Ձեր վստահելի աղբյուրը

Երևանն այսուհետ կունենա սեփական ռեժիսորը. Երևանի ավագանին նման հաստիք է սահմանել, ինչը, մեղմ ասած, հարցականներ է առաջ քաշում` Երևանը բեմադրությո՞ւն է, թատրո՞ն, որ պետք է ունենա սեփական ռեժիսոր, ով դրա դիմաց ամսական 196 հազար դրամ աշխատավարձ կստանա, թե՞...

«Այդ հարցը ավագանու նիստում ես էլ հնչեցրեցի, թե ի՞նչ հիմնավորմամբ է այս հաստիքն ավելանում: Պատասխանը հետևյալն էր, թե քանի որ Երևանում անընդհատ տոնակատարություններ են լինում և ամեն անգամ իրենք այդ տոնակատարությունների համար հրավիրում են ռեժիսորի և դա շատ ավելի թանկ է նստում, ավելի նախընտրելի է Երևանի քաղաքապետարանի աշխատակազմում ունենալ հաստիք, ով այդ տոնակատարությունների ռեժիսորը կլինի: Սա, իբրև, ավելի շահավետ է»,-Panorama.am-ի հետ զրույցում ասաց Երևանի ավագանու «Բարև Երևան» խմբակցության ղեկավար Անահիտ Բախշյանը:

Նրա խոսքով, հիմնավորումը իրեն համոզիչ է թվում այն առումով, որ եթե ամեն անգամ պայմանագիր պետք է կնքվի ուրիշների հետ, ավելի լավ է ունենալ. «Բայց դրա արդյունավետությունը հետո կերևա: Երբ ինձ այս հիմնավորումը ներկայացրեցին ես լռեցի, բայց միևնույն է մեջս կա այդ կասկածը. տարեկան Երևանում ընդամենը չորս-հինգ միջոցառում է լինում և, փաստորեն, ստացվում է, որ ավելի թանկ է լինում ռեժիսոր հրավիրելը, քան հաստիք ունենալ ու ամեն ամիս աշխատավարձ տալ... ի վերջո խոսքը տարեկան շուրջ 2.5 մլն դրամի մասին է»:

Այս իրավիճակում, շարունակեց մեր զրուցակիցը, ողջունելին միայն այն է, որ այդուհետ անհաջող միջոցառումների համար հստակ պատասխանատու կունենանք: Ա.Բախշյանն ասաց, որ իր այդ դիտարկումը, թե անհաջող միջոցառումների դեպքում արդեն կունենանք այն մարդուն, ում կդատափետենք և այլն ավագանու անդամները բացասաբար են ընկալել, բայց դա է ճիշտը` լինի մեկ պատասխանատու:

Հարցին` արդեն հայտնի է, թե ով է ստանձնելու այդ պաշտոնը, Ա.Բախշյանը նշեց, թե իրեն դա հայտնի չէ, բայց հաստատ ինչ-որ մեկը կա, ում համար էլ այդ հաստիքը իջեցրել են:

Անդրադարձանք նաև այն խնդրին, որ պետական գերատեսչությունները ուղղակի հաստիքախեղդ եղած են և այստեղ է, որ Երևանի ավագանու անդամը կարևոր է համարում, որ «վերմակը մեր ոտքի երկարությամբ մեկնենք». «Տեսեք. ձևավորվել է մի իրավիճակ, երբ պաշտոնյային մի տեղից հանում են` նախախար լինի, մարզպետ և տանում են խորհրդական, տանում են փոխնախարար կամ օգնական: Եվ մտածում ես` այ մարդ, այդ ինչպե՞ս է ստացվում, որ մի նախարարությունը չորս փոխնախարար է ունենում: Դրանից բացարձակապես չի փոխվում նախարարության գործունեության որակն ու արդյունավետությունը, օրինակ` Քաղաքաշինության նախարարության: Նույնը կարող եմ ասել նաև Երևանի քաղաքապետարանի մասին»:

Նա նաև հավելեց, որ ուռճացված այս ապարատի գումարը գնում է մեր բոլորիս գրպանից և հենց դա է առաջնային խնդիրը: