Ձեր վստահելի աղբյուրը

«Իրանը կտրականապես դեմ է, որպեսզի ԱՄՆ-ն Իրաքում ռազմական միջամտություն ունենա»,-այդ մասին իրանական «ՖԱՐՍ» լրատվական գործակալության հաղորդմամբ՝ հայտարարել է ԻԻՀ ԱԳՆ մամլո խոսնակ Մարզիե Աֆխամը:

Իրանի արտաքին գերատեսչության պաշտոնական ներկայացուցիչը լրագրողների հետ հանդիպման ժամանակ, անդրադառնալով այս օրերին Իրաքի տարբեր շրջաններում Իրաքի բանակի և «Իրաքի և Շամի իսլամական պետություն» խմբավորման միջև տեղի ունեցող մարտերին և դեպքերի հնարավոր զարգացումներին, մասնավորապես նշել է. «Հատկանշական է, որ ահաբեկիչներն այն ժամանակ սկսեցին իրենց գործողությունները, երբ Իրաքում խորհրդարանական ընտրությունները հաջող ավարտ ունեցան: Անկասկած ներկայում Իրաքում տեղի ունեցող զարգացումների նպատակն այդ երկրում քաղաքական գործընթացների վրա ազդելն ու դրանցում փոփոխություն իրականացնելն է»:

Անդրադառնալով Միացյալ Նահանգների՝ իրաքյան գործընթացներին մասնակցելու հավանականությանը՝ Իրանի ԱԳՆ մամլո խոսնակը նշել է. «ԱՄՆ-ն ցանկանում է օգտվել Իրաքի ներքաղաքական իրավիճակից և ստվերել այդ երկրում անկացված խորհրդարանական ընտրությունների արդյունքները: Հետևաբար չպետք է ակնկալիք ունենալ այն ուժերից, որոնք Իրաքի անկայունության մեջ ներգրավվածություն են ունեցել. Իրանի Իսլամական Հանրապետությունը կտրականապես դեմ է, որպեսզի ԱՄՆ-ն Իրաքում ռազմական միջամտություն ունենա»:

Իրանական «ՄԵՀՐ» լրատվական գործակալության հաղորդմամբ՝ ամերիկացի սենատոր Լինդսի Գրահամը հայտարարել է, որ Միացյալ Նահանգներն ու Իրանը Իրաքի ծայրահեղական խմբավորումների դեմ պայքարում պետք է միմյանց հետ համագործակցեն:

Թեմայի առնչությամբ այլ հրապարակում՝

Հասան Ռոհանի. Իրանն ու ԱՄՆ-ն Իրաքի հարցում կարող են համագործակցել