Ձեր վստահելի աղբյուրը

«Փարկինգ սիթի սերվիս» ընկերությունը հայտարարություն է  տարածել, ըստ որի պատրաստ է վաճառել ընկերության բաժնետոմսերը: Սա նշանակո՞ւմ է, որ ընկերությունը որոշել է դուրս գալ քաղաքացիների գրպանից, Panorama.am-ը հետաքրքրվեց ընկերության տնօրեն Վազգեն Հարությունյանից:

«Նման բան չկա, մենք երբեք քաղաքացիների գրպանը չենք մտել, մենք կատարում ենք մեր պայմանագրային պարտավորությունները քաղաքապետարանի հետ կապված: Քաղաքացին մեզ չի վճարում բացարձակ ոչինչ, քաղաքացին վճարում է տեղական տուրք»,-պատասխանեց ընկերության տնօրենը:

Վ. Հարությունյանն այս պահին չհրապարակեց ընկերության կատարած ներդրումների ու եկամուտների չափը, ասաց, որ հաջորդ շաբաթ պաշտոնական ու հրապարակային հայտարարություն են անելու:

«Հապճեպ կայացրած որոշում չէ: Բաժնետերերի ժողովի արդյունքում նմանատիպ հայտարարություն ձևավորվեց, պատճառն այն է, որ մամուլում, տարբեր քաղաքական ու ոչ քաղաքական գործիչների կողմից բազմաթիվ շահարկումներ են տեղի ունենում, որ կազմակերպությունը գերշահույթ է ստանում, այդ պատճառով կազմակերպությունը որոշեց մեր կատարած ներդրումների գնով ընկերության ողջ բաժնետոսմերը վաճառել»,-ասաց Panorama.am-ի զրուցակիցը, չհստակեցնելով, թե հատկապես ում քննադատությունից կամ մեղադրանքից են նեղացած:

Վ. Հարությունյանը վստահ չէ, որ գնորդ կգտնվի, ասում է՝ ժամանակը ցույց կտա, իսկ եթե չգտնվի ընկերության նախագահի խոսքով, իրենք կապացուցեն, որ ընկերությունը գերշահույթով չի աշխատում:

«Եթե գերշահույթ կա, ապա յուրաքանչյուր շահագրգռված մարդ կցանկանա գերշահույթ ստանալ»,-ասաց նա:

Հիշեցնենք, որ «Դուրս մեր գրպանից» քաղաքացիական նախաձեռնության պահանջներից մեկն էլ մայրաքաղաքում կարմիր գծերով վճարովի ավտոկայանատեղերի վերացումն է: