ՕԵԿ-ն ասել է, որ ընդդիմություն է, իսկ քառյակը ներկայացրել ծրագրերը. ԱԺ-ում ընդունել են համազեկուցողներին
Հունիսի 17-ին Հայաստան ժամանած Եվրոպայի Խորհրդի Խորհրդարանական Վեհաժողովի մոնիտորինգի հանձնաժողովի Հայաստանի հարցով համազեկուցողներ Ակսել Ֆիշերը և Ալան Միլը հանդիպել են ԱԺ խմբակցությունների հետ, տեղեկացնում են ԱԺ լրատվական ծառայությունից:
Առաջին հանդպումը, ըստ աղբյուրի, ԱԺ «Ժառանգություն» խմբակցության ղեկավար Ռուբիկ Հակոբյանի հետ է եղել: Ակսել Ֆիշերը տեղեկացրել է, որ ԱԺ խմբակցությունների հետ հանդիպելով, նպատակ ունեն լսելու նրանց տեսակետներն ու կարծիքները մի շարք հարցերի, մասնավորապես, ներքաղաքական իրավիճակի, խմբակցությունների հետագա ծրագրերի վերաբերյալ: Այցից հետո համազեկուցողները պատրաստելու են զեկույց, որը ներկայացվելու է ԵԽԽՎ մոնիտորինգի հանձնաժողովի քննարկմանը: Հյուրերի խնդրանքով ԱԺ «Ժառանգություն» խմբակցության ղեկավար Ռուբիկ Հակոբյանն անդրադարձել է ներքաղաքական իրավիճակին, տարածաշրջանային գործընթացներին, չորս ոչ իշխանական խորհրդարանական ուժերի համագործակցության ուղղություններին և հետագա նպատակներին, սահմանադրական բարեփոխումներին: Նա պարզաբանել է, որ «Ժառանգություն» խմբակցությունը կարևորում է խորհրդարանական կառավարման համակարգը, սակայն այս պահին մեկնարկած սահմանադրական բարեփոխումների գործընթացը համարում է ժամանակավրեպ: Ռուբիկ Հակոբյանն անդրադարձել է ԼՂՀ հակամարտության կարգավորման հիմնախնդրին, մարդու իրավունքների և ազատությունների պաշտպանությանը, համայնքներում ժողովրդավարության զարգացման խմբակցության մոտեցումներին:
ԵԽԽՎ մոնիտորինգի հանձնաժողովի Հայաստանի հարցերով համազեկուցողներ Աքսել Ֆիշերի եւ Ալան Միլի հետ հանդիպել են նաև ԱԺ ՀՅԴ խմբակցության ներկայացուցիչները: Հյուրերի խնդրանքով խմբակցության ղեկավար Արմեն Ռուստամյանը և քարտուղար Աղվան Վարդանյանը անդրադարձել են ընտրություններից հետո ստեղծված իրավիճակին, ԱԺ ոչ իշխանական չորս ուժերի ներկայացրած 12 կետից բաղկացած հայտարարությանը եւ այլ հարցերի: Արմեն Ռուստամյանի գնահատմամբ՝ քառյակի ներկայացրած 12 կետերի իրագործումը հնարավորություն կտա կառավարությանը ավելի իրատեսական դարձնելու բարեփոխումները: Նա կարևորել է ընդդիմությանը վերահսկողության գործառույթներով ապահովելը, ընտրական համակարգի փոփոխությունները:
Անդրադառնալով սահմանադրական բարեփոխումների հայեցակարգին՝ Ռուստամյանն ընդգծել է, որ իրենց կուսակցության նպատակը սահմանադրական փոփոխությունների ինքնանպատակ մերժումը չէ. եթե դրանք կբերեն կառավարման համակարգի փոփոխությանը և կլուծեն երկրի առջև ծառացած խնդիրները, ապա իրենք կներկայացնեն առաջարկներ: Խոսելով ԼՂ հիմնախնդրից՝ պարոն Վարդանյանն արժևորել է ԼՂ ժողովրդի ազատ ինքնորոշման իրավունքը՝ նշելով, որ Ադրբեջանն է պատերազմ սանձազերծել ԼՂ-ի դեմ և պարտվել է այդ պատերազմում: «Կարևոր է, որ մեր եվրոպացի գործընկերները թույլ չտան ԼՂ ժողովրդի շրջափակումը»,- ընդգծել է խմբակցության քարտուղարը: Նա կարևորել է ՀՀ-ԵՄ երկխոսության շարունակականությունը: Հանդիպման ընթացքում անդրադարձ է կատարվել նաև նորակազմ կառավարության գործունեությանը, Հայաստանի՝ Եվրասիական միությանն անդամակցությանը, հասարակական-քաղաքական գործընթացներում կանանց դերին և փոխադարձ հետաքրքրություն ներկայացնող այլ հարցերի:
Եվրոպայի խորհրդի խորհրդարանական վեհաժողովի մոնիտորինգի հանձնաժողովի Հայաստանի հարցերով համազեկուցողների հաջորդ հանդիպումը «Օրինաց երկիր» խմբակցության ղեկավար Հեղինե Բիշարյանը և քարտուղար Մհեր Շահգելդյանի հետ է եղել: Խմբակցության ղեկավար Հեղինե Բիշարյանը նշել է, որ ՕԵԿ-ը արդեն երկու ամիս է գործում է ընդդիմադիր դաշտում: Նրա խոսքով՝ խմբակցությունը պատրաստ է հրապարակային քաղաքականության, քննարկել հարցեր մյուս քաղաքական ուժերի հետ: Խմբակցության քարտուղար Մհեր Շահգելդյանը ներկայացրել է այն կարևոր կետերը, որոնք առաջնային են իրենց կուսակցության համար: ՀՀ քաղաքական համակարգի ժողովրդավարացման, թափանցիկ և արդար ընտրական համակարգի ձևավորման, կուսակցական համակարգի ինստիտուցիոնալ կայացման և մարդու իրավունքների պաշտպանության մեխանիզմների բարելավման համար ՕԵԿ-ի համար քաղաքական առաջնահերթություններ են 100 տոկոս համամասնական ընտրակարգի անցումը, ՀՀ-ում կուսակցությունների մասին նոր օրենքի ընդունումը և այլ հարցեր:
ԵԽԽՎ մոնիտորինգի հանձնաժողովի Հայաստանի հարցերով համազեկուցողների հետ հանդիպել են նաև ՀԱԿ խմբակցության ղեկավար Լեւոն Զուրաբյանը և խմբակցության քարտուղար Արամ Մանուկյանը: Հանդիպման ընթացքում Լեւոն Զուրաբյանը խոսել է ընտրական գործընթացներից, կարևորել ընտրացուցակների ճշգրտությունը, հեռուստաընկերությունների անկախությունը: Նա նաև անդրադարձել է իշխանությունների առաջարկած սահմանադրական բարեփոխումների հայեցակարգին՝ նշելով, որ խմբակցությունն այս պահին այդ բարեփոխումների կարիքը չի տեսնում: Լևոն Զուրաբյան խոսել է նաև 2008 թ.-ի մարտի 1-2-ին Երևան քաղաքում տեղի ունեցած իրադարձություններից, անդրադարձել մարդու իրավունքների պաշտպանության և ներքաղաքական խնդիրներին վերաբերող հարցերի:
«Բարգավաճ Հայաստան» խմբակցության քարտուղար Նաիրա Զոհրաբյանը և խմբակցության անդամներ Էլինար Վարդանյանն ու Ստեփան Մարգարյանը ԵԽԽՎ մոնիտորինգի հանձնաժողովի համազեկուցողների հետ հանդիպման ժամանակ ներկայացրել են խմբակցության դիրքորոշումը երկրում ընթացող ներքաղաքական և արտաքին քաղաքական զարգացումների վերաբերյալ, խոսել են քառյակի ձևաչափում համագործակցության և այն քայլերի մասին, որոնք նախաձեռնել են քառյակի կուսակցությունները: Հանդիպման ընթացքում անդրադարձ է եղել նոր կառավարության գործունեությանը: Կողմերը քննարկել են սահմանադրական փոփոխությունների հայեցակարգը, որի վերաբերյալ ԲՀԿ խմբակցությունը ներկայացրել է իր դիրքորոշումը՝ նշելով, որ այս պահին սահմանադրական փոփոխությունների հանրային պահանջ չկա: Կողմերը քննարկել են նաև երկրի առջև ծառացած լրջագույն մարտահրավերներին՝ արտագաղթին, աղքատությանը և գործազրկությանը վերաբերող խնդիրները, անդրադարձել են օրենսդրության բարելավման հետ կապված մի շարք հարցերի:
ԵԽԽՎ Հայաստանի հարցով համազեկուցողներ Ակսել Ֆիշերի և Ալան Միլի հետ ՀՀԿ խմբակցությունից հանդիպել են ԱԺ նախագահի տեղակալ Հերմինե Նաղդալյանը, Հովհաննես Սահակյանը, Արփինե Հովհաննիսյանը, Նաիրա Կարապետյանը և Արաիկ Հովհաննիսյանը: Նաղդալյանը փաստել է, որ մեր երկրի օրենսդիր մարմնում ներկայացված և տարբեր քաղաքական ուղղություններ ներկայացնող խմբակցություններն աշխատում են փոխադարձ հանդուրժողականության մթնոլորտում: Համազեկուցողների խնդրանքով խմբակցության անդամներ Հերմինե Նաղդալյանը և Հովհաննես Սահակյանն անդրադարձել են 2008 թվականի մարտի 1-ի դեպքերն ուսումնասիրող ԱԺ ժամանակավոր հանձնաժողովի իրականացրած աշխատանքին և նման ողբերգական իրադարձությունների կրկնությունը բացառելու նպատակով կատարված օրենսդրական բարեփոխումներին, նշելով, որ այժմ շարունակվում է այդ գործով ի հայտ եկած նոր հանգամանքների ուսումնասիրությունն ու նախաքննությունը: Համազեկուցողները, ելնելով քաղաքացիական հասարակության մի շարք անդամների հետ ունեցած հանդիպումներից, հետաքրքրված էին նաև գենդերային հավասարության ուղղությամբ իրականացվող քայլերով, տեղական ինքնակառավարման մարմիններում ժողովրդավարության զարգացմամբ, որոնց վերաբերյալ խմբակցության անդամները ներկայացրել են կատարված և ընթացող աշխատանքները:
Լրահոս
Տեսանյութեր
Արցախի կորուստը կապված է նաև այսօրվա իշխանությունների հետ. Կապանի համայնքապետ
