Ձեր վստահելի աղբյուրը

Ի՞նչ ընթացքում է «Երիտասարդ ընտանիքին մատչելի բնակարան» պետական-նպատակային ծրագիրը, քանի՞ երիտասարդ ընտանիք է օգտվել դրանից մինչ օրս, ինչպիսին է դինամիկան: Այս և մի շարք այլ հարցերի շուրջ Panorama.am-ը զրուցեց Սպորտի և երիտասարդության հարցերի փոխնախարար Արսեն Քարամյանի հետ:

-Պարոն Քարամյան, ի՞նչ ունենք այսօրվա դրությամբ, քանի՞ ընտանիք է օգտվել ծրագրից և վարկ ստացել:

-Վերջին տվյալները, որ մենք ամփոփել ենք վկայում են, որ 1520-ից ավելի ընտանիք ստացել է վարկեր բնակարան ձեռք բերելու նպատակով և այդ վարկերի ներքին կառուցվածքն էլ, ի դեպ, բավականին հուսադրող է` դրանց շուրջ 50 տոկոսը կազմում եմ մարզերում ստացված վարկերը:

-Ինչպիսին է դինամիկան` ժամանակի ընթացքում երիտասարդների հետաքրքրությունը, նաև վստահությունն աճե՞լ է ծրագրի նկատմամբ:

-Բնականաբար, աճել է: Եթե առաջին տարում, երբ կիրարկվում էր ծրագիրը մի տեսակ անվստահություն կար և շատ պոտենցիալ շահառուներ տեղեկացված չէին, ապա այսօր նման խնդիր չկա, տեղեկացվածությունը բավականին բարձր է և պրակտիկայի մեջ էլ նրանք տեսնում են, որ շատ ու շատ երիտասարդ ընտանիքներ օգտվել են: Դրան գումարած մեկ ուրիշ հանգամանք էլ կա, որ ուզում եմ անպայման անդրադառնալ. այդ թիրախային խմբի հետ կապված վերջին ժամանակաշրջանում նկատելի է աշխատավարձի բարձրացում, համենայնդեպս այն շահառուները, որոնք ներգրավված են մասնավոր սեկտորում շատ ավելի վճարողունակ են դառնում ու հետևաբար, ծրագրից օգտվելու հավանականությունը բավականին բարձրանում է: Ընդհանուր առմամբ, դինամիկ աճ ունենք, թեև այդ աճն այնքան մեծ չէ:

-Երբ ծրագիրը նոր մեկնարկում էր թիրախային խմբում քանի՞ ընտանիք է դիտարկվել:

-Ծրագիրը մեկնարկել է 2010թ-ի հունվարին կառավարության որոշմամբ, իսկ մինչ այդ որոշակի մոնիթորինգ է իրականացվել` հնարավոր պահանջարկի վերաբերյալ: Ծրագրին նախորդած ժամանակաշրջանում ` 2007-2008թթ-ին կատարված ուսումնասիրությունները ի հայտ են բերել շուրջ 6 հազար ընտանիք, որոնք պոտենցիալ շահառուներ կարող են դառնալ: Հասկանալի է, որ այսօր այդ թվերը ճշգրիտ պատկերը այդքան էլ չեն կարող փոխանցել, քանի որ 2007-08թթ-ից այս կողմ շատ բան է փոխվել և հետևաբար, այդ պահանջարկն էլ ձևափոխվել է: Ամեն դեպքում, ցուցանիշը` 1520-ից ավելի վարկ կարծում եմ կարելի է համարել խիստ բավարար:

-Ծրագրի իրականացմանը զուգահեռ հնչում են առաջարկություններ բարձրացնել տարիքային շեմը` ամուսինների տարիքի հանրագումարը գործող 60-ից դարձնելով 65: Ինչ որ բան արվո՞ւմ է այս ուղղությամբ:

-Այս ծրագրի հետ կապված մենք որոշակի փոփոխությունների փաթեթ ենք մշակել, որը գտնվում է կառավարությունում: Մի կողմից առաջակում ենք որոշակիորեն բարձրացնել տարիքային շեմը, մյուս կողմից էլ ձեռք բերվող բնակարանի արժեքը 16 մլն-ի փոխարեն առավելագույնս համարվելու է 18 մլն դրամ: Կարծում եմ, որ այս երկու փոփոխությունների հետևանքով բավականին մարդկանց հնարավորություն կտանք ներգրավվելու այս ծրագրում:

Գաղտնիք չէ, որ միջին ամուսնական տարիքի շեմը Հայաստանում բարձրացել է և եթե նախկինում երիտասարդները ամուսնանում էին 24-26 տարեկանում, ապա այսօրվա դրությամբ այդ տարիքը մոտենում է շուրջ 30-ի: Եվ այդ խնդիրը մեզանում մի քանի տարի է, որ գլուխ է բարձրացրել և ժամանակն է, որ մենք կարողանանք հարմարվել այդ փոփոխություններին` կառուցենք ծրագիրն այնպես, որ իրականությանը մոտ լինի և կարողանանք բավարարել մարդկանց պահանջները:

-Պարոն Քարամյան, ի՞նչ ընթացքի մեջ է մատչելի ավտոմեքենա երիտասարդ ընտանիքներին ծրագիրը:

-Այն, ինչպես գիտեք, իրականացվում է ՀՀ նախագահ Սերժ Սարգսյանի ցուցումով` բազմաթիվ երիտասարդ ընտանիքներ դիմել են հանրապետության նախագահին և ցուցում ստացանք, որ լինի համարժեք ծրագիր: Շուրջ երկու տարի իրականացնում ենք պիլոտային ծրագիր և սեպտեմբեր ամսվա վերջերին, ամենայն հավանականությամբ, ծրագիրը կընթանա արդեն ավելի լայն ֆորմատով:

Ներկայումս ավտոներկրող մի շարք ընկերությունների հետ բանակցություններ ենք վարում, և առաջիկայում կհրապարակենք պայմանները և հնարավոր բոլոր մոտեցումները, որպեսզի մեր շահառուները կարողանան օգտվել այդ ծրագրից: Ես կարծում եմ, որ այս ծրագիրն էլ մեծ հետաքրքրություն է առաջացրել: