Ձեր վստահելի աղբյուրը

Այսօր Հայաստանից ավելի քան 200 անհայտ կորած  ազատամարտիկ կա, որից 94-ի հնարավոր տվյալները ճշգրտվում են: Լրագրողների հետ հանդիպման ժամանակ ասաց «Անհայտ կորած ազատամարտիկների խորհուրդ» ՀԿ նախագահ, անհայտ կորած ազատամարտիկի մայր Ռիմա Առաքելյանը:

«Ամենակարևորն այն է, որ մեր պետությունը տղաներին գտնելու ուղղությամբ աշխատանքներ տանում է: Նրանց գտնելը պաշտպանության նախարարի, բոլորի բուն նպատակն է: Ի տարբերություն մեզ, Ադրբեջանում այսքան նշանակություն չեն տալիս անհայտ կորածին: Մեզ մոտ երկար տարիներ է գործում է պրոֆեսիոնալ հանձնախումբ, որին կից կա աշխատանքային խումբ: Ակտիվորեն աշխատանքներ են տարվում»,- ասաց նա՝ հավելելով, որ նույնիսկ միջազգային կառույցներն ի զորու չեն այս հարցում ազդել Ադրբեջանի վրա:

Ռ. Առաքելյանն ասաց, որ իրենք դիմել են միջազգային կառույցներին, Կարմիր խաչին, որպեսզի կազմակերպեն Հայաստանում ու Ադրբեջանում գործող անհայտ կորածների հարցերով զբացվող հանձնաժողովների հանդիպում, բայց ադրբեջանական կողմից որևէ արձագանք չի եղել. «Միայն այդ հանդիպման արդյունքում հնարավոր է որևէ քայլ անել»:

Նրա խոսքով, անհայտ կորածների ծնողները, բարեկամները երբեք հույսները չեն կորցնում, որ նրանք մի օր անպայման վերադառնալու են:

Ինչ վերաբերում է Ադրբեջանում գերության մեջ գտնվող Հակոբ Ինջիղուլյանին, Ռ. Առաքելյանն ասաց, որ այս հարցով էլ պատասխանատու մարմիններն ինտենսիվ զբաղվում են:

«Դեռ չենք կարողանում կոնկրետացնել նրա գործը: Հասկանալի է, թե ում հետ գործ ունենք»:

Նա ասաց, որ հունիսի 12-ին Հ. Ինջիղուլյանին այցելել են Կարմիր խաչի ներկայացուցիչները, հաղորդել են, որ նրա առողջությունը լավ է: 

Անհայտ կորած ազատամարտիկների հիշատակի օրը նշվում է 2000 թվականից. «Հայաստանի Հանրապետության տոների և հիշատակի օրերի մասին» Հայաստանի Հանրապետության օրենքի 10 հոդվածին համապատասխան Հայաստանի Հանրապետության կառավարությունը որոշել է հունիսի 29-ը նշել անհայտ կորած ազատամարտիկի օրը: Օրը պատահական ընտրված չէ. Արցախյան պատերազմի ժամանակ հենց այդ օրը առավել մեծ թվով` 76 ազատամարտիկներ անհայտ կորան: