Ձեր վստահելի աղբյուրը

«Դեղերի մասին» ՀՀ նոր օրենքն ամբողջությամբ կարգավորելու է դեղերի շրջանառության ոլորտը՝ սկսած դեղի արտադրությունից, փորձարկումից, մինչև դեղի գրանցում, շրջանառություն դեղատնային ցանցում: Լրագրողների հետ զրույցում ասաց «Դեղերի և բժշկական տեխնոլոգիաների փորձագիտական կենտրոն» ՓԲԸ տնօրեն Հակոբ Թոփչյանը:

««Դեղերի մասին» նոր օրենքը տարբերվելու է հնից, ժամանակակից է, ավելի հստակեցված»,- նշեց նա:

Ըստ Հ. Թոփչյանի, օրենքի մշակման ժամանակ քննարկվել է նաև կեղծ և անորակ դեղերի հարցը:

«Կեղծ դեղ հասկացողությունն, անկասկած, արդիական է, ամբողջ աշխարհում է տարածված: Հայաստանն էլ զերծ չի մնացել կեղծ դեղերից, թեև կարծում էինք, որ մեր շուկան փոքր է, հսկողություն կա: Սակայն վերջին տարիներին կեղծ դեղեր հայտնվեցին ինչպես անմիջական շուկայում, այնպես է ներմուծման տարածքում»,- ասաց «Դեղերի և բժշկական տեխնոլոգիաների փորձագիտական կենտրոն»-ի տնօրենը՝ հավելելով, որ նոր օրենքը հստակեցնելու է կեղծ դեղերի հետ կապված պայքարը:

2013 թվականին, ըստ Հ. Թոփչյանի, 4-5 կեղծ դեղ են հայտնաբերել Հայաստանի տարածքում. «Բավականին լուրջ դեղեր էին, շուկայում օգտագործվող»:

Մինչև 2013 թվականի ստուգիչ օրգաններ չեն եղել: Նախորդ տարվա հունվարի 1-ին բացվել է առողջապահության տեսչությունը: Այս տարի դիտարկում չի իրականացվել:

Նա նշեց, որ այսօր Հայաստանում կան չգրանցված դեղեր, բայց որոնք մյուս պետությունների կողմից ընդունելի են: Նոր օրենքով այդ երևույթը ևս կարգավորվելու է, որպեսզի շուկայում միայն գրանցված դեղ լինի:

Ինչ վերաբերում է դեղատոմսերին, նոր օրենքը, Հ. Թոփչյանի խոսքով, պահանջ է դնելու, որպեսզի դեղատնից ցանկացած դեղի բացթողում կատարվի դեղատոմսով. «Դեղատոմսի առկայությամբ կվերահսկենք դաշտի մաքրությունը, մեկ աստիճանով կբարձրանա առողջապահության որակը բուժական մակարդակի մեջ»:

Հ. Թոփչյանը ասաց, կփորձեն, որ այս տարվա մեջ արդեն «Դեղերի մասին» ՀՀ նոր օրենքն ընդունվի: