Ձեր վստահելի աղբյուրը

Հայ ընտանիքների մեծ մասը Քեսաբ մշտական բնակության դեռ չի տեղափոխվել: Մարդիկ պարբերաբար գնում-գալիս են, աշխատանքներ են տանում և վերականգնում են իրենց տները:

Քեսապ հայրենակցական միավորման քարտուղար Վահան Սարմազյանն  Panorama.am-ին տեղեկացրեց, որ Քեսաբ ավանում էլէկտրաէներգիայի և ջրի մատակարարման հարցն արդեն լուծված է, բայց գյուղերում` դեռ ոչ:

Panorama.am-ի թղթակցի հետ զրույցում ՀՀ սփյուռքի նախարարության Սփյուռքի Մերձավոր և Միջին Արևելքի հայ համայնքների վարչության պետ Լուսինե Ստեփանյանն էլ նկատեց, որ քեսաբահայերը հիմնականում սպասում են էլեկտրաէներգիայի և ջրամատակարարման ամբողջական վերականգնման աշխատանքների ավարտին:

«Ընդդիմադիրները մի քանի ամիս Քեսաբում գտնվելու ընթացքում խափանել են էլեկտրականության և ջրի մատակարարումն ու հեռախոսային ցանցը: Քեսաբի շրջանի նահանգապետարանի աջակցությամբ վերականգնվում են: Բացի այդ, ընդդիմադիրներն ավիրել ու գողացել են մարդկանց կենցաղային պարագաները, հագուստը, գյուղատնտեսական տեխնիկան»,- նկատեց նա:

Լուսինե Ստեփանյանի խոսքով, առօրյա նորմալ կյանքը վերականգնելու համար պետք է նախապատրաստել Քեսաբի շրջանի գյուղերը, որոնք 10-ից ավելի են. «Տներն այն վիճակի հասցնեն, որ կանայք ու երեխաները, ընատնիքներն ամբողջությամբ կարողանան վերադառնալ»:

Իսկ ահա Լաթաքիայի Ս. Աստվածածին եկեղեցում ապաստանածները դուրս են եկել և վերջնականապես մեկնել են Քեսաբի իրենց տներ, փոխանցում է Քեսաբ Երիտասարդական Միությունը: Ֆեյսբուքյան էջում հրապարակվել է Հայր Նարեկ Լուիսյանի խոսքը, որում նշված է. « Քեսպահայութեան կ՛ըսենք անցած ըլլայ եւ բարի վերադարձ ձեր տունները, Մեր հայու աննկուն կամքով կրկին պիտի վերաշինենք ու ծաղկեցնենք ՄԵՐ ՀԱՅԿԱԿԱՆ ՔԵՍԱՊԸ»:

Քեսապ հայրենակցական միավորման քարտուղար Վահան Սարմազյանն էլ հավելեց, որ ճիշտ է` Լաթաքիայից բոլորը տեղափոխվում են Քեսաբ, եկեղեցուց դուրս են եկել, շատերը գնում են իրենց տները, աշխատում, վերականգնում, բայց մի մասը վերադառնում է Լաթաքաիա և գիշերում այնտեղ:

«Ովքեր հնարավորություն ունեն, տներն արդեն բարեկարգ վիճակում են, մնում են Քեսաբում: Իսկ մյուսները գնում-գալիս են: Պետությունը վնասներն է հաշվում, որ փոխհատուցի»,- ասաց նա:

Հիշեցնենք, որ հայաբնակ Քեսաբ ավան ու շրջակա գյուղերը սիրիական բանակն ազատագրել է հունիսի 14-ին: Իսլամիստները Թուրքիայի կողմից հայաշատ Քեսաբ ավանի վրա հարձակվել էին մարտի 20-ի լույս 21-ի գիշերը: Տեղի բնակչությունը տարհանվել էր Լաթաքիա: Տները, ազգապատկան շենքերը, կառույցներն ու եկեղեցիները զինյալներն այրել էին և ավիրել: Մարդկանց ունեցվածքը թալանվել էր և վաճառվում էր Թուրքիայում:

Կարդացեք նաև`

Վազգեն Մեսրոպյան. Հայերի մեծ մասն արդեն Քեսաբում են