Ձեր վստահելի աղբյուրը

«Էրեբունի» բժշկական կենտրոնում այսօր Մոսկվայի Բակուլևի անվան սիրտ-անոթային վիրաբուժության գիտական կենտրոնի սրտաբան, ակադեմիկոս Բագրատ Ալեքյանը լրագրողների մասնակցությամբ կատարեց սիրտը սնուցող զարկերակների ստենտավորում: Հիվանդը, ինչպես նշեց բժիշկը, ավելի քան 10 տարի ուներ սրտանոթային խնդիրներ:

Կորոնարոգրաֆիան սիրտը սնուցող անոթների՝ զարկերակների հետազոտման եղանակ է, որը ցույց է տալիս պսակաձև (կորոնար) զարկերակների վիճակը, մասնավորապես, զարկերակների նեղացման աստիճանը:

Կորոնարոգրաֆիան ինվազիվ մեթոդ է, որի ժամանակ աճուկային շրջանից ազդրային զարկերակից կամ ձեռքից՝ ճաճանչային զարկերակից հատուկ կաթետերով հասնում են սիրտը սնուցող զարկերակներին, որից հետո ռենտգեն հսկողության տակ գնահատում են զարկերակների վիճակը:

Եթե նեղացում կա, ապա ստենտավորում է կատարվում: Ստենտը, ինչպես բացատրեց բժիշկը, մետաղական ցանց է, որը ուղղորդիչ լարի միջոցով հասցվում է դեպի անոթի խցանված մասը, տեղադրվում է զարկերակի մեջ, այնուհետեւ լայնացվում է:

Կորոնոգրաֆիայի արդյունքում պարզվեց, որ հիվանդի սիրտը սնուցող անոթներից մեկը նեղացած է և խանգարում էր նրան լիարժեք կյանքով ապրել:

Կատարվեց  անոթի ստենտավորում, որը թույլ տվեց սրտի այդ հատվածին ստանալ լիարժեք արյուն. վիրահատությունից հետո անոթը լրիվ բացված է, նեղացած հատվածը այլևս գոյություն չունի:

«Այսպիսով, հիվանդի մոտ կանխվեց հնարավոր ինֆարկտը: Ստենտավորումից հետո հիվանդը վաղն արդեն կարող է տուն գնալ»,- ասաց Բ.Ալեքյանը:

Նշենք, որ «Էրեբունի» բժշկական կենտրոնի անգիոգրաֆիկ ծառայությունը հիմնադրվել է 2003 թվականին: Այն կրում է ակադեմիկոս Բագրատ Ալեքյանի անունը: Բաժանմունքը հագեցած է ժամանակակից տեխնիկայով, որը հնարավորություն է տալիս կատարել ներանոթային միջամտություններ` անգիոգրաֆիա, ստենտավորում՝ ո՛չ միայն սրտի, այլև մնացած բոլոր օրգանների անոթների:

Ակադեմիկոսը նշեց, որ տարեկան 2-3 անգամ այցելում է Հայաստան, ծանոթ է խնդիրներին: Նրա գնահատմամբ` վերջին տարիներին Հայաստանում իրավիճակը փոխվել է, սիրտ-անոթային խնդիրներ ունեցող հիվանդներն այսօր այստեղ հնարավորություն ունեն օգտվելու այն բժշկական ծառայություններից, ինչ արտերկրում է առկա:

Նրա խոսքերով` այսօր 1 մլն բնակչություն ունեցող Երևանում իշեմիկ հիվանդության դեպքում կատարվում է 3000-ից ավելի ստենտավորում, ինչը, ըստ նրա, դրական ցուցանիշ է: Օրինակ` Եվրոպայում 1 մլն բնակչի հաշվով կատարվում է 2000 ստենտավորում:

«Միայն Էրեբունի հիվանդանոցում 2013թ-ին իրականացվել է մոտ 1500 ստենտավորում, որից 500-ը ինֆարկտային շրջանում գտնվող հիվանդների, իսկ մնացածը` խրոնիկ հիվանդների մոտ: Կարծում եմ, որ Հայաստանում իսկապես սիրտ-անոթային հիվանդությունների կանխարգելումը գտնվում է բարձր որակի վրա»,- ասաց Բ.Ալեքյանը:

Ըստ վիճակագրական տվյալների` սրտանոթային հիվանդությունները ամբողջ աշխարհում մահացության և հաշմանդամության պատճառ հանդիսացող հիվանդությունների թվում առաջին տեղն են գրավում: Ուստի, ակադեմիկոսի խոսքերով, այս խնդիրներին պետք է լուրջ ուշադրություն դարձնել:

Մասնավորապես, ըստ Բ.Ալեքյանի, առաջին հերթին պետք է պետական մոտեցում ցուցաբերվի:

«Ինչպես Հայաստանում, այնպես էլ Ռուսաստանում սրտանոթային հիվանդությունները տարածված են, սակայն այսօր Ռուսաստանում սրտի վիրահատությունները խրոնիկ հիվանդների համար իրականացվում է պետական պատվերի շրջանակներում, իսկ մնացած հիվանդների համար` բժշկական ապահովագրության միջոցով: Ժամանակն է, որ Հայաստանում էլ պետությունը այս ուղղությամբ միջոցներ ձեռնարկի»,- ընդգծեց Բ.Ալեքյանը:

Նրա խոսքերով` Հայաստանում սուր ինֆարկտի դեպքում ստենտավորման ժամանակ մահացությունը կազմում է 5 տոկոս, իսկ առանց ստենտավորման` 20-25 տոկոս, իսկ 75 տոկոսը դառնում են հաշմանդամ: «Մենք պետք է աշխատենք Հայաստանի համար ստեղծել այնպիսի մի ծրագիր, որպեսզի այս վիրահատությունները իրականացվեն պետական պատվերի շրջանակներում»,- ասաց ակադեմիկոսը:

Ըստ նրա` Հայաստանում սուր ինֆարկտի դեպքում տարեկան պետք է իրականացվի մոտ 1500 ստենտավորում: Դրա համար հարկավոր է մոտ 3 մլն դոլար, ինչը Բ.Ալեքյանի խոսքերով, ակնքան էլ մեծ գումար չէ, և պետությունը կարող է այդքան գումար տրամադրել:

«Արդյունքում, սրտանոթային հիվանդությունների մահացության դեպքերը կտրուկ կնվազեն: Եթե պետական մոտեցում լինի, ապա մեծ արդյունքներ կգրանցենք. մահացությունը 20 տոկոսից կհասնի 5 տոկոսի»,- նշեց Բ.Ալեքյանը: