Ձեր վստահելի աղբյուրը

Աշխարհի ֆուտբոլի առաջնության խաղային երկրորդ օրը մեզ կուրախացնի մի հանդիպումով, որը կարելի է կենտրոնականներից մեկը համարել խմբային փուլում:

4 տարի առաջ Իսպանիայի ընտրանին Հարավաֆրիկյան Հանրապետությունում կայացած աշխարհի առաջնության եզրափակչի լրացուցիչ ժամանակում հաղթեց Հոլանդիայի ազգային թիմին: Արդեն երկրորդ օրը հոլանդացիները հնարավորություն են ստանում ռևանշի հասնել իսպանացիների նկատմամբ այդ պարտության դիմաց: Իսպանացիներն աշխարհի չեմպիոնի կոչման պաշտպանությունը, այսպիսով, սկսում են շատ լուրջ փորձությամբ: Իսպանիայի ու Հոլանդիայի թիմերի հարաբերությունները «ԱԱ-2010»-ի եզրափակչով չեն սահմանափակվում: Նրանք հանդիպել են 9 անգամ, տոնել 4-ական հաղթանակ և 1 հանդիպում ավարտել ոչ-ոքի արդյունքով:

Իհարկե, հին ծանոթների` փոխհարաբերություններ պարզելը մրցամարտի միակ ինտրիգը չէ: Հաղթողի համար 3 միավորը հիանալի մեկնարկ կլինի, իսկ պարտվողն անհանգստանալու լուրջ առիթ կունենա, քանի որ 2-րդ տեղի համար ծանր պայքար է սպասվում այս խմբում: Եթե Ավստրալիայի ընտրանին հետնապահ է համարվում, ապա չիլիացիները, հավանաբար, կկարողանան բարդացնել եվրոպական ֆավորիտների կյանքը:

Իսպանիայի հավաքականի կորիզը կազմում են նույն փորձված մարտիկները, ովքեր կռել են իրենց թիմի հաղթանակները վերջին 2 միջազգային խոշոր մրցաշարում, իսկ նրանցից շատերն իրենց գլխավերևում են պահել նաև Եվրոպայի 2008 թ. առաջնության գավաթը: Հավանաբար, կիսապաշտպանության կենտրոնն իսպանական տիկի-տակիի սիրտն է և այսօր կներկայանա նույն կազմով, որով հանդես է եկել Եվրոպայի 2012 թ, և աշխարհի 2010 թ. առաջնության եզրափակիչներում: Ասպարեզ դուրս կգան Խավին, Բուսկետսն ու Խաբի Ալոնսոն: Չնայած ընկերական վերջին խաղերում Վիսենտե դել Բոսկեն տարբեր սխեմաներ է կիրառել, այդ թվում նաև` միջին գծում, ուստի անակնկալները հնարավոր չէ բացառել: Ամեն դեպքում` Իսպանիայի հավաքականի գլխավոր մարզիչն ընտրության մեծ հնարավորություններ ունի:

Պաշտպանությունում ոչ պակաս վստահությամբ կարելի է կանխատեսել Ռամոսի, Պիկեի ու Ալբայի մուտքը խաղադաշտ, իսկ ահա աջ եզրում տեղի համար պայքարում են Խուանֆրանն ու Ասպիլիկուետան: Ի դեպ, դել Բոսկեն կարող է պահեստայինների նստարանին թողնել Պիկեին և Ռամոսի կողքին դիրքավորել Խավի Մարտինեսին: Իսկ դարպասի պաշտպանությունը կվստահվի Իկեր Կասիլյասին:

Դել Բոսկեից տարբեր կոմբինացիաներ կարելի է ակնկալել հարձակման գծում: Թիմի առաջատար Անդրես Ինյեստային միայն ֆորս-մաժորը կարող է խանգարել` դուրս գալու խաղադաշտ, սակայն Անդրեսը կարող է գործել ոչ միայն հարձակողական եռյակում, այլև խաղադաշտի կենտրոնում: Դիեգո Կոստան հայտարարել է, որ 100 տոկոսով պատրաստ է աշխարհի առաջնությանը, ուստի բոլոր հիմքերն ունենք` մտածելու, որ այսօր նա կխաղա հարձակման գծի կենտրոնում: Բացառված չէ նաև Ֆաբրեգասի տարբերակը` որպես «կեղծ իննյակ», ինչպես «Եվրո-2012»-ի ժամանակ:

Քիչ հավանական է, որ Ֆեռնանդո Տորրեսը կընդգրկվի հիմնական կազմում: Հարձակման գծում երրորդ տեղի համար պայքարում ֆավորիտը Դավիդ Սիլվան է, սակայն նրա մրցակիցները նույնպես շատ լուրջ են` Վիլյա, Մատա, Պեդրո:

Լուի վան Գալի տրամադրության տակ փորձի ու երիտասարդության հրաշալի համաձուլվածք կա: Հավանաբար, Հոլանդիայի հավաքականում հարձակման գիծն ավելի փորձառու է` Ռոբբեն, վան Պերսի և Սնեյդերը` որպես փլեյմեյքեր:

Հենակետային կիսապաշտպանի գոտին կամրացնի Նայջլ դե Յոնգը, իսկ նրա կողքին կդիրքավորվեն երիտասարդ խաղընկերները: Մեկնարկային կազմում ասպարեզ դուրս գալու հնարավորություն ունեն Գուզմանը, Ֆերը և Կլասին, քանի որ բացակայում է Ստրոտմանը, ով վնասվածքի պատճառով բաց է թողնում աշխարհի առաջնությունը: Հոլանդացի լրագրողներն արդեն չեն կասկածում, որ հիմնական կազմում կընդգրկվի Կլասին:

Եթե վան Գալը գերադասի խաղալ երկու կենտրոնական պաշտպանով, ինչը քիչ հավանական է, ապա Յոնգն ընդամենը երկու խաղընկեր կունենա կիսապաշտպանության կենտրոնում, հակառակ դեպքում` մեկ: «Մանչեսթեր Յունայթեդի» նոր գլխավոր մարզիչն ընկերական վերջին խաղերում փորձարկել է 3 կենտրոնական պաշտպանով սխեման` ներգրավելով Վրեեմին, Վլաարին ու Մարտինս Ինդիին: Աջ եզրը Հոլանդիայի հավաքականում վստահված է Յանմատին, իսկ ձախը` Բլինդին, սակայն 4 պաշտպանով սխեմայի դեպքում ձախից կարող է գործել Մարտինս Ինդին: Հիմնական դարպասապահը Յասպեր Սիլեսենն է:

Օպտիմալ կազմեր

Իսպանիա- Կասիլյաս-Խուանֆրան, Պիկե, Ռամոս, Ալբա-Խավի, Բուսկետս, Խաբի Ալոնսո-Ինյեստա, Կոստա, Սիլվա:
Հոլանդիա- Սիլեսեն-Յանմատ, դե Վրեյ, Վլաար, Մարտինս Ինդի, Բլինդ-Կլասի, դե Յոնգ-Սնեյդեր-վան Պերսի, Ռոբբեն:

Կարծիքներ

Լուի վան Գալ (Հոլանդիայի հավաքականի գլխավոր մարզիչ).- Մենք չենք պատրաստվում Հարավային Ամերիկա մեկնել սոսկ մրցաշարին մասնակցելու համար: Ուզում ենք լավ ելույթներ ունենալ, և ինչ-որ բան ինձ ասում է, որ ամեն ինչ հաջող կդասավորվի:

Վիսենտե դել Բոսկե (Իսպանիայի հավաքականի գլխավոր մարզիչ).- Հիմա մենք ոչ մի կոմպլեքս ու ստերեոտիպ չունենք: Եվ չնայած մեր խաղաոճը շատ հայտնի է, ի վիճակի ենք զարմացնել մրցակիցներին: Իմ սաները նախկինի պես ուժեղ են, և մենք պատրաստ ենք պայքարել անընդմեջ 4-րդ մրցանակի համար:

Արյեն Ռոբբեն (Հոլանդիայի հավաքականի հարձակվող).- Այն, թե ինչպես ենք խաղում, մեզ արդյունք է բերում: Եվ մեր գլխավոր խաղաքարտը պետք է լինեն հակագրոհները: Իսպանիայի ընտրանին «ԱԱ-2014»-ի միակ ֆավորիտը չէ, բայց ունի խաղակցված կազմ: Իսկ մենք «Եվրո-2012»-ից հետո նոր թիմ ենք ձևավորում: Կարծում եմ` ճիշտ ուղղությամբ ենք շարժվում:

Իկեր Կասիլյաս (Իսպանիայի հավաքականի դարպասապահ).- Մենք աշխարհի առաջնությանը մասնակցում ենք բացարձակ ֆավորիտի կարգավիճակում, ինչը միայն կրկնապատկում է պատասխանատվությունը` պայմանավորված խաղացողների որակով: Մեր կազմը հնարավորություն է տալիս բարձր մակարդակով անցկացնել մրցաշարը և պաշտպանել կոչումը: