Ձեր վստահելի աղբյուրը

Ոստիկանության քննչական գլխավոր վարչության հատկապես կարևորագույն գործերով վարչության վարույթում գտնվող օֆշորի հայտնի գործով նախաքննությունն ընթանում է, հարցաքննությունները դեռևս ավարտված չեն, և հետագա քննչական գործողություններն արդեն կբխեն հենց այդ հարցաքննություններից: Այդ մասին Panorama.am-ին տեղեկացրեց այս գործով միակ կալանավորված Աշոտ Սուքիասյանի փաստաբան Յուրիկ Խաչատրյանը: 

Հիշեցնենք, որ նախաքննական մարմինը 2013 թվականի հունիսի 17-ին Աշոտ Սուքիասյանին կալանավորելու որոշում էր կայացրել ու նրա նկատմամբ հետախուզում հայտարարել: վերջերս նա Վրաստանից արտահանձնվեց Հայաստանի իրավապահ մարմիններին: Սուքիասյանը մեղադրվում է խոշոր չափի խարդախության, առանձնապես խոշոր չափերի գույքային վնասի պատճառման, առանձնապես խոշոր չափերով հանցավոր ճանապարհով ստացված եկամուտներն օրինականացնելու մեջ: Նրան մեղադրանք էր առաջադրվել ՀՀ Քրեական օրենսգրքի 178 հոդվածի 3րդ մասի 1-ին կետի, 184 հոդվածի 2-րդ մասի 1-ին կետի և 190-րդ հոդվածի 3-րդ մասի 1-ին կետի հատկանիշներով:

Այս գործն առնչվում էր գործարար Փայլակ Հայրապետյանի հետ, որի գործունեության վերաբերյալ կատարած հետաքննության մեջ «Հետք»-ը պարզել էր, որ գործարարի գույքի դիմաց ստացված մոտ տասը միլիոն դոլարը Աշոտ Սուքիասյանը փոխանցել է օֆշորում գրանցված մի քանի կազմակերպությունների ՝ այդ թվում WLISPERA HOLDINGS -ին: Նույն պարբերականի հրապարակման մեջ նշվում էր նաև, որ այդ կազմակերպության բաժնետերեր են Աշոտ Սուքիասյանից բացի, ՀՀ նախկին վարչապետ Տիգրան Սարգսյանն ու Արարատյան հայրապետական թեմի առաջնորդ Նավասարդ արք. Կճոյանը: Սակայն Սուքիասյանը դեռևս հետախուզման մեջ գտնվելու ժամանակ նամակ էր գրել գլխավոր դատախազությանն ու «Հետք»-ին, որտեղ ասված էր. «Ուզում եմ անդրադառնալ օֆշորային կազմակերպությանը` WLISPERA HOLDINGS LIMITED-ին: Նախ ասեմ, որ այս կազմակերպության հիմնադիրը ես եմ և ես եմ բաժնեմասեր գրել Տ. Սարգսյանի և Ն. Կճոյանի անուններով` առանց նրանց գիտության և առանց նրանց համաձայնության: Դա արել եմ, որպեսզի իմ բիզնեսը զերծ պահեմ տարբեր ոտնձգություններից: Չեմ գիտակցել, որ այն կարող է հետևանքներ ունենալ»:

Փաստաբանը մեզ հետ զրույցում ասաց, որ չի կարող ասել, թե այս պահին ովքեր են այս գործով հարցաքննվել, նշեց, որ ծանոթ է միայն իր պաշտպանյալին վերաբերող նյութերին, իսկ նախաքննության շրջանակներում ոչինչ չի կարող ասել:

«Ընդհանուր կարող եմ նշել, որ պաշտպանյալը իրեն մեղավոր չի ճանաչում ու գտնում է, որ քաղաքացիաիրավական գործարքներ է կատարել, որոնց համար հստակ փաստարկներ ունի: Այդպիսի գործարքներ ամեն օր են կատարվում, ուղղակի այս անգամ մի քիչ քաղաքական երանգ տրվեց: Թող նախաքննությունն ընթանա, հետո ես մանրամասն կներկայացնեմ», -հավալեց փաստաբան Խաչատրյանը:

Նրա պնդմամբ, եթե որևէ մեղավորություն էլ լինի Աշոտ Սուքիասյանի կողմից, ապա դա պետք է լուծել քաղաքացիաիրավական հարթության մեջ: Խաչատրյանը կարծում է, որ եթե չլիներ Տիգրան Սարգսյանի և Նավասարդ Կճոյանի անունները, այս գործը կլիներ «շարքային մի գործ», որի լուծումը շատ ավելի հեշտ կլիներ:

«Բայց ինքը ինչ-որ բաներից ցանկացել է իրեն զերծ պահել, ու խառնելով այդ մարդկանց, փաստորեն վատություն է արել»,- հավելեց փաստաբանը:

Ինչ վերաբերում է այս գործով նախկին վարչապետի և սրբազանի իրավական կարգավիճակին, ապա փաստաբանն ասաց, որ դրա մասին որևէ տեղեկություն չունի, իսկ նրանց հարցաքննելու վերաբերյալ հարցին ի պատասխան, Խաչատրյանն արձագանքեց այսպես. «Եթե հիմնավորում լինի, որ պետք է հարցաքննել, ապա, իհարկե, կհարցաքննվեն, իսկ եթե ոչ, ուրեմն նման հիմքեր չկան: Նրանք հայտնվել են տհաճ շոուների կենտրոնում»:

Յուրիկ Խաչատրյանին վրդովեցրել են մամուլի էջերում տարբեր «չստացված անցյալ ունեցած» գործիչների հայտարարությունները այս գործի վերաբերյալ:

«Խորհուրդ կտայի առաջ չընկնել, չմեկնաբանել ու փաստաբանի անունը վկայակոչելով, ինչ-որ հայտարարություններ անել: Երբ ժամանակը գա, փաստաբանը կխոսի այս գործի մանրամասների վերաբերյալ: Երկու գործարար բիզնես են արել, որը չի ստացվել, ինչի հանկարծ մարդիկ իրանց դարդուցավը թողած, խառնվեցին այս գործին», -պատասխանելով այդ հայտարարություններին, ասաց փաստաբան Խաչատրյանը:

Իր պաշտպանյալի առողջական վիճակի մասին խոսելիս, Խաչատրյանն ասաց, որ ատամների հետ կապված խնդիր ունի ու նաև նիհարել է: «Առողջական վիճակը գերազանց չի կարող լինել, բայց բավարար է»:

Հարակից հրապարակումներ`

Աշոտ Սուքիասյանը արտահանձնվել է Հայաստան. Գլխավոր դատախազություն

Գլխավոր դատախազը` Աշոտ Սուքիասյանի արտահանձնման մասին

Օֆշորային սկանդալի հերոս Աշոտ Սուքիասյանին Թբիլիսիում բռնել են