Ձեր վստահելի աղբյուրը

«Անունը կնքենք արդեն. Էրդողանը թուրքի թշնամին է»: Այս վերտառությամբ հոդված է հրապարակվել թուրքական «Գազիանթեփ հաբեր» լրատվական կայքում: Հեղինակ Զահիդե Ուչարի բնորոշմամբ` Ռեջեփ Թայիփ Էրդողանը սատանայական թակարդներով զավթել է Թուրքիայի կառավարության ղեկավարի պաշտոնը և պատերազմ է հայտարարել թուրքական դրոշին, ազգային պետությանը, տարածքային ամբողջականությանը և լեզվին:

«Այն ամենը, ինչ պետությանն է պատկանում, նա զավթիչ ուժերի հրամանատարի պես դիտում է որպես ռազմավար և թալանում»,- նշում է հոդվածագիրը` Էրդողանին մեղադրելով հակաադրբեջանական պահվածքի ու հայամետ դրսևորումների համար:

«Էրդողանը թուրքի թշնամին է, Ադրբեջանը թուրքական պետություն է, դրա համար էլ Հայաստանին քծնում է, իսկ Ադրբեջանի դրոշը աղբաման է նետվում»,- գրում է իր հոդվածում:

Հոդվածագիրը թվարկում է, Թուրքիայի վարչապետի թշնամական գործողություններն` ուղղված ամբողջ թրքության դեմ:

«Չինաստանում կոտորված թյուրք ույգուրների մասին ոչինչ չի ասում ու ճանաչում է Չինաստանի տարածքային ամբողջականությունը:

Հյուսիսային Կիպրոսի Թուրքական Հանրապետության շահերի փոխարեն պաշտպանում է Կիպրոսի շահերը:

Էգեյան ծովում Թուրքիայի Հանրապետության պետական շահերը պաշտպանող ռազմածովային ուժերը կազմալուծեց` հանգստացնելով Հունաստանին: Էգեյանի մեր կղզիները զոհաբերվեցին Հունաստանին:

Սիրիայի մի մասի հաշվին հրեական Քուրդիստան հիմնելու նպատակով ծածուկ պատերազմ է սկսել Բաշար Ասադի դեմ: Աշխարհի ամենավտանգավոր ահաբեկչական խմբավորումները Թուրքիայում հենակետեր, ֆինանսական միջոցներ և զանազան աջակցություն են ստանում:

Էրդողանը Իրաքի թուրքմեններին վաճառել է Ամերիկայի Միացյալ Նահանգներին: Թուրք ժողովրդից խլած փողերով ֆինանսավորվում են «Իրաքի և Լևանտի իսլամական պետություն» (İŞİD) ահաբեկչական խմբավորման զինյալները, որոնք թուրքի արյուն են թափում: Էրդողանը թուրքի մսով է սնվում, թուրքի արյունով է ծարավը հագեցնում: Իրաքում թուրքմենների սպանության համար առաջին պատասխանատուն հանցագործ Էրդողանն է»: