Ձեր վստահելի աղբյուրը

2004 թվականից «Էրեբունի» բժշկական կենտրոնում արտասահմանցի մասնագետների օգնությամբ կատարվում է բացառիկ վիրահատություն` ականջի իմպլանտի տեղադրում: Երկկողմանի ծանր լսողության և խլության դեպքում, երբ անօգուտ են նույնիսկ լսողական սարքերը, իմպլանտի տեղադրումը ձայները լսելու հնարավորություն է տալիս:

Արդեն երկու օր է բժշկական կենտրոնում իրականացվում է հերթական վիրահատությունը: Այն կատարվում է «Էրեբունի» ԲԿ-ի քիթ-կոկորդ-ականջ հիվանդությունների բաժանմունքի վարիչ, պրոֆեսոր Արթուր Շուքուրյանի, Ռուսաստանի Աուդիոլոգիայի և լսապրոթեզավորման գիտապրակտիկ կենտրոնի կոխլեար իմպլանտացիայի բաժնի ղեկավար Վիգեն Բախշինյանի կողմից: Վիրահատությանը մասնակցում է Կալիֆորնիայի համալսարանի պրոֆեսոր Ակիրիա Իշիյաման, իսկ որպես խորհրդատու ներկա է Հայկական միջազգային բժշկական հիմնադրամի պատասխանատու Սալբի Ագարակյանը:

Հայկական միջազգային բժշկական հիմնադրամի տրամադրած իմլանտներով այս անգամ վիրահատվում է 6 երեխա: Հիմնադրամի պատասխանատու Սալբի Ագարակյանը նշեց, որ կազմակերպությունն անվճար իմպլանտներ է տրամադրում միայն մինչև վեց տարեկան երեխաներին, քանի որ միայն այդ տարիքում է արդյունքը 100 տոկոսով երաշխավորված։

Վիգեն Բախշինյանի խոսքերով` վիրահատությունից հետո այս փոքրիկները որոշ ժամանակ հետո կարող են լսել արտաքին աշխարհի ձայները, իսկ ավելի ուշ` կսկսեն նաև խոսել: Բնածին 4-րդ աստիճանի ծանրալսությունը կվերականգնվի ընդամենը փոքրիկ սարքի միջոցով:

«Կոխլեար կոչվող իմպլանտի համակարգը փոխում է մեզ շրջապատող ձայները` դրանք վերածելով կոդավորված էլեկտրոնային իմպուլսների, որոնք գրգռում են լսողական նյարդը, և գլխուղեղը դրանք ընկալում է որպես ձայն»,- ասաց Վ.Բախշինյանը` հավելելով, որ վիրահատության ժամանակ ականջի մեջ տեղադրվում է իմպլանտը էլեկտրոդի հետ միասին, իսկ մեկ ամիս անց միացվում է խոսակցական պրոցեսորը։

Արդյունքում, ըստ նրա, այդ երկու սարքերի միջոցով հիվանդը սկսում է լսել: Նշվեց նաև, որ կոխլեար իմպլանտի տեղադրումից հետո երեխաների հետ պարապում են սուրդոմանկավարժները։

Նա նույնպես փաստեց, որ որքան վաղ տարիքում է կատարվում վիրահատությունը, այնքան բարձր է դրա արդյունավետությունը։

Այսպիսով, մասնագետները կոչ են անում լսողական խնդիրներ ունեցող երեխային վաղ տարիքից տանեն հետազոտության, քանի որ մեծ տարիքում հնարավորություններն արդեն քչանում են: Այսինքն` որքան վաղ ախտորոշվի, այնքան ավելի մեծ կլինի արդյունքը:

3 տարեկան Գրիգորի մոտ լսողական խնդիրները հայտնաբերվել են 2 տարի առաջ, երբ ծնողները նկատել են, որ երեխան չի խոսում: Տարբեր մասնագետների դիմելուց և հետազոտելուց հետո պարզվել է, որ երեխան ունի 4-րդ կարգի վատ լսողություն: Ախտորոշումը հաստատվելուց հետո որոշվեց իրականացնել վիրահատություն: Վիրահատությանը սպասել են գրեթե 6 ամիս: Արդեն վիրահատության երկրորդ օրն է և ինչպես ծնողներն են ասում` երեխան լավ վիճակում է:

«Ոգևորությունը մեծ է, անհամբեր սպասում ենք երեխայի ապաքինմանը»,- ասաց Գրիգորի մայրը` Աննա Ասրյանը:

Բժիշկներն ասել են, որ վիրահատությունը շատ լավ է անցել. «Երեխաս գիշերը հանգիստ է քնել, նորմալ սնվել է, չի լացել: Հիմա էլ տեսնում եք, թե ինչքան հանգիստ է: Ամենակարևորը սուրդոմանկավարժների հետ պարապմունքներն են»:

Հայկական միջազգային բժշկական հիմնադրամի պատասխանատու Սալբի Ագարակյանն ասաց, որ հիմնադրամի ստեղծման օրվանից` 2004թ-ից «Էրեբունի» ԲԿ-ում արդեն 75 կոխլեար իմպլանտացիա է տեղադրվել։ Հիմնադրամին մեծ աջակցություն է ցուցաբերում Կալիֆորնիայի համալսարանի առաջատար վիրաբույժ Ակիրա Իշիյաման, ում շնորհիվ հիմնադրամը իմպլանտները ձեռք է բերում մոտ 16 հազար դոլարով, այն դեպքում, երբ ԱՄՆ-ում մեկ իմպլանտի գինը մոտ 30 հազար դոլար է։

Նշենք, որ կոխլեար իմպլանտացիան («կոխլեա» բառից, որը նշանակում է «ականջախեցի») բարձր տեխնոլոգիական վիրահատություն է, որը լսողության բնածին կամ ձեռքբերովի կորուստ ունեցող մարդկանց հնարավորություն է տալիս լսել: Վիրահատությունը տևում է մոտ 2 ժամ, այդ ընթացքում վիրաբույժները հիվանդի ներքին ականջի մեջ դնում են հատուկ սարք, որը ձայնը վերածում է էլեկտրական ազդանշանի և փոխանցում լսողական նյարդին: