Խնամատար ընտանիք. անցած ճանապարհն ու շարունակականության նշույլները
Օրերս ՀՀ Աշխատանքի և սոցիալական հարցերի նախարարությունը հանդես եկավ մի հայտարարությամբ, որով հրավիրում է բոլոր ցանկացողներին դիմել խնամատար ընտանիք ծրագրում ընդգրկվելու համար: Նույն այդ հայտարարությունում նշված էր, որ «2008 թվականից ՀՀ պետական բյուջեի միջոցներով իրականացվող «Խնամատար ընտանիքի ինստիտուտի ներդրման» ծրագրի շրջանակում հանրապետության շուրջ 60 երեխա խնամվել է խնամատար ընտանիքում»: Թիվն այս փոքր-ինչ ուռճացված թվաց, քանի որ գոնե Panorama.am-ը իր հրապարակումներում, հղում անելով նույն նախարարության տվյալներին, ավելի համեստ թիվ է նախկինում նշել: Բայց նախարարությունից հաստատեցին` 2008թ-ից մինչ օրս ծրագրի շրջանակում խնամատար ընտանիքներում խնամվել է շուրջ 60 երեխա:
Ինչ վերաբերում է մյուս հարցերին` քանի երեխա է այսօր խնամվում խնամատար ընտանիքներում, որքան գումար է խնամատար ընտանիքը ստանալու մեկ երեխայի հաշվարկով և ընդհանրապես ինչ ունենք այդ ոլորտում դիմեցինք Աշխատանքի և սոցիալական հարցերի նախարարությանը հարցումով:
Ստացված պատասխանում նշված է, որ ներկայումս Հայաստանում կա 15 խնամատար ընտանիք, որտեղ խնամվում է 17 երեխա և համաձայն ՀՀ կառավարության 2008 թ-ի մայիսի 8-ի N 459-Ն որոշման «Խնամատար ընտանիքին երեխային պահելու համար տրվող ամսական դրամական միջոցները մեկ երեխայի հաշվարկով կազմում են տվյալ տարվա ՀՀ պետական բյուջեով մանկատներում մեկ երեխայի խնամքի համար նախատեսված գումարի չափով, երկու երեխայի համար` մեկ երեխայի համար հաշվարկված գումարի 150 տոկոսի, իսկ երեք և ավելի երեխաների համար` 200 տոկոսի չափով: Մեկ երեխայի խնամքի և դաստիարակության համար խնամատար ծնողներից մեկին տրամադրվում է վարձատրություն «Նվազագույն ամսական աշխատավարձի մասին» ՀՀ օրենքի 1-ին հոդվածով սահմանված նվազագույն ամսական աշխատավարձի չափով, երկու երեխայի համար` նվազագույն ամսական աշխատավարձի 150 տոկոսի, երեք և ավելի երեխաների համար` նվազագույն ամսական աշխատավարձի 200 տոկոսի չափով»:
Panorama.am-ի հարցադրմանը` երկար տարիներ պետական բյուջեից խնամատար ընտանիքների թվի ավելացման համար գումար չէր հատկացվում և եթե այժմ հայտարարվում է ծրագրի շարունակականության մասին, ապա որքան գումար է նախատեսվել դրա համար 2014թ-ի պետբյուջեով նախարարությունից մեզ այդպես էլ չեն պատասխանել: Ավելի ստույգ` թվեր գերադասել են չհնչեցնել: Փոխարենը նշել են, որ «ՀՀ կառավարության կողմից վերոնշյալ որոշման ընդունումից հետո խնամատար ընտանիքին տրամադրվող գումարը համապատասխանեցվել է ՀՀ պետական բյուջեով մանկատներում մեկ երեխայի խնամքի համար նախատեսված գումարի չափին»:
Ինչ վերաբերում է հաջորդ հարցին` որքա՞ն գումար է ստանալու խնամատար ընտանիքը այսուհետ, նախարարությունից տեղեկանում ենք, որ 2014թ-ի հուլիսի 1-ից խնամատար ընտանիքում խնամվող մեկ երեխայի խնամքի համար տրամադրվում է 62.440 ՀՀ դրամ, իսկ խնամատար ծնողին, որպես վարձատրություն` 66.136 ՀՀ դրամ. ընդամենը` 128.576 ՀՀ դրամ.
«Նշված գումարը համապատասխանում է 2014թ. հուլիսի 1-ից Հայաստանի Հանրապետության պետական բյուջեով մանկատներում մեկ երեխայի խնամքի համար նախատեսված գումարի չափին»,- նշված է հարցման պատասխանում:
Տեղեկանում ենք նաև, որ պետական բյուջեով նախատեսվում է 25 երեխայի խնամքի կազմակերպում խնամատար ընտանիքում, բացի այս` հնարավորություն կա ևս ութ երեխայի խնամքը կազմակերպել խնամատար ընտանիքում: Ներկայում հանրապետության մանկատներում խնամվում է շուրջ 730 երեխա, այդ թվում շուրջ 540 երեխա ունի առողջության հետ կապված խնդիրներ. «Երեխաների պաշտպանության ոլորտում իրականացվող քաղաքականության շնորհիվ (բեռնաթափում) մանկատներում խնամվող առողջության հետ կապված խնդիրներ չունեցող երեխաները հիմնականում վերադառնում են կենսաբանական ընտանիք կամ, հիմք ընդունելով երեխաների լավագույն շահերը և այն հանգամանքը, որ երեխաներին ընտանիքներում տեղավորելու ամենանախապատվելի ձևը որդեգրումն է, հանձնվում են որդեգրման:
Հաշվի առնելով մասնագիտացված մանկատներում երեխաների թվի ավելացման միտումները, առաջարկ է արվել նախարարության հետ համագործակցող միջազգային և տեղական հասարակական կազմակերպություններին` իրազեկման միջոցով աջակցել ընտանիքներում երեխաների տեղավորման աշխատանքներին, քանի որ արդյունավետ իրազեկման աշխատանքներ իրականացնելու դեպքում կարող ենք մանկատներում խնամվող, առողջության հետ կապված խնդիրներ ունեցող երեխաներին տեղավորել խնամատար ընտանիքներում: Նախարարության հետևողականության շնորհիվ 2013 թ-ին 2 խնամատար ընտանիք խնամակալության է վերցրել առողջական խնդիրներ ունեցող երկու երեխայի»,- տեղեկացնում են մեզ նախարարությունից:
Ինչ վերաբերում է հարցին, թե մինչ օրս քանի երեխա է խնամատար ընտանիքից վերադարձել խնամքի կենտրոն` չհարմարվելով ընտանիքին կամ այլ խնդիրների պատճառով նշվում է, որ փորձնական ծրագրի շրջանակներում ՀՕՖ-ի կողմից ընտրված ընտանիքներից երկու երեխա վերադարձել է խնամքի կենտրոն և մանկատուն` խնամատար ընտանիքում չհարմարվելու պատճառով:
Նախորդող հրապարակում`
Վերջապես պետությունը որոշեց ավելացնել խնամատար ընտանիքների թիվը
Նախարարը կարևորում է երեխային ընտանիք վերադարձնելը, բայց խնամատար ընտանիքների թիվը մնում է անփոփոխ
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
