Ձեր վստահելի աղբյուրը

Good Country Index վերլուծական կենտրոնը կատարել է ծավալուն ուսումնասիրություն և հրապարակել այն երկրների ցանկը, որոնք մարդկության զարգացման գործում ունեցել են ամենամեծ ներդրումը: Ցուցակում ընդգրկված է Հայաստանը: 125 երկրների շարքում մեր երկիրը զբաղեցրել է 72-րդ հորիզոնականը:

Ցոցակում Հայաստանին նախորդում է Բոսնիա Հերցեգովինան, հաջորդում՝ Մոզամբիկը: Ռուսաստանը այդ ցուցակում 95-րդն է:

Good Country Index վարկանիշը, դատելով ամենայնից, մի խումբ մարդկանց անհատական նախաձեռնության արդյունք է, որի նպատակն ըստ հեղինակների՝ «համամարդկային նվաճումների մեջ տարբեր երկրների ներդրումը գնահատելն է»:
Վարկանիշի մասին տեղեկատվությունը միայն պաշտոնական կայքում զետեղված հաղորդագրությունն է, որից տեղեկանում ենք, որ վարկանշավորումը իրականացվել է մի շարք պարամետրերի հիման վրա՝ օգտագործելով ՄԱԿ-ից և միաջզգային այլ կառույցներից ստացված տվյալները:

Բոլոր երկրներն ընդհանուր առմամբ դասակարգվել են յոթ խումբ պարամետրերով, որոնցից յուրաքանչյուրով երկրին տրվում է որոշակի վարկանիշ: Այնուհետև դրանց միջինը դառնում է երկրի ընդհանուր վարկանիշը:

Առաջին խումբը «Գիտություն և տեխնոլոգիան» է, որտեղ ներառված են հետևյալ պարամետրերը՝ «միջազգային ուսանողներ», «արտահանված ամսագրեր», «միջազգային հրապարակումներ», «Նոբելյան մրցանակներ» և «արտոնագրեր»: Այս ցուցանիշով Հայաստանը 125 երկրների շարքում 50-րդն է:

Երկրորդ խումբը «Մշակույթն» է, որտեղ ներառված են «ստեղծագործական իրերի արտահանում», «ստեղծագործական ծառայությունների արտահանում», «ՅՈՒՆԵՍԿՕ-ին անդամավճարի և պարտքի հարաբերակցություն», «տեղաշարժման ազատություն», «մամուլի ազատություն»: Այս ցուցանիշով Հայաստանը 98-րդն է:

Երրորդ խումբը «Միջազգային խաղաղություն և անվտանգությունն» է: Խմբում առկա «խաղաղապահ զորքեր», «ՄԱԿ-ի խաղաղապահ բյուջեին կատարված անդամավճարներ», «միջազգային բռնի հակամարտություն», «սպառազինությունների արտահանում», «համացանցի անվտանգություն» պարամետրերի համադրմամբ, ըստ հեղինակների, Հայաստանը 125 երկրների շարքում 39-րդն է:

Չորրորդ խումբն «Աշխարհակարգն» է, որտեղ ներառված են «Բարեգործության տրամադրում», «Հյուրընկալած փախստականներ», «Արտաքսած փախստականներ», «Բնակչության աճ», «ՄԱԿ-ի պայմանագրերի ստորագրում» պարամետրերը: Հայաստանն այս ցուցանիշով 72-րդն է:

Հինգերորդ խմբում՝ «Մոլորակ և կլիմա», ներառված են «կենսազանգվածի պաշար», «վտանգավոր արտանետումներ», «օրգանական ջրի աղտոտման ծավալներ», «ածխաթթվական գազի արտանետումներ», «ջերմոցային էֆֆեկտ ապահովող այլ գազերի արտանեռտումներ»: Այս ցուցանիշով Հայաստանը 95-րդն է:

Վեցերորդ խմբում՝ «Բարգավաճում և հավասարություն», ներառված են «ազատ առևտուր», «արտերկրում ՄԱԿ-ի կամավորներ», «ազատ առևտրի շուկայի ծավալը», «օտար երկրներում ներդրումների ծավալը», «աջակցությունը զարգացմանը»: Այս ցուցանիշով Հայաստանը 15-րդն է:

Յոթերորդ խումբը՝ «Առողջություն և բարեկեցություն», ներառում է«պարենային օժանդակություն», «դեղամիջոցների արտահանում», «ԱՀԿ-ին կամավոր նվիրատվություններ», «հումանիտար օգնության տրամադրում», «թմրանյութերի բռնագրավում» պարամետրերը, որոնց համադրմամբ Հայաստանը դասակրվել է 110-րդ հորիզոնականում:

Բոլոր յոթ խմբերի արդյունքներով Հայաստանը 125 երկրների շարքում զբաղեցրել է 72-րդ հորիզոնականը:

Ներկայացված վարկանիշային աղյուսակում Հայաստանն առաջ է անցել իր բոլոր հարևաններից. Վրաստանը ցանկում 77-րդն է, Թուրքիան՝ 79-րդը, Իրանը 115-րդը, Ադրբեջանը՝ 122-րդը:

Ցուցակը գլխավորում են Իռլանդիան, Ֆինլանդիան, եզրափակում են Վիետնամն ու Լիբիան: