ՀՀ վարչապետի շնորհավորական ուղերձը Նախագահ Սերժ Սարգսյանին

Հասարակություն 11:26 30/06/2014

ՀՀ վարչապետի շնորհավորական ուղերձը Նախագահ Սերժ Սարգսյանին

ՀՀ վարչապետ Հովիկ Աբրահամյանը շնորհավորական ուղերձ է հղել ՀՀ նախագահ Սերժ Սարգսյանին` ծննդյան 60-ամյակի կապակցությամբ:

Ուղերձում մասնավորապես ասված է.

«Մեծարգո պարոն Նախագահ, սրտանց շնորհավորում եմ Ձեր ծննդյան 60-ամյակի կապակցությամբ: Մաղթում եմ Ձեզ քաջառողջություն և երջանկություն:

Ձեր հոբելյանի մեջ յուրովի խտացված են Հայաստանի անկախության և Արցախի ինքնիշխանության հռչակման գործընթացները, հաղթանակներն ու ձեռքբերումները մարտի դաշտում և պետական շինարարության մեջ:

Ձեր կյանքը և գործունեությունը Դուք ի սպաս եք դրել Հայրենիքի կերտման և հզորացման, հայ ժողովրդի բարօրության ապահովման վեհ գործին: Դուք կանգնած եք եղել նոր Հայաստանի կերտման և Արցախի ազատագրական հաղթական պայքարի ակունքներում՝ Հայրենիքի նկատմամբ Ձեր անմնացորդ նվիրվածությամբ օրինակ ծառայելով գալիք սերունդների համար:

Հայաստանի Հանրապետությունն այսօր կարևոր քաղաքական գործոն է տարածաշրջանում: Ձեր ղեկավարությամբ մենք հաղթահարել ենք բազում մարտահրավերներ՝ ինչպես ներքին, այնպես էլ արտաքին: Այսօր ևս Դուք շարունակում եք իրականացնել հայոց պետականության ամրապնդմանը, հայ ժողովրդի անվտանգ գոյատևմանը, մեր հայրենիքի տնտեսական վերելքի ապահովմանը միտված քաղաքականություն: Վստահ եմ, որ Ձեր առաջնորդությամբ և անմիջական ջանքերով մենք արձանագրելու ենք նոր հաջողություններ:

Պարոն Նախագահ, կրկին շնորհավորում եմ Ձեզ հոբելյանի առթիվ այն համոզմունքով, որ Ձեր գիտելիքներն ու կենսափորձը այսուհետ ևս Դուք ծառայեցնելու եք Հայաստանի Հանրապետության շենացման նվիրական գործին՝ ի շահ համայն հայության»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: