Ձեր վստահելի աղբյուրը

Ադրբեջանում աղջկա ծնունդը ոչ միշտ է ուրախությամբ ընդունվում: Երբեմն երեխայի սեռը կարող է դառնալ անգամ ամուսնալուծության և ֆիզիկական բռնության պատճառ: Հաշվի առնելով Բաքվում մարմնավաճառության տարածված լինելը, շատ աղքատ ընտանիքներ մտավախություն ունեն, որ իրենց աղջիկները ապագայում կարող են խնդիրներ ունենալ: Այդ մասին, ըստ ադրբեջանական «Հաքքին.ազ» լրատվական կայքի, նշված է Corriera Della Sera իտալական հրատարակության կայքում հրապարակված հոդվածում:

Նյութում նշված է, որ Ադրբեջանում օրենքը թույլ է տալիս հղիության արհեստական ընդհատումներ իրականացնել անկախ դրդապատճառներից, ինչը բավականին հազվադեպ երևույթ է մուսուլմանական երկրների համար:

«Իսլամը թույլ է տալիս հղիության արհեստական ընդհատումներ մոր կյանքի համար վտանգի առաջացման դեպքում և որոշ այլ բացառիկ դեպքերում: Մուհամմեդ մարգարեն արգելել է ծնվելիս աղջիկներին սպանելու նախաիսլամական պրակտիկան»,– գրում է հեղինակը:

Հոդվածում նշվում է, որ կանանց, ովքեր աղջիկներ են ունենում, անվանում են անպտուղ: «Հանուն ռացիոնալ զարգացման» կանանց միավորման ղեկավար Շահլա Իսմաիլովան հաստատել է, որ շատ կանայք ստիպված են լինում ընդհատել հղիությունը` վախենալով ամուսնու զայրույթից աղջկա ծնվելու դեպքում: Նա նշեց, որ սեռից կախված հղիության ընդհատումները տարածված են նաև Բաքվում:

«Չնայած այն հանգամանքին, որ Ադրբեջանը աշխարհիկ երկիր է, կանայք հագնվում են արևմտյան ոճով, ազատ քայլում են քաղաքում, իրենց համար աշխատանք են փնտրում, այնուամենայնիվ կարծրատիպերը դեռևս պահպանվում են և ազդում են որոշումների ընդունման վրա: Որոշ կանայք կարծում են, որ առանց ամուսնու կամ հոր չեն կարողանա ապրել»,-ասում է Իսմայիլովան:

Ըստ ՄԱԿ-ի տվյալների, 2012 թ. Ադրբեջանում ծնվել է 100 աղջիկ և 116 տղա, այն ժամանակ, երբ այս հարաբերակցությունը այլ երկրներում տատանվում է 100:102-ի սահմաններում:

Կանանց ճգնաժամային կենտրոնի ղեկավար Մեհրիբան Զեյնալովան իր հերթին նշել է, որ Ադրբեջանում բացակայում են տղաներին գերադասելու իրական պատճառները և սոցիալ-կրոնական հիմքերը:

«Բազմաթիվ աղքատ ընտանիքներ հաշվի առնելով Բաքվում մարմնավաճառության տարածված լինելը, մտավախություն ունեն, որ իրենց աղջիկները ապագայում կարող են խնդիրներ ունենալ»,-կարծում է նա:

Զեյնալովան ավելացրել է, որ որոշ կանայք այդ պատճառով են հղիության արհեստական ընդհատում իրականացնում:

Իտալական թերթը գրում է, որ Բաքուն ժամանակակից քաղաքի տպավորություն է թողնում` գործում են շքեղ եվրոպական խանութներ և ռեստորաններ:

«Սակայն կենտրոնից դուրս ճանապարհները և տները գտնվում են անմխիթար վիճակում, բնակիչները ջանքեր չեն գործադրում, իրենց տների արտաքին տեսքը կարգի բերելու համար», –ամփոփում է հեղինակը: