Ձեր վստահելի աղբյուրը

Հայաստանի գլխավոր դատախազի հայտարարությունը, թե Լյուքս Ստեփանյանի սպանության գործով պաշտպանական կողմը վիճարկում է մեղքի հիմնավորվածությունը` պնդելով, որ ինքնաձիգի ձգանը թույլ է եղել, ինչն էլ հանգեցրել է պատահաբար կրակոցի, չի համապատասխանում իրականությանը: Այդ մասին Panorama.am-ի թղթակցի հետ զրույցում հայտարարեց Լյուքս Ստեփանյանի գործով ամբաստանյալ Դավիթ Խաչատրյանի պաշտպան, Փաստաբանների պալատի անդամ Երեմ Սարգսյանը` մեկնաբանելով ՀՀ գլխավոր դատախազ Գևորգ Կոստանյանի երեկվա հայտարարությունը:

Հիշեցնենք` Կոստանյանը երեկ լրագրողների հետ հանդիպմանը խոսելով տվյալ գործի նախաքննության և դատաքննության մասին, հայտարարել էր, որ ինքը գոհ է նախաքննության ընթացքից, այն եղել է իր անմիջական հսկողության ներքո և հավելել. «Պաշտպանության կողմի հիմնական դիրքորոշումը և փաստարկները, որով վիճակվում էր մեղքի հիմնավորվածությունը, կայանում էր նրանում, որ ինքաձիգի ձգանը բավականին թույլ է եղել և դա հանգեցրել է պատահաբար կրակոցի: Այդ հարցի հետ կապված քննչական գործողություններ են կատարվել, դատաձգաբանական փորձաքննության արդյունքում հերքվել է այդ հանգամանքը: Փորձագետը հստակ և միանշանակ պնդել է իր եզրակացության մեջ, որ ձգանը սեղմելու համար անհրաժեշտ է ֆիզիկական ուժի կիրառում, այնպիսի կիրառում, որ պատահականությունը բացառում է»:

Փաստաբանը, սակայն, հստակեցնում է. «Ոչ թե Դավիթ Խաչատրյանի պաշտպանների դիրքորոշումն է դա եղել, այլ Դավիթ Խաչատրյանը դեռևս դեպքի օրը ցուցմունք տալիս, երբ մենք դեռևս ներգրավված էլ չենք եղել որպես նրա պաշտպաններ, ընդամենը իրական տվյալ է հայտնել, որ իրեն ամրացված ինքնաձիգի մեխանիզմում ինչ-որ զսպանակ է բացակայում և իր կարծիքով դրա պատճառով ձգանը ավելի թույլ է եղել: Գլխավոր դատախազը ճիշտ է ասում, որ այդ կապակցությամբ նշանակվել է դատաձգաբանական փորձաքննություն, սակայն այդ փորձաքննությամբ պարզվել է, որ ինքնաձիգի մեխանիզմում իրոք զսպանակ է բացակայում, որը սակայն ձգանի թուլության պատճառ չի հանդիսացել: Սակայն այս պահին դա չէ, որ կարևոր է»:

Փաստաբանը վկայակոչելով փորձագետի նույն եզրակացությունը, ասաց նաև, որ դրա համաձայն ինքնաձիգի վրա պետք է գործադրել 1.8 կգ-ից ավել ուժ, ինչն այն ուժն է, որը մատի շարժումով գործադրվում է ինքնաձիգի ձգանի վրա` կրակոց արձակելու համար:

«Այսինքն, ըստ գլխավոր դատախազի, մեր իրականության մեջ բացարձակապես հնարավոր չէ ինքնաձիգի հետ վարվելիս, հատկապես եթե մատդ դրված է ձգանի վրա, առանց կրակոց արձակելու հատուկ նպատակի, մատի շարժումով պատահական կրակոց արձակվի: Կարծում եմ, որ քչերս կարող ենք այսպիսի կատեգորիկ եզրահանգման հետ համոզվել: Ինչպես ասում են՝ երբեք մի ասեք` երբե՛ք» -ասաց Սարգսյանը:

Փաստաբանի ներկայացմամբ, կրակոցն արձակելու պահին իրադրությունն այլ է եղել. «Դավիթ Խաչատրյանը դատաքննության ընթացքում այս կապակցությամբ հայտնել է, որ զենքը լիցքավորված վիճակում բարձրացրել է ուսագոտու հատված, այն պահել է տաղավարի ուղղությամբ և ցանկացել է կատակով վախեցնել Լյուքս Ստեփանյանին, որից հետո նույն հորիզոնական դիրքով, դեռևս մատը ձգանի վրա դրված իջեցրել է, որպեսզի ուղղի և լիցքաթափի, սակայն այդ ժամանակ ինքնաձիգի պոչամասը դիպել է իր գոտու աջ կողմում ամրացված ենթապայուսակին և հետ չի գնացել, որի պատճառով ձեռքերով մի փոքր ուժ է գործադրել դեպի ներքև և հետ, որպեսզի պոչամասն ազատվի և իջնի ներքև, սակայն ուժի գործադրմանն հետ միաժամանակ այն անմիջապես ազատվել է ենթապայուսակից, ուժը մեխանիկորեն ազդել է ձգանի վրա և այդ պատահական կրակոցը եղել է»:

Ավելին, ըստ փաստաբան Սարգսյանի, Դավիթ Խաչատրյանի այս հայտարարությւոնը դատաքննության ժամանակ ոչ միայն չի հերքվել որևէ ապացույցով, այլև նույնիսկ հաստատվել է վկաների ցուցմունքներով: Մասնավորապես, վկա Արշակ Պետրոսյանը դատարանում ձեռքերով նկարագրել է և շարժումը, և պատմել կատարվածը նույնությամբ: Նույնը հաստատել է նաև գործով մեկ այլ վկա և տուժած Հրաչյա Սարգսյանը:

Փաստաբանի մոտ հարց է առաջանում. «Ինչպե՞ս կարելի է խոսել դիտավորյալ կրակոցի, առավել ևս մեղադրանքի հիմնավորվածության մասին: Ակնհայտ է, որ Դավիթը զենքի հետ վարվելու կանոնների հանցավոր խախտում է թույլ տվել` նա իրավունք չուներ լիցքավորել զենքը և պահել որևէ մեկի ուղղությամբ: Իր այդ հանցավոր գործողության պատճառով էլ անզգուշությամբ մահ է պատճառվել Լյուքսին, որի համար էլ Դավիթը պատասխանատվության է ենթակա ՀՀ քրեական օրենսգրքի 373-րդ հոդվածի 3-րդ մասով»:

Անդրադառնալով դատախազի մյուս հայտարարությանը, թե նախաքննության սկզբնական փուլից, ի սկզբանե արդեն հայտնի էին դեպքի ամբողջական հանգամանքները և պատկերը, փաստաբանը նշեց, որ քննությամբ իրականում բացարձակապես այլ հանգամանքներ են հաստատվել, քան նկարագրել է նախաքննական մարմինը:

«Այսինքն եթե անգամ նախաքննության սկզբնական փուլից ի սկզբանե հայտնի էլ են եղել դեպքի ամբողջական պատկերը և հանգամանքները, ապա դա ընդամենը նախաքննական մարմնի համար և իր սուբյեկտիվ ընկալումների կամ ցանկությունների շրջանակում: Եթե դեպքի ամբողջական պատկերը և հիմնավորումները հենց նախաքննության սկզբնական փուլից են հայտնի եղել, ապա դրանք պետք է նույնը եղած լինեն կամ գոնե առավել ճշտգրտված լինեին նախաքննության փուլի ավարտին, որոնք էլ պետք է ամփոփվեին մեղադրական եզրակացության մեջ»,- հավելեց մեր զրուցակիցը:

Նա մատնանշեց օրինակներ, մասնավորապես, վկայակոչելով մեղադրական եզրակացությունը, ասաց, որ նախաքննական մարմինը հաստատված է համարել այն, որ Դավիթ Խաչատրյանը Լյուքս Ստեփանյանի հնչեցրած հայհոյանքից հետո Դավիթ Խաչատրյանը նշան բռնած դիրքից մեկ կրակոց է արձակել նրա ուղղությամբ: Սակայն դեպքին ականատես հարցաքննված վկաները, ըստ Երեմ Սարգսյանի, բառ անգամ չեն ասել այն մասին, որ Դավիթ Խաչատրյանը նշան է բռնել ու նույն դիրքից կրակել Լյուքսի ուղղությամբ:

«Հարց է ծագում. քննիչը և դատախազն ինչպե՞ս, ի՞նչ ապացույցների հիման վրա են հաստատված համարել, որ Դավիթ Խաչատրյանը ինքնաձիգով նշան է բռնել Լյուքս Ստեփանյանի ուղղությամբ, ապա վերջինիս կողմից չկրակողի հասցեին հայհոյանքներ հնչեցնելուց անմիջապես հետո կրակել է և սպանել նրան, եթե անգամ ականատես վկաներն են հայտնել, որ կրակոցը եղել է այն ժամանակ, երբ ինքնաձիգը գտնվել է Դավիթ Խաչատրյանի գոտկատեղի հատվածում: Եվ քանի որ այդպիսի ապացույցներ քրեական գործում չեն եղել, ապա հարց է ծագում, թե ինչու՞ են նման հանգամանք նշել», -հարցեր են առաջացել փաստաբանի մոտ:

Փաստաբանը վստահ է, որ նախաքննական մարմինը քաջ գիտակցել է, որ Դավիթ Խաչատրյանի կողմից Լյուքս Ստեփանայնին սպանելու դիտավորություն ունենալու հանգամանքը հաստատող ապացույցներ քրեական գործում չեն եղել:

Հարակից հրապարակում`
Լյուքս Ստեփանյանի սպանության գործով նախաքննության արդյունքները գոհացրել են գլխավոր դատախազին