Ձեր վստահելի աղբյուրը

Հուլիսի 1-ից Լեռնային Ղարաբաղի Հանրապետությունում ներդրվում է Ծննդօգնության պետական հավաստագրերի համակարգը: Ինչպես Panorama.am-ի թղթակցի հետ զրույցում նշեց ԼՂՀ առողջապահության նախարարության բժշկական օգնության կազմակերպման աշխատանքների համակարգող Կարինե Արշակյանը, Ծննդօգնության պետական հավաստագրերը կտրվեն հղիության նախածննդյան հսկողություն իրականացնող բուժհաստատությունների՝ կանանց կոնսուլտացիաների կողմից:

Նշենք, որ հավաստագիրը ներդրվում է ԼՂՀ առողջապահության նախարար Հարություն Քուշկյանի նախաձեռնությամբ:  2008 թ-ին Հայաստանում նույնպես ներդրվեց Ծննդօգնության պետական հավաստագրի համակարգը:

Ըստ Կ.Արշակյանի` այս փաստաթղթով հղին կարող է դիմել իր նախընտրած բուժհաստատությանը՝ ծննդօգնության ծառայությունից օգտվելու համար: Այսպիսով, հավաստագիրը հանձնելով կինը ստանում է անվճար բուժօգնություն՝ պետության կողմից երաշխավորված անվճար հիվանդանոցային մանկաբարձական օգնություն, որն ընդգրկում է ծննդալուծման համար անհրաժեշտ միջոցառումների ամբողջ ծավալը՝ դեղերով և բժշկական պարագաներով ապահովում, լաբորատոր-գործիքային ախտորոշիչ անհրաժեշտ հետազոտություններ, անհրաժեշտության դեպքում` բուժական միջամտություններ և այլն:

«Սա մեկ անգամ ևս փաստում է, որ Արցախում կինը գտնվում է պետության հսկողության ներքո»,- ասաց Կ.Արշակյանը:

Նա Արցախի առողջապահության ոլորտում իրականացվող այս բարեփոխումը դիտարկում է որպես ժողովրդագրական
ցուցանիշների բարելավմանն ուղղված կարևոր քայլերից մեկը:

«Արցախում ծնելիության խնդիրը կարևոր նշանակություն ունի և հավաստագրի ներդրումը ծնելիության խրախուսման պետական մոտեցման կարևորագույն քայլերից մեկն է հանդիսանում»,- ասաց նա` հավելելով, որ պետության կողմից ծնելիության ցուցանիշները բարձրացնելու համար շարունակելու են ձեռնարկել մի շարք ծրագրեր:

Կ.Արշակյանը կարևորեց նաև այն, որ Ծննդօգնության հավաստագիրը տրամադրվելու է մինչև հղիության 12 շաբաթական ժամկետում հաշվառման կանգնած կանանց:

«Երբ հղիները ուշ են կանգնում հաշվառման, իրենց մոտ բավականին բարդություններ են առաջանում, ինչպես նաև մանկական մահացության թիվն է ավելանում: Ուստի, այս հավաստագրի ներդրումը կնպաստի հնարավորինս այդ խնդիրներից խուսափելուն, և Արցախում առողջ երեխաներ կունենանք»,- ասաց Կ.Արշակյանը:

Նա նաև հավելեց, որ Ծննդօգնության հավաստագրի ներդրման շնորհիվ հանրապետությունում զգալի կբարձրանա նախածննդյան հսկողության վերցված հղիների և ծնելիության ցուցանիշների աճը:

Այսօր Ստեփանակերտում գործում է Մոր և մանկան առողջության պահպանման կենտրոն, ինչպես նաև` 7 շրջանային բուժկենտրոն, 5 տեղամասային հիվանդանոց, որոնք նույնպես ծնունդներ ընդունելու իրավունք ունեն:

Այդուհանդերձ, ըստ Կ.Արշակյանի, Արցախում ծնունդների հիմնական մասը իրականացվում է Մոր և մանկան առողջության պահպանման կենտրոնում:

Նշվեց նաև, որ 2013 թվականին Արցախում ծնվել է 2371 երեխա, իսկ 2012թ-ին` 2500 երեխա: