Ձեր վստահելի աղբյուրը

Հանրակրթական դպրոցների պայմանների զգալի տարբերությունները հաշվի առնելով, ինչպես նաև վերջերս քննարկվող կրթության ոլորտի քաղաքականությունն իրականացնող պաշտոնյաների զավակների ուսման վայրերի վերաբերյալ թեման, դրա և կրթական ոլորտի միջև հասարակության համեմատական զուգահեռները ուսումնասիրելով, Panorama.am-ը հարցը որպես հանրային նշանակության դիտարկեց և որոշեց տեղեկանալ, թե որտեղ են սովորում կրթության ոլորտի քաղաքականությունը մշակող պաշտոնյաների երեխաները:

ԿԳ նախարարությունը Panorama.am-ին է տրամադրել նախարարության աշխատակիցների երեխաների ուսման վայրի մասին տեղեկանք:

Այսպես, ՀՀ կրթության և գիտության նախարար Արմեն Աշոտյանն ունի երկու զավակ: Նախարարի որդին 1-ին դասարան է հաճախել Ն.Աղբալյանի անվան թիվ 19 հիմնական դպրոցում, այժմ սովորում է «Այբ» կրթական հիմնադրամի կրտսեր դպրոցում: Նախարարի մյուս որդին դեռ 6 տարեկան չկա, նախակրթարան է հաճախում:

ԿԳ նախարարի տեղակալ Մանուկ Մկրտչյանի դուստրը ՌԴ Կրասնոյարսկի դպրոցի, ապա` Ֆինանսաբանկային ակադեմիայի (ոչ պետական հավատարմագրված) սան է:

Փոխնախարարի որդին սովորել է Կոտայքի մարզի Առինջի միջնակարգ դպրոցում, ապա Խ.Աբովյանի անվան ՀՊՄՀ-ի Ֆիզմաթ ֆակուլտետում:

Նախարարության բարձրագույն և հետբուհական մասնագիտական կրթության վարչության պետ Ռոբերտ Սուքիասյանի երկու երեխաները` դուստրն ու որդին սովորում են Արարատի մարզի Մարմարաշենի միջնակարգ դպրոցում: Մյուս աղջիկը նույն դպրոցն ավատելուց հետո սովորում է Երևանի պետական բժշկական համալսարանում` բուժական գործ (վճարովի):

Արտաքին կապերի և սփյուռքի վարչության պետ Տիգրան Սահակյանի աղջիկը սովորում է Երևանի թիվ 192 հիմնական դպրոցում, իսկ որդին Դավիթաշենում հաճախում է մանկապարտեզ:

ԿԳՆ նախնական (արհեստագործական) և միջին մասնագիտական կրթության վարչության պետ Ռոբերտ Աբրահամյանի որդիներից մեկը սովորում է Երևանի թիվ 200 հիմնական դպրոցում, իսկ մյուսը` մանկապարտեզի սան է:

ԿԳՆ հանրակրթության վարչության պետ Նարինե Հովհաննիսյանի դուստրը սովորել է Ջոն Կիրակոսյանի անվան թիվ 20 դպրոցում, ապա ԵՊՀ ռոմանոգերմանական ֆակուլտետում:

Որդին նույն դպրոցն ավարտելուց հետո կրթությունը շարունակել է Հայաստանի ագրարային համալսարան-հիմնադրամում, ապա Երևանի կինոյի և թատրոնի պետական ինստիտուտում:

Հասարակայնության հետ կապերի և տեղեկատվության վարչության պետ Արթուր Բաղդասարյանի դուստրը սովորել է Երևանի թիվ 118 դպրոցում, ապա ԵՊՀ ռոմանոգերմանական ֆակուլտետում: Որդին նույն դպրոցն ավարտելուց հետո կրթությունը շարունակում է Չինաստանի Ժողովրդական Հանրապետության Շանդոնգի համալսարանում:

ԿԳՆ գիտության պետական կոմիտեի նախագահ Սամվել Հարությունյանի դուստրը «Բյուրակն» կրթահամալիրի սան է:

Կրթության ազգային ինստիտուտի տնօրեն Նորայր Ղուկասյանի զավակները վաղուց են ավարտել ուսումը: Փոքր տղան սովորել է Գյուղակադեմիայում, մեծ տղան` Մանկավարժական համալսարանում: Դպրոցական թոռը թիվ 118 դպրոցում է սովորում, մյուսը` մանկապարտեզ է հաճախում:

ԳԹԿ տնօրեն Գագիկ Մելիքյանը մեզ հետ զրույցում հայտնեց, որ ինքը մեկ աղջիկ ունի, ով սովորում է թիվ 114 դպրոցի 9-րդ դասարանում:

Երևանի քաղաքապետարանի հանրակրության վարչության պետ Գայանե Սողոմոնյանը Panorama.am-ի թղթակցին տեղեկացրեց, որ իր ավագ աղջիկը սովորել է ԵՊՀ Արևելեգիտության ֆակուլտետի բակալավրիատում և մագիստրատուրայում, ապա Մանկավարժական համալսարանի Իրավագիտության ֆակուլտետում: Հիմա պետհամալսարանի Թուրքագիտության բաժնում հայցորդ է ձևակերպված:

Տղան սովորել է ԵՊՀ-ում, ապա ԳԱԱ-ում: Իսկ փոքր աղջիկը ԵՊՀ Քաղաքագիտության ֆակուլտետում, ապա ԳԱԱ-ում:

«Թոռանս դպրոցի հարցը ծնողները պիտի որոշեն: Մայրն աշխատում է Պուշկինի անվան դպրոցում, հաստատ որոշել ենք, որ երեխան այդ դպրոց չի հաճաի: Չենք ուզում նույն դպրոցում լինեն: Ես խորհուրդ եմ տվել, որ դիմեն բնակավայրին մոտ դպրոցը, որ հարմար լինի, երեխան տրանսպորտի մեջ ժամանակ չկորցնի»,- ասաց նա:

Հավելենք, որ ԿԳՆ ուղարկած մեր հարցման մեջ խնդրել էինք պարզաբանել նաև, թե ինչ պատճառով կամ չափանիշերով է ընտրվել ծնողի կողմից այս կամ այն դպրոցը/բուհը: Այս մասը անպատասխան էր մնացել: