Ձեր վստահելի աղբյուրը

Ավստրիայի մայրաքաղաք Վիեննայում Իրանի և «5+1 խմբի» միջև տեղի ունեցած հինգօրյա բանակցություններն ավարտվեցին: Իրանական ԶԼՄ-ների հաղորդմամբ՝ հաջորդ հանդիպումը նախատեսվում է անցկացնել հուլիսի 2-ին՝ կրկին Վիեննայում:

Ինչպես նախորդ հանդիպմանը, այս անգամ ևս իրանական մամուլում լուրեր էին շրջանառվում, համաձայն որոնց՝ կողմերն աշխատում են համապարփակ համաձայնագրի տեքստի վրա, սակայն հանդիպման ավարտին իրանական «ՖԱՐՍ» լրատվական գործակալությունը հաղորդեց, որ այդպես էլ կողմերը համաձայնության չեն եկել համաձայնագրի վերջնական տեքստի մշակման հարցում:

Սովորաբար նման հանդիպումների ավարտին կայանում էր համատեղ մամլո ասուլիս, սակայն իրանական «ԻՍՆԱ» լրատվական գործակալության հաղորդմամբ՝ ԻԻՀ ԱԳ նախարար Մոհամմադ Ջավադ Զարիֆի և ԵՄ արտաքին քաղաքականության և անվտանգության հարցերով բարձր հանձնակատար Քեթրին Էշթոնի ավանդական դարձած համատեղ մամլո ասուլիսը չի կայացել:

Փոխարենը ԶԼՄ-ների ներկայացուցիչներին է հարցազրույց տվել Իրանի արտգործնախարարը. Մոհամմադ Ջավադ Զարիֆը, ամփոփելով բանակցությունների արդյունքները, նշել է, որ վերջնական համաձայնագրի տեքստի մշակման հետ կապված կողմերի միջև որոշ տարաձայնություններ կան:

Իրանի արտաքին գերատեսչության ղեկավարը նշել է, որ հակառակ կողմի մոտ առավելագույն պահանջներ ներկայացնելու միտումներ են նկատվում:

Զարիֆի գնահատմամբ՝ Ատոմային էներգիայի միջազգային գործակալությունն իր ամսական զեկույցում նշել է, որ Իրանը հավատարիմ է մնացել իր ստանձնած պարտավորություններին:

Անդրադառնալով բանակցությունների շարունակման նպատակահարմարությանը՝ ԻԻՀ ԱԳ նախարարը նշել է. «Հուլիսի 2-ին կգանք Վիեննա, այնքան ժամանակ մինչև բանակցություններն օգտակար և անհրաժեշտ կլինեն, այնքան ժամանակ էլ կբանակցենք, որպեսզի արդյունքի հասնենք»:

Հարկ է նշել, որ օրերս Իրանի նախագահ Հասան Ռոհանին իր պաշտոնավարման մեկամյակի առթիվ լրագրողների հետ կազմակերպած հանդիպման ժամանակ, անդրադառնալով «5+1 խմբի» և Իրանի միջև վերջնական համաձայնություն ձեռք բերվելու հավանականությանը, մասնավորապես նշել էր. «Եթե հինգ շաբաթ անց հակառակ կողմը բարի կամք ցուցաբերի, ապա կարող ենք վերջնական համաձայնության հասնել, որն էլ տարածաշրջանի և աշխարհի ամենանշանակալի քաղաքական համաձայնություններից մեկը կլինի»:

ԻԻՀ ԱԳ նախարար Մոհամմադ Ջավադ Զարիֆն էլ ամերիկյան «Վաշինգտոն փոստ» պարբերականում թողարկված հոդվածում հույս էր հայտնել, որ առաջիկա մեկ ամսվա ընթացքում Իրանն ու «5+1 խումբը» կհասնեն համապարփակ համաձայնության:

Նկատենք, որ ս.թ. հունվարի 20-ից արդեն ուժի մեջ է մտել Իրանի և «5+1 խմբի» միջև 2013թ. նոյեմբերի 24-ին ստորագրված համաձայնագրի սկզբնական մասը, որը ստացել է «Համատեղ քայլերի ծրագիր» անունը:

Ժնևյան համաձայնագրի՝ ուժի մեջ մտնելուց հետո ԱՄՆ-ն և ԵՄ-ն Իրանի նկատմամբ սահմանված պատժամիջոցների մի մասը կասեցնելու մասին որոշում ընդունեցին, որից հետո Իրանն էլ դադարեցրեց ուրանի 20 տոկոս հարստացման աշխատանքները:

ժնևյան համաձայնագրի համաձայն՝ արտասահմանյան բանկերում Իրանի նավթի վաճառքից կուտակված 4.2 միլիարդ դոլարը գումարը պետք է ութ մասնավճարներով փոխանցվի Իրանին: Հնդկաստանը և Ճապոնիան համապատասխանաբար 1,6 միլիարդ և 450 միլիոն դոլար արդեն փոխանցել են Իրանին:

Օրերս ԱՄՆ նախագահ Բարաք Օբաման միջուկային ծրագրի շուրջ ձեռք բերված համաձայնության շրջանակներում Իրանի կատարած մի շարք քայլերին ի պատասխան, որոշեց իրանական նավթի նկատմամբ սահմանված պատժամիջոցների մասին օրինագծի կիրառումը 6 ամսով հետաձգել: