Ձեր վստահելի աղբյուրը

ՀՀ առողջապահության նախարարի տեղակալ Սերգեյ Խաչատրյանը և Հայաստանում Հնդկաստանի արտակարգ և լիազոր դեսպան Սուրեշ Բաբուն այսօր ստորագրել են «Հայաստանի Հանրապետության կառավարության և Հնդկաստանի Հանրապետության կառավարության միջև հեռաբժշկության ցանց ստեղծելու մասին» փոխըմբռնման հուշագիր:

ՀՀ ԱՆ լրատվական ծառայությունից տեղեկացնում են, որ Հնդկաստանի աջակցությամբ Երևանի մեկ և մարզային 9 բժշկական կենտրոններին կհատկացվեն հեռաբժշկության ժամանակակից տեխնիկական սարքավորումներ: Դա հնարավորություն կստեղծի այդ հիվանդանոցների և Հնդկաստանի առաջատար բժշկական հաստատությունների միջև կազմակերպել մասնագիտական փոխադարձ խորհրդատվություն, փորձի և գիտելիքների փոխանակում, ինչը կբարձրացնի հիվանդությունների ախտորոշման և բուժման մակարդակը:

«Մոտ երկու տարի է, ինչ առողջապահության նախարարությունը Հնդկաստանի կառավարության հետ բանակցում է հեռաբժշկության ցանց ստեղծելու ծրագրի շուրջ: Հայկական կողմն ընդունել է տեղեկատվական-տեխնոլոգիական փորձագիտական խումբ, որոնք իրականացրել են կարիքների գնահատում և մշակել են ծրագրի իրականացման ուղղությունները»,- նշել է Սերգեյ Խաչատրյանը, ում գնահատմամբ հեռաբժշկության ցանցի ստեղծումը որակապես փոխում է որակյալ բուժօգնություն ապահովելու, հիվանդներին ախտորոշելու, երկու երկրների բժշկական կազմակերպությունների մասնագետների միջև գիտակրթական կապ հաստատելու գործընթացը:

«Այս ծրագիրը ոգևորիչ է, և հույս ունենք, որ առաջիկայում այն հաջողությամբ կպսակվի»,- ընդգծել է առողջապահության փոխնախարը` հավելելով, որ համաձայնագրի ստորագրմամբ ստեղծվում է մի համակարգ, որտեղ ներգրավված են լինելու առողջապահության առաջնային և երկրորդային օղակները:

Պատասխանելով լրագրողների հարցին` Սերգեյ Խաչատրյանը մատնանշել է 1988 թվականի Սպիտակի երկրաշարժի տարիներին ԱՄՆ-ի հետ հայ մասնագետների հետ հեռակապ հաստատելու առաջին հաջողված օրինակը:

«Հետագա տարիներին բժշկական տարբեր հաստատություններ ապահովված են եղել հեռակապով, սակայն համակարգային լայնածավալ միջոցառումներ չեն իրականացվել: Սա առաջին միջպետական համագործակցությունն է»,- նկատել է փոխնախարարը:

«Համոզված եմ, որ այս հուշագրի ստորագրումն առողջապահության ոլորտում հայ-հնդկական հարաբերությունների ակտիվացման նոր սկիզբ է»,- ասել է Սուրեշ Բաբուն` ընդգծելով, որ փաստաթուղթը առողջապահության ոլորտում հայ-հնդկական հարաբերությունների զարգացման բոլորովին նոր շրջափուլ է:

Դիվանագետը հույս է հայտնել, որ հեռաբժշկության ցանցին կարճ ժամանակում կհաջողվի դրական արդյունքներ գրանցել:
Հնդկական կողմի աջակցությամբ Հայաստանի բժիշկների, բուժքույրերի, հեռաբժշկության ոլորտում տեխնիկական աշխատողների համար կկազմակերպվեն նաև շարունակական զարգացմանն ուղղված կրթական ծրագրեր:

Հեռաբժշկության զարգացման գործում Հնդկաստանը մեծ փորձ ունի և այդ երկրի աջակցությունը խիստ օգտակար կլինի մարզային բժշկական կենտրոնների աշխատանքի բարելավման, ինչպես նաև հայ մասնագետների որակավորման բարձրացման ուղղությամբ:

Նախատեսվում է, որ ստորագրված հուշագրի շրջանակներում նշված աշխատանքներն իրականացնելու համար Հնդկաստանը կներդնի շուրջ 530.250 ԱՄՆ դոլար:

Հուշագրի ստորագրման արարողությունից անմիջապես հետո Հայաստանում Հնդկաստանի արտակարգ և լիազոր դեսպանի գլխավորած պատվիրակությանը ընդունել է ՀՀ առողջապահության նախարարը: Կողմերը անդրադարձ են կատարել առողջապահության ոլորտում երկու երկրների համագործակցության երկարամյա փորձին, ինչպես նաև քննարկել են համագործակցության առաջիկա հեռանկարները, որոնք վերաբերում են մասնավորապես բժշկական կրթությանը, դեղագործությանը, այլ ոլորտների: