Ձեր վստահելի աղբյուրը

«Իլհամ Ալիևի վերջին տարիների ելույթները իրար այնքան են կրկնում, որ կարելի է անգամ չկարդալ, չլսել և մեկնաբանել: Անընդհատ հնչում են նույն նախադասությունները: Այս անգամ մեր հարևան սուլթանության ղեկավարը չափն անցավ, այն առումով, որ առաջին անգամ Եվրոպական կառույցում տարածքային հավակնություններ ներկայացրեց Հայաստանի ամբողջ տարածքի նկատմամբ: Ինչ վերաբերում է սպառնալիքներին, ապա դրանք սովորականից ավելի քիչ էին: Երևում էր, որ Ալիևը ինչ-որ չափով հասկանում է, թե որտեղ է գտնվում: Դրա հետ մեկտեղ` իհարկե ոչ մի նոր «միտք», ըստ էության, չհնչեց և մատուցվեց նույն սուտն ու կեղծիքը, որին մենք ականատես ենք արդեն տասնայակ տարիներ»,- մեկնաբանելով ԵԽԽՎ լիագումար նիստում Ադրբեջանի նախագահի ելույթը` panorama.am-ի հետ զրույցում նման տեսակետ հայտնեց քաղաքագետ Լևոն Մելիք-Շահնազարյանը:

«Ալիևը սովոր չէ, որ իրեն քննադատում են, մանավանդ, դեմ առ դեմ: Եվ բանական է, որ հիմնականում քննադատական հարցերի տարափը ափերից հանեց նրան: Նրա ոչ ադեկվատ պահվածքը, հատկապես Իռլանդացի պատգամավորին պատասխանելու ժամանակ, բավական տհաճ տպավորություն է փողնում: Սա, կարծում եմ, բնական է, քանի որ բռնապետի համար անընդունելի է անգամ ոչ ականջահաճո հարցը»,- նշեց մեր զրուցակիցը:

Լ.Մելիք-Շահնազարյանը, միևնույն ժամանակ իր դժգոհությունը հայտնեց այն կապակցությամբ, որ հայկական պատվիրակությունը չի հակադարձել Ադրբեջանի ղեկավարին:

Հատկանշական է, որ օրերս Ադրբեջանի նախագահի աշխատակազմի ղեկավարի տեղակալ, արտաքին կապերի բաժնի ղեկավար Նովրուզ Մամեդովը խիստ քննադատության էր ենթարկել միջազգային մի շարք կառույցներին, այն բանի համար, որ նրանք «աչք են փակում ադրբեջանական հողերի բռնազավթման վրա»:

Մամեդովի խոսքով` Արևմուտքը մեծ աղմուկ է բարձրացնում Ադրբեջանի ներսում առկա խնդիրների կապակցությամբ, իսկ ահա Ադրբեջանի վարաբերյալ «արդարության վերականգման» գործում «հապաղում է»:

Նովրուզ Մամեդովի հայտարարությանը նախորդել էր նրա անմիջական ղեկավար` Ադրբեջանի նախագահի աշխատակազմի ղեկավար Ռամիզ Մեհթիևի հայտարարությունը, ով սուր քննադատության էր ենթարկել երկրում ԱՄՆ դեսպան Ռիչարդ Մորնինգսթարին, այն բանի համար, որ վերջինս «Ազատություն» ռադիոկայանի ադրբեջանական ծառայությանը տված հարցազրույցում՝ ի թիվս այլ հարցերի՝ անդրադարձել էր Ադրբեջանի ներքաղաքական գործընթացներին: Մեհթիևը, մասնավորապես, դիվանագետին մեղադրել է Ադրբեջանի ներքին գործերին միջամտելու համար:

Լ.Մելիք-Շահնազարյանը կարծում է, որ Բաքուն այս տեսանկյունից երկակի խաղ է վարում:

«Երկրի ղեկավարությունը անխնա քննադատում է Արևմուտքին, իսկ նույն ղեկավարության կողմից վերահսկվող ԶԼՄ-ները նույն «անողոքությամբ» քննադատում են Ռուսաստանին: Այս չարչիական քաղաքականության շնորհիվ, Բաքուն կարող է Արևմուտքին ասել, թե, տեսեք, հասարակությունը ձեր կողմն է, սակայն Ռուսաստանը մեզ վրա ճնշում է գործադրում: Իսկ Կրելմլին կարող է ցույց տալ, թե չնայած նրան, որ հասարակությունն ու ԶԼՄ-ները ձեր դեմ են, մենք շարունակում ենք պաշտպանել ձեր շահերը տարածաշրջանում: Սա բավական հետաքրքիր կրկնակի խաղ է, սակայն ես չեմ կարծում, որ աշխարհաքաղաքական ակտորները դեռևս չեն բացահայտել այն: Պարզ է որ հավերժ այս իրավիճակը շարունակվել չի կարող»,- նշեց Լ.Մելիք-Շահնազարյանը:

Քաղաքագետ Սերգեյ Մինասյանը իր հերթին ևս կիսում է այն տեսակետը, որ Իլհամ Ալիևի ելույթում որևէ նոր շեշտադրում, ըստ էության, չհնչեցվեց:

«Ես կարծում եմ որ այստեղ որևէ նոր բան մենք չլսեցինք: Արևմուտքի և Ռուսաստանի միջև ընթացող նոր սառը պատերազմի պայմաններում, Բաքուն ավելի ու ավելի վստահ է զգում իրեն, և իրեն թույլ է տալիս առավել արհամարհանքով վերաբերվել Եվրոպական կառույցներին: Այս առումով, Ալիևը իրեն թույլ է տալիս այն, ինչի մասին դեռ մի քանի տարի առաջ անգամ մտածել չէր կարող»,- ասաց Ս.Մինասյանը:

Մեր զրուցակցի կարծիքով, Ադրբեջանի ղեկավարի կտրուկ պահվածքը նրա աշխատակազմի ղեկավարության կողմից վերջին շրջանում Արևմուտքի հասցեին հնչող սուր քննադատության տրամաբանական շարունակությունն են:

«Մյուս կողմից ԵԽԽՎ-ն և եվրոպական այլ կառույցները այս պահին շարունակում են կորցնել իենց համբավը և նշանակությունը: Բավական զավեշտալի է, որ այս կառույցում այժմ նախագահում է Ադրբեջանի նման երկիր, որն այս պահին ունի ավելի շատ քաղբանտարկյալներ, քան թե մնացած բոլոր երկրները միասին»,- հավելեց Ս.Մինասյանը:


Հարակից հրապարակումենր`

Ադրբեջանի նախագահը խեղաթյուրում է իրականությունը. Հայ պատվիրակը արձագանքել է ԵԽԽՎ-ում Ալիևի ելույթին

«Ադրբեջանի նախագահությունը շատ խնդրահարույց է, ինչի մասին այսօր ևս բարձրաձայնեցին ԵԽԽՎ պատվիրակները»

Ճի՞շտ էր որոշումը` որևէ հարց չուղղել Ալիևին. Հովհաննիսյանի մեկնաբանությունը

ԵԽԽՎ-ում Ալիևը պաշտպանվում էր՝ «հարձակվելով» պատգամավորների վրա

Եվրոպան ականտես է Ալիևի ոչ ադեկվատությանն իր ողջ հմայքով. Ա.Հովհաննիսյան

Ալիևի ելույթի ժամանակ ակտիվիստները կապել են բերանները (լուսանկար)

Հայկական պատվիրակությունը որևէ հարցով չի դիմի Ալիևին. Հ.Նաղդալյան