Ձեր վստահելի աղբյուրը

Ներքաղաքական զարգացումների, քառյակից սպասումների ու աշնանը սպասելու անհրաժեշտության մասին Panorama.am-ը զրուցեց «Ժառանգություն» կուսակցության փոխնախագահ Արմեն Մարտիրոսյանի հետ:

-Պարոն Մարտիրոսյան, քառյակի ներկայացուցիչները երեկվա ասուլիսում հայտարարեցին, որ փաստորեն իրենք կոնկրետ գործողություններ դեռևս չունեն և այնպիսի տպավորություն էր, որ ակտիվ գործողությունների այս խորհրդարանական ուժերի միավորումից մինչև աշուն սպասել պետք չէ: «Ժառանգությունն» առանձին որևէ քայլեր պատրաստվում է անել առաջիկայում` բարձրացնելու իր բողոքի ձայնը ընդդեմ էլեկտրաէներգիայի սակագնի բարձրացման:

-Անձամբ իմ կարծիքն այն է, որ առանձին խնդիրների ուղղությամբ այլևս քայլեր կատարելը այնքան էլ արդյունավետ չէ, որովհետև ամբողջական իշխանության դեմ առանձին հատվածներով պայքարելով արդյունքի չենք հասնում: Ուստի մեկ ճանապարհ կա, որ իսկապես ամբողջական իշխանափոխության ուղղությամբ քայլերը կատարվեն, միասնական դաշտով: Այսինքն բոլոր այն բողոքի աղբյուրները, որ կան, քաղաքացիական այդ ընդվզումները պետք է միանան քաղաքական ուժերին` լինի խորհրդարանական, թե արտախորհրդարանական, կանգնեն մեկ հարթակում և ամբողջական իշխանափոխության ու համակարգային փոփոխության պահանջ ներկայացնեն: Հակառակ պարագայում ոչ մի պայքար արդյունավետ չէ:

-Բայց դրան միանգամից հասնելը շատ դժվար է, ժամանակի խնդիր է, իսկ հանրությունը գործողություններ սպասում է հիմա…

-Համաձայն եմ, որ դա ամենահեշտ խնդիրը չի, միանշանակ համաձայն եմ: Բայց ժամանակային առումով էլ կարող եմ ասել, որ այդ գործընթացն էլ այնպես չէ, որ նոր-նոր է սկսվում: Տեսնում ենք, որ խորհրդարանում համագործակցության լավ պլատֆորմ է ստեղծվել` ի դեմս խորհրդարանական չորս ընդդիմադիր ուժերի և եթե իրենց հայտարարությանը համահունչ առաջ շարժվեն և խորհրդարանից դուրս գան աշնանը, որովհետև միանշանակ իշխանությունները իրենց պահանջի կետերը չեն կատարելու, ապա հնարավոր է այդ հարթակը իսկապես ձևավորվի:

-Իսկ այդ դեպքում հանրությունն ի՞նչ անի, գոնե այս պահին էլեկտրաէներգիայի սակագնի բարձրացման մասով քառյակից ինչ-որ գործողությունների է սպասում:

-Առանձնապես ես չեմ տեսնում, որ այդպիսի խիստ պահանջ կա, քանի որ հասարակությունը դեռևս պասիվ է: Ես ու մեր կուսակցականները վերջին այդ բողոքի ակցիային մասնակցեցինք ու խոշոր հաշվով մեծ ակտիվություն հասարակության կողմից չտեսանք: Ուստիև կարծում եմ աշնանը, այնուամենայնիվ, ստիպված ենք երևի թե լինելու սպասել մի շարք պատճառներով: Եվ աշնանը այդ պահանջներին համահունչ միասնական հարթակը կձևավորվի:

-Հուլիսի 18-ին «Օրինաց երկիրը» Ազատության հրապարակում հանրահավաք է հրավիրել: Կմիանա՞ «Ժառանգությունը» դրան, նման քննարկում եղել է:

-Ոչ, քննարկում չի եղել: