Ձեր վստահելի աղբյուրը

Նախորդ շաբաթ Մեծ Բրիտանիայի Եվրոպայի հարցերով պետնախարար Դեվիդ Լիդինգթոնը խորհրդարանում հայտարարել է, որ Բրիտանիայի կառավարությունը կշարունակի պահպանել ԵԱՀԿ-ի էմբարգոն զինվորականների, ոստիկանության, անվտանգության ուժերի և նրանց հետ կապված կառավարական կազմակերպությունների վրա, որոնց կողմից դա կարող է օգտագործվել Ղարաբաղում և Հայաստանի ու Ադրբեջանի սահմանին: Այս մասին հաղորդում է Commonspace.eu-ն:

«Հարավային Կովկասը ռազմավարական նշանակություն ունի Մեծ Բրիտանիայի համար: Հայաստանի և Ադրբեջանի հետ Մեծ Բրիտանիան համագործակցում է խաղաղության, անվտանգության և տարածաշրջանում փոխընկալման համար: 2012-13թթ-ին Բրիտանիան ծախսել է 1.245 մլն ֆունսթերլինգ Հայաստանի և Ադրբեջանի միջև խաղաղության ամրապնդմանն ուղղված նախագծերի վրա: Մենք Լեռնային Ղարաբաղում մի շարք ծրագրեր ենք ֆինանսավորել, որոնք ուղղված են հակամարտության խաղաղ կարգավորման հանդեպ վստահության բարձրացմանը՝ Հայաստանում, Ադրբեջանում և Լեռնային Ղարաբաղում աշխատելով քաղաքացիական հասարակությունների հետ: Մենք վճռականորեն աջակցում ենք ԵԱՀԿ Մինսկի խմբին՝ ղարաբաղյան կոնֆլիկտի խաղաղ և երկարաժամկետ լուծման որոնման հարցում: Հենց այդ պատճառով էլ Մեծ Բրիտանիան շարունակում է հավատարիմ մնալ ռազմական տեխնիկայի մատակարարման էմբարգոյին այն ուժերի համար, որոնք համաձայն Եվրոպայում անվտանգության և համագործակցության խորհրդի 1992թ-ի հռչակագրի որոշման, ներքաշված են Լեռնային Ղարաբաղի շուրջ կոնֆլիկտում», - ասված է Լիդինգթոնի հայտարարությունում:

Ըստ պարբերականի՝ որոշումը դրական կերպով ընդունվել է բոլոր նրանց կողմից, ովքեր կուզենային տեսնել ղարաբաղյան հակամարտության արագ և խաղաղ կարգավորումը: Բրիտանական կառավարության որոշումը կտրականապես տարբերվում է ներկայումս Ռուսաստանի կողմից վարվող քաղաքականությունից, որը տարածաշրջանը հեղեղել է զենքով: Այն ռազմական պայմանագրի շրջանակներում մատակարարվում է Հայաստան, որի միջոցով Ռուսաստանը Հայաստանի տարածքում պահում է իր ռազմաբազաները, իսկ Ադրբեջան մատակարարվում է առևտրային պայմանագրերի շրջանակներում: Միայն մի քանի օր առաջ հայտարարվել է, որ Ռուսաստանը Ադրբեջանին մեծ քանակությամբ գրոհային ուղղաթիռներ է մատակարարելու: 2010թ-ին Ադրբեջանն ու Ռուսաստանը ստորագրել են համաձայնագիր, որ համաձայն` ռուսական կողմը համաձայնել է Ադրբեջանին մատակարարել 24 միավոր Ми-35М ուղղաթիռ և 40 միավոր Ми-8, Ми-17 7 Mi17V1: