Ձեր վստահելի աղբյուրը

Այսօր Կենտրոն և Նորք Մարաշ վարչական շրջանների ընդհանուր իրավասության դատարանում Շանթ Հարությունյանի և մյուսների գործով դատական նիստը շարունակվեց նոյեմբերի 5-ի իրադարձությունների ժամանակ տուժող ճանաչված անձանց` ոստիկանների հարցաքննությամբ:

Դատարանում առաջինը հարցաքննվեց ոստիկանության պետական պահպանության ծառայության աշխատակից Անդրանիկ Առաքելյանը, ով ներկայացել էր քաղաքացիական հագուստով: Ասաց, որ ճանաչում է ամբաստանյալներից Շանթ Հարությունյանին, որը նստացույց էր իրականացնում Ազատության հրապարակում: Ներկայացնելով նոյեմբերի 5-ին տեղի ունեցածը, տուժողը պատմեց, որ երթի մասնակիցներն Ազատության հրապարակից փորձել են դուրս գալ Մաշտոցի պողոտայի երթևեկելի գոտի, սակայն ՊՊԾ գումարտակի աշխատակիցները թույլ չեն տվել:

«Շանթ Հարությունյանը գումարտակի հրամանատար Գեղամ Խաչատրյանին հետ հրեց, որից հետո պայթուցիկներ տրաքացվեցին, ոտքերիս տակ, ծխից աչքերս փակվեցին, մրմռում էին», -հայտարարեց տուժողը:

Իր հայտարարությունից հետո տուժող ոստիկանը սկսեց պատասխանել ամբաստանյալների հարցերին, և Շանթ Հարությունյանը հետաքրքրվեց, թե երթի դուրս գալուց ում հետ էր ինքը քայլում դեպի Մաշտոցի պողոտա, սակայն տուժողն ասաց, որ չի հիշում:

«Երթի դուրս գալու բոլոր նրբությունները հիշում եք, բա չեք հիշո՞ւմ, թե ում հետ էի քայլում: Ուրեմն ասեմ` ես Օսիպյանի (Երևանի փոխոստիկանապետն է) հետ էի քայլում», -հայտարարեց Շանթ Հարությունյանը:

Տուժող ճանաչված ոստիկանը, սակայն, այդպես էլ չմտաբերեց` ում հետ և ինչպես է Հարությունյանը Ազատության հրապարակից եկել-մոտեցել Մաշտոցի պողոտա: Պատասխանելով Շանթի փաստաբան Ինեսսա Պետրոսյանի հարցերին, ոստիկան Առաքելյանն ասաց, որ ինքը մի խումբ ծառայակիցների հետ կանգնել ու սպասել է Ազատության հրապարակի գլխավոր մուտքի մոտ, որպեսզի ուղեկցի երթի մասնակիցներին:

Հարցին, թե տուժողը ինչ կերպ է տուժել, հնչեց ոստիկանի պատասխանը. «Մարմնական վնասվածք չեմ ստացել, հագուստս չի ճղվել, ընդամենը աչքերս են մրմռացել»:

Այս հայտարարությանը դահլիճը արձագանքեց ծիծաղով ու ծափահարություններով:

Առաքելյանն ասաց նաև, որ բժշկի չի այցելել: Հարցին, թե ինչը կարող է հավաստել, որ աչքերը մրմռացել են, տուժողը պատասխանեց. «Ոչ մի բան, էդ պահին մրմռացին, քաշվեցի մի կողմ աչքերս մաքրեցի, հետո դզվեց»:

Ասաց նաև, որ երթի երթուղու մասին նախապես տեղյակ են եղել, քանի որ այդ մասին հայտարարվել է «բոլոր լրատվամիջոցներով»: Ամբաստանյալ Վարդան Վարդանյանը հետաքրքրվեց, թե Առաքելյանն ու մյուս ծառայողները ինչ հրահանգներ են ստացել:

«Հրահանգներ եղել են և դա վերաբերել է հասարակական կարգի պահպանությանը ու երթի մասնակիցներին օժանդակելուն, որպեսզի խաղաղ երթ իրականացվի», -արձագանքեց տուժողը:

Պատասխանելով մյուս հարցին, Առաքելյանն ասաց, որ նոյեմբերի 1-ից 5-ն ընկած ժամանակահատվածում, երբ ծառայություն է իրականացրել Ազատության հրապարակում, պետությանը վտանգ սպառնացող կոչեր ու այլ իրեր, ինչպես նաև հասարակական կարգը խախտելուն միտված գործողություններ չի նկատել: Տուժողից նաև հետաքրքրվեցին, թե նոյեմբերի 5-ի դեպքերի ժամանակ ինչ գործողություններ էր իրականացնում սպիտակ սպորտային համազգեստով տղամարդը, որի մասին տուժողն իր ելույթում ավելի վաղ հիշատակեց:

«Եթե չեմ սխալվում, ում մասին, որ խոսում ենք, ինչ-որ քաշքշում էին, հարվածում, բայց ինքը հայտարարում էր, թե ոստիկան եմ, կողքից էլ էին բղավում, թե ոստիկան ա, մի խփեք, հետո էդ պահին, որ ոտքերիս տակ պայթացրին պայթուցիչը, ես քաշվեցի մի կողմ»,- պատասխանեց տուժողը:

Փաստաբան Արա Զաքարյանը հետաքրքրվեց, թե կոնկրետ որ պահին է խախտվել հասարակական կարգը, տուժողն ի պատասխան ասաց, որ կարգը խախտվել է այն ժամանակ, երբ երթի մասնակիցները դուրս են եկել երթևեկելի գոտի, խոչընդոտել երթևեկության մասնակիցների ընթացքը և չեն ենթարկվել ոստիկանների օրինական հրահանգներին` դուրս չգալով մայթ: Նաև ասաց, որ բարձրախոսներով նախապես չեն զգուշացրել, որ երթի մասնակիցները խախտում են հասարակական կարգը ու անհրաժեշտ է պահպանել այն:

Դատակոչված վկաների թվում էր նաև ՊՊԾ գնդի հրամանատար Գեղամ Խաչատրյանը, սակայն նրան հարցաքննելու հերթը չհասավ, և պաշտպան Ինեսսա Պետրոսյանը հայտարարեց, որ գործով ամբաստանյալ համարվող Շահեն Հարությունյանն իրեն վատ է զգում ու խնդրեց դատական նիստը հետաձգել: Դատավոր Մնացական Մարտիրոսյանը բավարարեց միջնորդությունը:

Հարակից հրապարակումներ`

«Թքած ձեր օրենքի վրա, դուք սիրտ չունեք». Միջադեպ Շանթի գործով նիստին

Շանթ Հարությունյանը պատմեց կասկածելի ոստիկանի մասին, իսկ դատավորը զգուշացրեց սանկցիա կիրառել

Դիմադրությունը սկսվել է այն ժամանակ, երբ ոստիկանը քաշքշել է Շանթին. Փաստաբանները` նախաքննության սխալների մասին

Շանթի և մյուսների գործով դատական նիստում հնչել է Վալերի Օսիպյանի անունը