Պատգամավոր Առաքել Մովսիսյանն՝ ակտիվիստներին. «Ինչքան ա պետք, արեք տամ»
«Դեմ եմ» նախաձեռնության անդամներն այսօր կրկին հավաքվել են Ազգային ժողովի մուտքի մոտ՝ իրենց բողոքն արտահայտելով կառավարության կողմից ներկայացված «Կուտակային կենսաթոշակների մասին» ՀՀ օրենքում առաջարկվող փոփոխությունների նախագծի դեմ: Նախաձեռնության անդամները նախագծում առաջ քաշված դրույթները համարում են հակասահմանադրական, բացի այդ, նշում են, որ իրենց արած առաջարկություններից և ոչ մեկն ընդգրկված չեն այդտեղ:
Հիշեցնենք, որ ԱԺ արտահերթ նիստի օրակարգում է նաև այդ նախագիծը:
«Անկուշտ հարուստը աղքատներից ամենաաղքատն է», «Ազատությունն այն է, երբ կախված ես միայն օրենքներից (Վոլտեր)» գրությամբ պաստառներով նրանք դիմավորում էին պատգամավորներին: Ակտիվիստները մանրադրամներ էին հավաքել ու լցրել ԱԺ մուտքի առջև:
«Մենք այդ մանրադրամները բաժանելու ենք պատգամավորներին՝ ցույց տալով, որ հասարակությունը դեմ է այդ օրենքին, որն ուզում են ընդունել ու օրինական ճանապարհով թալան իրականացնել: Մենք թույլ չենք տալու, որ այդ հինգ տոկոսը մեր գրպաններից վերցնեն»,- ասաց ակտիվիստներից մեկը:
ԱԺ-ից դուրս գալով ՀՀԿ-ական պատգամավոր Առաքել Մովսիսյանը նայեց մանրադրամներին և դիմելով ակտիվիստներին՝ ասաց. «Ինչքան ա պետք, արեք տամ»:
Պատասխանելով լրագրողի հարցին, թե դուք կո՞ղմ եք քվեարկելու օրենքին, պատգամավորը պատասխանեց. «Ես ինչ ուզեմ, էն էլ կանեմ: Դավայ, հաջողություն»:
Հիշեցնենք, որ ՀՀ կառավարությունը նախօրեին կայացած արտահերթ նիստում հավանություն է տվել «Կուտակային կենսաթոշակների մասին» և ևս մի շարք օրենքներում փոփոխություններ և լրացումներ կատարելու օրենքների նախագծերի փաթեթին, որի ընդունումը թելադրված է ՀՀ սահմանադրական դատարանի որոշման իրականացման անհրաժեշտությամբ: Փաթեթը վերաբերում է կուտակային կենսաթոշակի համակարգն ուժի մեջ մտնելուց հետո տնօրինվող եկամտի նվազեցում թույլ չտալուն, այլ կերպ ասած՝ կրճատմանը: Փաթեթը նախատեսում է 2014թ. հուլիսի 1-ից համակարգը գործարկել պետական հատվածի աշխատողների համար, իսկ մասնավոր հատվածի համար՝ ներդնել կամավոր, երեք տարի ժամկետում՝ փուլային ճանապարհով: 2014թ. հունվարի 1-ին ուժի մեջ մտած օրենսդրությամբ սահմանված պարտադիր վճարը այլևս չի կատարվելու, օրենքով սահմանվում է պետբյուջե կատարվող նպատակային սոցիալական վճար՝ 5 տոկոս դրույքաչափով: Առաջարկվում է սահմանել 500 հազար դրամ աշխատավարձի շեմ, որից ավելիի դեպքում սոցվճար չի կատարվելու, այսինքն՝ առավելագույն սոցվճարը բոլորի համար լինելու է 25 հազար դրամ՝ կախված աշխատավարձի չափից:
Նախորդող հրապարակումներ՝
«Դ!ԵՄ ԵՄ» նախաձեռնության անդամները ցանկանում են փակել ԱԺ մուտքը
«Դեմ եմ». «Կուտակային»-ի մասին օրենքում առաջարկվող փոփոխությունները կրկին հակասահմանադրական են
«Դ!ԵՄ ԵՄ».Կուտակային կենսաթոշակային համակարգին մասնակցությունը պետք է լինի միայն կամավոր
Լրահոս
Տեսանյութեր
Գիշեր-ցերեկ կաշխատենք, միայն առաջվա Հայաստանում ապրենք. Քաղաքացիները՝ աշխատաժամանակի կրճատման մասին
