Ձեր վստահելի աղբյուրը

Ավարտվում է Վայոց Ձորի մարզում Հայկական ակնաբուժության նախագծի (ՀԱՆ) և Orange Հիմնադրամի համատեղ ծրագիրը, որի նպատակն էր մարզի բնակիչների համար անցկացնել անվճար ակնային զննումներ և իրականացնել բուժումներ սոցիալապես անապահով անձանց համար:

Orange հիմնադրամի լրատվական ծառայությունից հայտնում են, որ ծրագրի շրջանակներում շուրջ 1,000 մեծահասակներ անցել են ակնային հետազոտություն, որոնցից 200-ն անցել է խորացված հետազոտություն Աչքի շարժական հիվանդանոցում: Մարզում ծրագրի արդյունքներով 120 հոգի անվճար վիրահատվել է, իսկ 50 հոգի՝ ստացել անվճար լազերային բուժում: Ծրագրի շրջանակներում սեպտեմբեր ամսին Վայոց Ձորի դպրոցներում ակնային զննումներ և ակնային խնամքի հանրակրթական դասընթացներ կիրականացվեն նաև երեխաների համար:

«Օրանժ Հիմնադրամը մեծապես կարևորում է Հայկական ակնաբուժության նախագծի հետ համատեղ իրականացվող «Լույս հայի աչքերին» ծրագիրը: Ուղղված լինելով բացառապես Հայաստանի մարզերի բնակչությանը՝ ծրագիրն իրական ու շոշափելի փոփոխություն է բերում մարդկանց կյանքում: Այսօր ամփոփում ենք Վայոց Ձորում ծրագրի արդյունքները և գոհունակությամբ ենք նշում, որ այս մարզում շուրջ 1000 մարդ օգտվել է անվճար ակնաբուժական ծառայություններից: Վայոց Ձորից Աչքի շարժական հիվանդանոցը կուղևորվի Գեղարքունիքի մարզ, որտեղ արդեն մեկնարկել են ակնային զննումները», - ասել Orange Հիմնադրամի գլխավոր քարտուղար Լիլիթ Մարտիրոսյանը:

«Սա մեր վեցերորդ այցն է Վայոց Ձոր: Ուրախ ենք, որ արդեն երկրորդ անգամ այցելություններն իրականացնում ենք Orange Հիմնադրամի հետ միասին: Մարզի բնակչությունն այդքան էլ մեծաքանակ չէ, սակայն ակնային ծառայությունների հասանելիությունը շարունակում է խնդիր մնալ մարզի համար: Ուստի և իրականացված աշխատանքները հատկապես անհրաժեշտ էին մարզում ակնային խնդիրներ ունեցող սոցիալապես անապահով մարդկանց համար», - ասել է ՀԱՆ-ի հայաստանյան գրասենյակի տնօրեն Նունե Եղիազարյանը:

Հայկական ակնաբուժության նախագծի և Orange Հիմնադրամի համատեղ 2014 թ. ծրագրի շրջանակներում, ըստ աղբյուրի,  ընդհանուր առմամբ Հայաստանի հինգ մարզերում նախատեսվում է հետազոտել 11,300 մեծահասակների և 4,600 երեխաների, տրամադրել շուրջ 2,000 ակնոց: Շարժական հիվանդանոցը պատրաստ է իրականացնել ավելի քան 1,000 վիրահատություն և լազերային բուժում: Ակնային զննումներին զուգահեռ՝ մարզերի դպրոցներում կազմակերպվում են նաև ակնային խնամքի վերաբերյալ հանրակրթական դասընթացներ:

Հիմնադրամից նշում են, որ սկսած 2011 թ.՝ Հայկական ակնաբուժության նախագծի (ՀԱՆ) և Orange Հիմնադրամի համագործակցության շնորհիվ ավելի քան 50,000 հոգի (40,688 մեծահասակներ և 9,997 երեխաներ) անցել են ակնային զննումներ, 6,498 բնակիչներ անցել են կրկնակի մանրամասն հետազոտություն Աչքի շարժական հիվանդանոցում, իրականացվել է 3,768 վիրահատություն և լազերային բուժում, դուրս է գրվել 18,140 ակնոց, 3,659 երեխաներ 53 մարզային դպրոցներում անցել են ակնային խնամքի դասընթացներ: Ծրագիրը գործել է Հայաստանի ինը մարզերում, որոնցից Շիրակի, Արագածոտնի, Արարատի և Վայոց Ձորի մարզեր իրականացվել են կրկնակի այցելություններ: