Ձեր վստահելի աղբյուրը

Այսօր անապատացման դեմ պայքարի միջազգային օրն է: 1995թ. Միավորված Ազգերի կազմակերպությունը հռչակեց հունիսի 17-ը որպես անապատացման և երաշտի դեմ պայքարի միջազգային օր՝ անապատացման և երաշտի սպառնալիքների և հետևանքների իրազեկությունը բարձրացնելու նպատակով:

Բնապահպան Կարինե Դանիելյանը Panorama.am-ի հետ զրույցում ասաց, որ անապատացումը սպառնում է ողջ աշխարհին և հատկապես չորային գոտում գտնվող Հայաստանին. «Մեզ ավելի շատ է սպառնում: Սպառնում է առաջին հերթին այն առումով, որ Արարատյան դաշտավայրի արտեզյան ավազանն ենք չորացրել, և դա մեծ վտանգ է ողջ Արարատյան հարթավայրի համար: Սպառնում է այն առումով, որ անտառներն ենք ոչնչացնում»:

Բնապահպանը նկատեց նաև,  որ վերջին տարիներին անտառների ապօրինի հատման տեմպերը նվազել են:

Ինչ վերաբերում է քաղաքամայր Երևանին, ապա Կ. Դանիլյանի համոզմամբ, անկախության տարիներին իրականացված քաղաքաշինությունը բացարձակ հաշվի չի առել կլիմայի, բնական ռեսուրսների փոփոխությունները:

«Այսօրվա քաղաքաշինությունը Երևանը վերածում է ասֆալտաբետոնային անապատի»,-ասաց բնապահպանը:

2014թ. անապատացման դեմ պայքարի օրվա նպատակներն են`

1.Կենտրոնացնել ուշադրությունը հողերի պահպանության և կլիմայի փոփոխության հարմարվողականության նկատմամբ:
2.Մոբիլիզացնել աջակցությունը հողերի կայուն կառավարման համար:
3.Կոչ անել ներառելու հողերի պահպանության և սննդամթերքի անվտանգության հարցերը Կլիմայի փոփոխության հարմարվողականության ազգային քաղաքականության մեջ:

2014 թվականին անապատացման դեմ պայքարի միջազգային օրվա թեման է՝ հարմարվողականությունը հիմնված էկոհամակարգային մոտեցման վրա, որի կարգախոսն է՝ «Հողը պատկանում է ապագային - Պահպանենք այն կլիմայի փոփոխությունից»: