Ի՞նչ է անելու ԵԽԽՎ պատվիրակությունը Երևան վերադառնալուց հետո. Ն.Զոհրաբյան
Ամփոփելով նստաշրջանը պետք է ասեմ, որ 7 տարվա իմ պրակտիկայում` որպես ԵԽԽՎ-ում հայկական պատվիրակության անդամ, սա թերևս ամենալարված նստաշրջաններից մեկն էր և դա պայմանավորված էր ոչ միայն նրանով, որ Ադրբեջանը առաջիկա վեց ամիսներին ԵԽ նախարարների կոմիտեում նախագահող երկիր է լինելու այլ նրանով, որ ԵԽ-ում այլևս բավականին լուրջ իրավիճակներ են ստեղծվում, որոնց մենք պետք է կարողանանք ճիշտ և ադեկվատ արձագանքենք: Այս մասին Panorama.am-ի հետ զրույցում Ստրասբուրգից փոխանցեց ԵԽԽՎ-ում հայկական պատվիրակության անդամ Նաիրա Զոհրաբյանը:
Պատգամավորը կարծիք հայտնեց, որ պատվիրակության անդամները Երևան վերադառնալիս պետք է լայն քննարկում ծավալեն խորհրդարանի և Արտաքին գործերի նախարարության հետ միջազգային կառույցներում իրենց աշխատանքի վերաբերյալ.
«Պետք է ասեմ, որ բավականին լուրջ ջանքեր են պահանջվում նստաշրջանից նստաշրջան հակազդելու ադրբեջանական փողի և խավիարի տոտալ քարոզչությանը, բայց ի պատիվ մեր եվրոպացի գործընկերների, պետք է նշեմ` ակնհայտ է, որ բոլորին գնելու Ադրբեջանի մոլուցքը լուրջ հակազդեցություն է վայելում այն պատգամավորների մոտ, ովքեր չեն ուզում զիջել եվրոպական արժեքները»,- նշեց Ն.Զոհրաբյանը:
Նա ասաց, որ Ադրբեջանը ԵԽԽՎ ֆոյեում տաղավարներ էր տեղադրել, որտեղ ներկայացված էր երկրի անցյալը և այլ տեղեկատվություն: Պատգամավորը նկատել է, որ ի նշան բողոքի և բոյկոտի` Ալիևի ցինիկ ու սանձարձակ ելույթի, ի նշան նրա, որ Ալիևը ուղղակիորեն անձնական վիրավորանքներ հասցրեց եվրոպացի այն գործընկերներին, ովքեր բարձրացրեցին Ադրբեջանում կեղծված ընտրությունների, Ադրբեջանում ձերբակալված բլոգերների, լրագրողների և ակտիվիստների հարցը` եվրոպացիները ուղղակի բոյկոտում են այդ տաղավարները և չեն մտնում:
«Դա նկատելի է, բայց որ մենք ևս լրջագույն անելիք ունենք, քանի ցավոք սրտի դեռևս ԵԽԽՎ բարձրագույն տարբեր պաշտոններում մնում են տարբեր պատգամավորներ, որոնք Ադրբեջանի լոբիստներն են` ակնհայտ է: Ես կարծում եմ` պատվիրակությունը վերադառնալուց հետո կներկայացնի այն լուրջ կուլիսային աշխատանքը, որ մենք արեցինք »,-ասաց նա` նշելով, որ շատ բարձր է գնահատում այդ համախմբված աշխատանքը:
Ն.Զոհրաբյանը նշեց նաև, որ իր համար առնվազն հասկանալի չեն տարբեր դիտարկումներն այն մասով, թե ինչու հայկական պատվիրակությունը լռեց` որակելով դրանք պրիմիտիվ դիտարկումներ, որովհետև եթե հայկական պատվիրակներն ուղղեին այն հարցերը, որոնք իրենց հետ քննարկելով ու խորհրդակցելով ուղղեցին եվրոպացիները, ապա արդյունքում «կռիվը տեղափոխվելու էր հերթական անգամ Հայաստան-Ադրբեջան տիրույթ»:
«Եվ շատ ավելի գրագետ ու ճիշտ աշխատանքի արդյունք եմ ես համարում, որ մեր հարցերը ուղղեցին եվրոպացիները: Եվ հենց դա հունից հանեց Ալիևին, որ մեր գործընկեր ՄակՆամարայի հարցին ի պատասխան ասաց` ես գիտեմ, թե ովքեր են ձեզ ուղորդել և ասել, որ այդ հարցը տաք ինձ: Այնպես որ` նրանք, ովքեր նստած դատողություններ են անում կարծում եմ մի փոքր դիվանագիտական մտածողություն ունենալու դեպքում կհասկանային, որ սա ճիշտ ու գրագետ մարտավարություն էր»,- ասաց ԵԽԽՎ-ում հայկական պատվիրակության անդամն ու կրկնեց` «բայց որ մենք շատ լուրջ աշխատելու տեղ ունենք` մեր դեսպանությունները, մեր ներկայացուցչությունները տարբեր երկրներում պետք է իրենց աշխատաոճը փոխեն ու փորձեն ճիշտ համադրել աշխատանքը խնդիր է»:
«Եվ ես անջամբ նախաձեռնելու եմ քննարկում արտգործնախարարության, մեր դիվանագիտական ներկայացուցչությունների հետ մի քանի լրջագույն խնդիրներ քննարկելու համար, որոնք ես արձանագրեցի այս ընթացքում»,- հավելեց Ն.Զոհրաբյանը:
Նախորդող հրապարակում`
Ադրբեջանը սովորականի պես իր լոլոներով ԵԽԽՎ-ում կրքեր է բորբոքում. Ն.Զոհրաբյան
Այս ամենից, անկեղծ ասած, սկսում է երկակի ստանդարտների ու սուբյեկտիվության խիստ սուր հոտ գալ. Ն.Զոհրաբյան
Ի՞նչ անել, երբ ԵԽ անդամ պետությունը բռնության, ատելության, ռասիզմի ամենաակտիվ քարոզիչն է. Ն.Զոհրաբյանի ելույթը
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
