժերի բախումների թատերաբեմում, շատ է տառապել, ունեցել է մարդկային կորուստներ, վնասներ: Իրավիճակը վատացել է վերջին շրջանում այն վայրերում, որտեղ կառավարության դեմ կռվում են «Ալ-Կաիդայի» հետ առնչություն ունեցող ուժերը:

Կասկած չկա, որ այդ ծայրահեղական ապստամբական ուժերին զինում է Թուրքիան և թույլ է տալիս Սիրիա մտնել իր սահմանից, նրանք չեն կռվում զինված ուժերի դեմ, այլ հարձակվում են խաղաղ բնակչության վրա: Վերջերս նրանք հարձակվեցին հայաբնակ Քեսաբի վրա` մուտք գործելով Թուրքիայից: Վերջին օրերին այդ ուժերը կրկին մտան Թուրքիայից և հարձակվեցին Հալեպի վրա` թիրախ ընտրելով հիմնականում հայաբնակ թաղամասերը և հատկապես Նոր Գյուղը:

Նոր Գյուղի ուղղությամբ անդադար հրթակոծության հետևանքով զոհվել են մարդիկ և զանգվածային ավերվածություններ են եղել: Հայկական եկեղեցիները, դպրոցները, ինստիտուտները, տները և խանութներն ամբողջությամբ կամ մասնակի ավերվել են` կյանքը անտանելի դարձնելով քաղաքի բնակիչների համար: Դրա հետևանքով մարդկանց տարհանում են Լաթաքիա:

Եվրոպայի Հայ դատի հանձնախումբը դատապարտում է Սիրիայի հայ բնակչության դեմ շարունակական հարձակումները: Կասկած չկա, որ «Ալ-Կաիդայի» հետ կապված այս ուժերի աճող հարձակումները հովանավորել են երրորդ պետությունները, հատկապես Թուրքիան:

Մենք կոչ ենք անում Եվրոպական միությանը քայլեր ձեռնարկել գործողությունները կանխելու համար, դատապարել այդ հարձակումները, ճնշումներ գործադրել Թուրքիայի վրա, որպեսզի չզինի ապստամբական խմբավորումներին ու նրանց Սիրիա չուղարկի` հայկական քաղաքների ու գյուղերի վրա հարձակվելու համար:

Մենք բոլոր երկրների կառավարություններին, հատկապես նրանց, որոնք աջակցում են ընդդիմադիր ուժերին, կոչ ենք անում անհապաղ օգտագործել իրենց լծակները` հայկական թաղամասերի վրա հարձակումները դադարեցնելու համար:
Մենք կոչ ենք անում Սիրիայի իշխանությունների շտապ միջոցներ ձեռնարկել չզինված քաղաքացիների անվտանգությունն ապահովելու համար:

Հայ ժողովուրդը, որը տառապել է Թուրքիայի կողմից իրականացրած ցեղասպանության և այլ զանազան իրավիճակների պատճառով, վերապրել է և չի հանդուրժելու Սիրիայում մեր հայրենակիցների դեմ զանգվածային հարձակումները»: