Ձեր վստահելի աղբյուրը

Նախորդ տարվա հունվարին Մովսես գյուղում ՀՀ նախագահ Սերժ Սարգսյանը հայտարարեց, որ սահմանամերձ գյուղերի բնակիչները հողի հարկ չեն վճարի, հարկը կվճարվի պետբյուջեից:

Մովսեսի գյուղապետ Արարատ Ավալյանը դրանից մեկ ու կես տարի անց Panorama.am-ի հետ զրույցում փաստեց, որ իրենց գյուղում մշակովի հողատարածքների մակերեսը զգալիորեն ավելացել է:

«142 հա աշնանացան ցորենի փոխարեն այսօր ունենք 210 հա: 10 հա էլ գարնանացան գարի ունեինք, անցած տարիներին չենք ունեցել»,-ասաց գյուղապետը:

Տարածքային կառավարման նախարարության հասարակայնության հետ կապերի բաժնից Panorama.am-ին մանրամասնեցին, որ ՀՀ կառավարության 2013 թվականի մարտի 21-ի թիվ 271-Ն և 2013 թվականի ապրիլի 18-ի թիվ 401-Ն որոշումներով՝ ՀՀ պաշտպանության նախարարության կողմից ներկայացված մարտական գործողությունների հետևանքով չօգտագործվող և 2008-2012 թվականների ընթացքում հակառակորդի կողմից հողատարածքների գնդակոծման դեպքեր ունեցող սահմանամերձ համայնքների վարչական տարածքում գտնվող գյուղատնտեսական նշանակության հողատարածքների (ներառյալ՝ բնակավայրերում բնակշինարարության համար հատկացված, տնամերձ և այգեգործական (ամառանոցային) հողամասերի) 2013 թ. համար հաշվարկված` վճարման ենթակա հողի հարկի տարեկան գումարը հարկ վճարող ֆիզիկական և իրավաբանական անձանց անունից, նրանց փոխարեն համապատասխան համայնքի բյուջե վճարելու նպատակով` ՀՀ Արարատի, Գեղարքունիքի, Վայոց ձորի և Տավուշի մարզպետարաններին ՀՀ 2013 թ. պետական բյուջեով նախատեսված ՀՀ կառավարության պահուստային ֆոնդի հաշվին հատկացվել է 62,414.6 հազ.դրամ՝ վերոնշյալ մարզերի շուրջ 30 համայնքին:

Նախարարությունից հայտնեցին, որ Ջրօգտագործողների ընկերությունների (ՋՕԸ) սպասարկման տարածքում ընդգրկված` 19 համայնքում օգտագործվող ոռոգման ջրի դիմաց ֆիզիկական և իրավաբանական անձանցից գանձվող վարձավճարների նկատմամբ 2013 թվականի համար 50 տոկոս զեղչ կիրառելու նպատակով` ՀՀ տարածքային կառավարման նախարարության ջրային տնտեսության պետական կոմիտեին 2013 թվականին հատկացվել է 14,892.7 հազ. դրամ ՀՀ կառավարության պահուստային ֆոնդի հաշվին:

Աջակցության նույն մոտեցումը կիրառվել է նաև 2014 թվականին. ՀՀ կառավարության 2014 թվականի մարտի 27-ի թիվ 338-Ա որոշմամբ՝ Արարատի, Գեղարքունիքի, Վայոց ձորի և Տավուշի մարզպետարաններին հողի հարկի մասով հատկացվել է 65,769.2 հազ. դրամ, ՀՀ տարածքային կառավարման նախարարության ջրային տնտեսության պետական կոմիտեին՝ 23,105.3 հազ. դրամ:

Հարցին, կա՞ ուսումնասիրություն, թե հողի հարկի վերացումն ի՞նչ ազդեցություն է ունեցել, ավելացե՞լ է մշակովի հողատարածությունների մակերեսը, թե՞ ոչ, նախարարությունից գրավոր պատասխանեցին.

«ՀՀ Արարատի, Վայոց ձորի և Տավուշի մարզերի սահմանամերձ համայնքների՝ ջրօգտագործողների ընկերությունների կողմից սպասարկվող ոռոգելի հողատարածքները վերոնշյալ իրավական ակտերի ընդունումից հետո որոշակի չափով ավելացել են: Մասնավորապես՝ 2012թ. համեմատ 2014թ-ին ոռոգելի հողատարածքները 17 հեկտարով ավելացել են (2012թ՝ 143, 2014թ՝ 160 հա) «Արարատ» ՋՕԸ-ի, 186 հեկտարով (2012թ՝ 2539, 2014թ՝ 2725 հա)՝ «Նոյեմբերյան» ՋՕԸ-ի սպասարկման տարածքում»: