«Լիովին ապահովում է անվտանգությունը». նոր սարքավորում` «Ուռուցքաբանության ազգային կենտրոնում»

Առողջություն 15:27 13/06/2014

Շվեդիայի առևտրի նախարար Էվա Բյորլինգը Հայաստան կատարած այցի շրջանակներում այսօր Ա. Ֆանարջյանի անվան ուռուցքաբանության ազգային կենտրոնում ՀՀ առողջապահության նախարար Արմեն Մուրադյանի հետ մասնակցեց Շվեդիայի կողմից կենտրոնին տրամադրված գծային արագացուցչի շահագործման արարողությանը:

«Ուռուցքաբանության ազգային կենտրոնի» ղեկավար, պրոֆեսոր Հայրապետ Գալստյանը նախարարներին ներկայացնելով նորագույն սարքավորումը, նշեց, որ արդեն իսկ ﬔծ հերթեր են գոյացել, որից խուսափելու համար կենտրոնի բուժանձնակազմը երկուշաբթի օրվանից սկսած երեք հերթափոխով է աշխատելու:

Պրոֆեսոր Հայրապետ Գալստյանը լրագրողների հետ զրույցում նշեց, որ շվեդական «Էրիկսոն» ընկերության արտադրության սարքը համարվում է չարորակ ուռուցքների ժառագայթային բուժման նորագույն սարքավորումներից մեկը:

Նրա խոսքերով` ճառագայթման նոր սարքը Շվեդիայի կառավարության կողմից տրամադրվել է ՄԱԳԱՏԷ-ին, որն էլ անվճար հատկացրել է Հայաստանին: 1,5 մլն եվրո արժողությամբ սարքը, ըստ Հ.Գալստյանի, Հայաստանին տրամադրվել է տեխնիկական համագործակցության շրջանակներում:

Պրոֆեսորը նշեց, որ այն կենտրոնում տեղադրելու համար հատուկ սենյակ է հատկացվել, քանի որ ճառագայթային անվտանգությունը պետք է լիովին ապահովված լինի:

«Այնպիսի նորոգում է արվել, որպեսզի ճառագայթները շենքից դուրս չթափանցեն: Ամեն ինչը ստուգվել է ՄԱԳԱՏԷ-ի փորձագետների կողմից, հետո նոր միայն այն շահագործվել»,- ասաց Հ.Գալստյանը:

Նրա խոսքերով` գծային արագացուցիչը գոյություն ունեցող սարքերից տարբերվում է նրանով, որ ճառագայթների խուրցը նպատակային ուղղվում է հիվանդ օջախի վրա, որի արդյունքում շրջակա հյուսվածքներն ամենևին չեն վնասվում:

«Այսպիսով` արդյունավետությունն է բարձրանում. հազվադեպ են եղել դեպքեր, երբ գծային արագացուցիչով բուժումից հետո ստիպված լինեն այս կամ այն պատճառով ընդհատել հիվանդի բուժումը: Այն լիովին ապահովում է անվտանգությունը»,- ընդգծեց Հ.Գալստյանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: