Ձեր վստահելի աղբյուրը

«Սահմանադրության տեքստը պետք է լինի այնպիսին, որ պարտավորեցնի դրանում ներառված դրույթներն ի կատար ածել: Սահմանադրությունը պետք է նպաստի, որ ամրագրված դրույթների կատարումը շահեկան լինի բոլորի համար»,- լրագրողների հետ հանդիպման ժամանակ ասաց Սահմանադրական բարեփոխումների հանձնաժողովի անդամ, «Սահմանադրական իրավունքի կենտրոն» հասարակական կազմակերպության խորհրդի նախագահ Գևորգ Դանիելյանը:

Նա նշեց, որ ցանկացած ոլորտում սահմանադրական բարեփոխումների անհրաժեշտություն կա՝ քաղաքական, սոցիալական, տնտեսական, կառավարման բարելավման: Օրինակ համար նշեց, որ գործող Սահմանադրությունը որոշակիորեն խոչընդոտում է գործադիր իշխանության աշխատանքը:

Գ. Դանիելյանն ասաց, որ սահմանադրական բարեփոխումները չի հետապնդում իշխանության վերարտադրության խնդիր. «Իշխանության վերարտադրության խնդիր կարող է լուծվել նաև գործող Սահմանադրությամբ: Սահմանադրական բարեփոխումների հայեցակարգը, որն այժմ դրված է հանրային քննարկման, էապես վերանայում է այն բոլոր հնարավոր իրավական լծակները, որոնք որպես իշխանության վերարտադրելու գործիք են դիտվում»:

Ինչ վերաբերում է կառավարման ձևին, Սահմանադրական բարեփոխումների հանձնաժողովի անդամն ասաց, որ դեռևս վերջնական կարծիք չի ձևավորվել:

«Մեծամասնությունը կողմնակից է խորհրդարանական կառավարման ձևին: Եթե կառավարման այդ ձևն ընդունվի, որոշ վերապահումներով է լինելու: Հանձնաժողովի որոշ անդամներ, նաև ես, կողմ ենք կառավարման այդ ձևին, եթե դա դասական ձևով լինի, բայց անհրաժեշտ կլինեն որոշ երաշխիքներ: Եթե այդ երաշխիքները չլինեն, ապա այդ սահմանադրությամբ էլ չի լուծվի այն խնդիրները, որոնց ակնկալիք ունենք»,- ասաց նա:

Պատասխանելով հարցին, թե հնարավո՞ր է, որ ի վերջո այդ բարեփոխումներն չիրականանան, Գ. Դանիելյանը քիչ հավանական համարեց. «Այս պահի զարգացումները թույլ չեն տալիս ենթադրել, որ դադարի սահմանադրական բարեփոխումների խնդիրը: Սահմանադրական բարեփոխումներով համընդհանուր խնդիր ենք լուծում, բոլորի շահերից է բխում»:

Խոսելով սահմանադրական բարեփոխումների հայեցակարգի շուրջ ծավալվող հանրային քննարկումների մասին, Գ. Դանիելյանն ասաց, որ հանդիպումներն ընթանում են սպասված սցենարով, բավականին ծանրաբեռնված աշխատանքը տալիս է արդյունքներ: Ըստ նրա, քննարկումներն ընթանում են բավականին հանդուրժող մթնոլորոտում, իհարկե, լինում են սուր հարցադրումներ, բայց երկրի հիմնական օրենքին առնչվող գործընթացը հենց այդպիսին էլ պետք է լինեն:

«Սահմանադրական բարեփոխումների նախաձեռնությունն այս փուլում արդարացված է»,- նշեց նա:

Նախորդող հրապարակումներ՝

Սահմանադրական բարեփոխումների հանձնաժողովը ապաքաղաքական է. Գագիկ Հարությունյան

Հայաստանի Սահմանադրությունն այսօր իշխանակենտրոն է. Գագիկ Հարությունյան

Գործող սահմանադրությամբ մարդու իրավունքներն ունեին միայն ամրագրված տեսք. Հրայր Թովմասյան

Դատական համակարգի անկատարության լուծման միջոցը Սահմանադրությունն է. Հրայր Թովմասյան

Վերին էշելոններում մարդիկ զգաստ են, բայց միջին օղակներում բորենիների համաստեղություն է. ՍԴ նախագահ

Սահմանադրական բարեփոխումների նպատակը մարդու իրավունքներն երաշխավորված դարձնելն է. Դավիթ Հարությունյան

Դատավորը պետք է ինքնուրույն որոշումներ կայացնելու հանրավորություն ունենա. ՍԴ բարեփոխումների հայեցակարգի քննարկում