Ձեր վստահելի աղբյուրը

Արդարադատության նախարարության Դատական ակտերի հարկադիր կատարման ծառայությունը, այսօր հայտարարելով Մարզահամերգային համալիրի շենքի չորրորդ աճուրդը, շարունակում է իր ապօրինի գործողությունները: Այդ մասին Panorama.am-ին ասաց «Կարեն Դեմիրճյանի անվան մարզահամերգային համալիր» ՓԲԸ-ի փաստաբան Արմինե Հակոբյանը:

Ավելի վաղ Panorama.am-ը տեղեկացրել էր, որ այսօր ժամը 13:00-ին հայտարարված աճուրդը կշարունակվի մինչև հուլիսի 14-ը ժամը 13:00-ն: Այս անգամ շենքի մեկնարկային գինը սահմանվել է 14 մլրդ 106 մլն 150 հազար դրամ: Երրորդ անգամ հայտարարված աճուրդի ժամանակ այն գնահատվել էր 15 մլրդ 673 մլն 500 հազար դրամ: Սկզբում համալիրն աճուրդի էր հանվել 19 350 000 000.0 դրամ մեկնարկային գնով: Նկատենք, որ գնորդի բացակայության դեպքում ամեն անգամ հայտարարվող աճուրդի ժամանակ արժեքը նվազում է:

Մարզահամերգային համալիրն ու Հայաստանի կառավարությունը, հիշեցնենք, դատական վեճի մեջ են: Այդ վեճը դեռ չավարտած, ԴԱՀԿ-ն աճուրդի էր հանել համալիրը՝ մարելու կառավարությանն ունեցած ընկերության պարտք: ԴԱՀԿ-ն սակայն, շենքն աճուրդի հանելուց առաջ, դիմել էր դատարան` խորհուրդ ստանալու, թե արդյոք կարո՞ղ է այս պայմաններում վաճառքի հանել համալիրը, և Կենտրոն և Նորք Մարաշ վարչական շրջանների ընդհանուր իրավասության դատարանն էլ դրական որոշում էր կայացրել: Համալիրի ներկայացուցիչները անօրինական էին համարել դատարանի այդ որոշումը, ինչպես նաև աճուրդ հայտարարելու մասին ԴԱՀԿ որոշումը ու վերաքննիչ բողոք ներկայացրել ՀՀ Վերաքննիչ դատարան:

Դատական այս ատյանը վերջերս բավարարել էր համալիրի փաստաբանի վերաքննիչ բողոքը: Ավելին, դատարանի որոշման մեջ նշված էր հետևյալը. «Երևան քաղաքի Կենտրոն և Նորք Մարաշ վարչական շրջանների ընդհանուր իրավասության դատարանի «թիվ ԵԿԴ/278/02/13 կատարողական թերթը պարզաբանելու դիմումը քննության առնելու մասին» 30.04..2014 թվականի որոշումը բեկանել ու փոփոխել` ԱՆ ԴԱՀԿ ապահովող ծառայության Երևան քաղաքի Կենտրոն և Նորք Մարաշ բաժնի պետի ժամանակավոր պաշտոնակատար Ա. Մեժլումյանի թիվ ԵԿԴ/2788/02/13 կատարողական թերթը պարզաբանելու մասին դիմում մերժել: Սույն որոշումը ուժի մեջ է մտնում հրապարակման պահից հետո և նույն ժամկետում կարող է բողոքարկվել ՀՀ Վճռաբեկ դատարան»:

«Դատարանի այս որոշումից հետո ԴԱՀԿ-ն արդեն չորս անգամ ապօրինի աճուրդ է հայտարարում», -նկատեց փաստաբանը:

Հարակից հրապարակումներ`

Մարզահամերգային համալիրի աճուրդային գործընթացը չի կասեցվել. ԴԱՀԿ

Վերաքննիչ դատարանում Մարզահամերգային համալիրի գործով փաստաբանը բոյկոտել է նիստը

Մարզահամերգային համալիրի շենքը դարձյալ հանվել է աճուրդի